’Paratiisilersaarut’ ikiortigalugu Biibilimik atuaqqissaaqatitaartorit
1 Pulaakkatsinnut asanninnitta sallusuissummik perlilerlutillu imerusuttunut uteqqipallannissatsinnut killinneqaatigisariaqarparput. (Mat. 5:6) Soqutiginninnimininnguaq sunaluunniit nungussanngippat allattortariaqarparput ineriartortinniartariaqarlugulu. Piareersarluarneq kinguneqarluartitsinissatsinnut iluaqutigissavarput.
2 Anguniagarput tassa soqutiginninnerulersitsinissarput Biibilimillu atuaqqissaaqatitaartornissarput. (Mat. 28:20) Atuakkap ’Paratiisilersaarutip’ naqitap siulliup aallaqqaasiutaani ilaatigut ima allassimasoqarpoq: „Atuagaq kikkunnilluunniit ilinniartitsinermut iluaqutaasinnaaqaaq, qanorluunniit ukiulinnut qanorluunniillu ilinniagaqarsimasunut.“ Biibilimik atuaqqissaarnermik aqutsissutikkuminartumik allagaavoq, allaallu oqaluussisartut nutaat atorluarsinnaavaat. Biibilimik atuaqqissaaqatitaarnisatsinnut sunniuteqarluartumik pulaaqqiipallanneq aalajangiisuuvoq.
3 Biibilimik atuaqqissaaqateqalerneq qanoq aallartissinnaavarput? Aggeqqikkaanni kingullermik oqaloqatigiissutigisimasaq nangeqqissallugu pitsaasarpoq. Immaqa toqusut qanoq pisarnerat oqaloqatigiissutigisimavarsi, aninnginninnilu ima aperisimavutit: „Toqungasunut sumik neriuutissaqarpa?“ Nangeqqigit nassuiarlugulu makititaanissaq neriuutaasoq tunngavissaqartoq; Biibilimi makititsinerit arlallit eqqartorneqarput. Assiliartat quppernerni 167-69-imiittut takutikkit. Taava quppernermi 166-imi immikkoortut 1 aamma 2 oqallisigisigik. Pulaakkat soqutiginnippasippat aggeqqinnissannik oqaloqatigeqqinnissaanillu neqeroorfigisinnaavat.
4 Pulaakkat kingullermik oqarsimappat meeqqanik perorsaaniarneq ajornakusoortoq, ima oqarsinnaavutit:
◼ „Angajoqqaat tamarmik meeqqatik ajunnginnerpaamik kissaattarpaat. Angajoqqaat meeqqaminnik perorsaaneranni ikiorniarlugit Biibilimi unnersuussuteqarpoq. Taamaattumik ilaqutariittut Biibilimik atuaqqissaarnissaq kajumissaarutigerusuttorujussuuarput. [Quppernermi 246-mi immikkoortoq 23 innersuussutigiuk.] Taamaaliornikkut ilisimalikkat ilaqutariinnut tamanut ataavartumik iluaqutaasinnaapput.“ Juánase 17:3 atuaruk. Oqarfigiuk pulaaqqerusullutit ilaqutariillu takutikkusullugit qanoq ilillutik Biibilimik atuaqqissaartalersinnaasut.
5 Inuusuttuuguit imaluunniit oqaluussisartunngorlaajuguit pulaarnermilu siullermi atuakkami qupperneq 3 aallaavigalugu Paratiisi oqaluttuarillatsiarsimallugu, immaqa ima oqarsinnaavutit:
◼ „Biibilimi neriorsuutigineqarpoq Guutip piumasaanik iliortut silarsuarmi uumatut ittumi, kikkut tamarmik pilluarfigalugulu eqqisseqatigiiffigisaanni, inuulernissartik qilanaarisinnaagaat. Atuakkami tassani takutinneqarpoq paratiisimi tamatumani inuulerusukkutta qanoq iliortariaqartugut.“ Naatsumik nassuiaruk atuagaq qanoq ililluta atuaqqissaartaripput neqeroorfigalugulu immikkoortut pingasut piareersaatigisimasatit aallaavigalugit takutinnissaa. Eqqaajuk aggeqqikkusullutit oqaloqatigeqqikkusullugulu.
6 Jesusip ajoqersugaasut inunnik ikiuinissatsinnut pisussaaffeqarpugut. (Rûm. 10:14) Atuagassianik pisimasut imaluunniit oqaloqatigilluarsimasatta soqutiginninnerata ineriartortinniarnissaa akisussaaffigaarput. (Mat. 9:37, 38) Suliassaq ilumoorukkutsigu pilluaqqussutissat tamatuma kingunissai tamaasa peqataaffigisinnaassavavut. — 1 Tim. 4:16. (kmD 94/9 Opret bibelstudier . . .)