’Eqqumaniartuinnaritsi’
1 Jesusip oqaatsit Matîuse 26:38-41-mi allanneqarsimasut oqaatigigamigit inuttut inuunermini piffissami navianarnerpaasumi inuuvoq. Aammattaaq oqaluttuarisaanermi pingaaruteqarnerpaamik pisoqartussaavoq, tassa inuiaat tamarmik annaanneqarnissaat tassani pineqarmat. Jesusip ajoqersugai ’eqqumaniartuartariaqarput’.
2 Ullumikkut Jesusip aniguisitsisutut eqqartuussisutullu tikiunnissaa qanillivoq. Kristumiutut misissuilluarnitsigut paasisinnaagatsigu piffissap pingaartinnartup nalaaniilluta taamaattumik aniguisinneqarnissarput utaqqiinnarlugu uniinnanngilavut. Nalunngilarput piareersimalluinnartariaqarluta. Jehovamik kiffartuussinitsinni ’assoruttuarnissarput tamaviaartuarnissarpullu’ pisariaqarpoq. (1 Tim. 4:10, NV) Uagummi ataasiakkaatut sumi inissisimavugut? Eqqumaniartuinnarpugut?
3 Imminut misissorneq: Jesus aamma ima mianersoqqusivoq: ’Mianersoritsi’. (Lúk. 21:34, 35) Imminut misissortariaqarpugut, ’assuarnaannissarput peqqusersuinnissarpullu . . . eqqarleriit ukua killormoortut mumigasullu akornanni’ qulakkeersimasinnaaqqullugu. (Fil. 2:15) Ullut tamaasa kristumiutut inuunerpugut, Jesus malinniarlugu maleruagassallu Guutip oqaasianiittut malinnerisigut? Kristumiorpalunngitsumik ileqqoqarnaveersaartariaqarpugut, soorlu silarsuarmi naliginnaalersimasunik ’ajortup pissaaneqarfigisaani’. (1 Juá. 5:19, NV; Rûm. 13:11-14) Biibili tunngavigalugu imminut misissorsinnaavugut eqqumanerluta Jesusip peqqusisimaneratut?
4 Utoqqaanertat ilungersuutiginnittariaqarput ilagiit iluanni nakkutigisassat eqiasuillutik isumaginissaannut, savaatinut qanoq paarsinerminni naattorsuiffigineqarnissartik paasillugu. (Epr. 13:17) Ilaqutariinni ittuusut immikkut pisussaaffeqarput ilaquttamik Jehovap aqqutigeqqusaasigut siulersornissaannik. (1 Mos. 18:19; Jos. 24:15; naleqqiuguk 1 Tim. 3:4, 5.) Aammattaaq Biibilimi peqqussutigineqarsimasoq asaqatigiinnissatta eqquutinnissaa tamatsinnut pingaaruteqarpoq. Kristumiummi ilumoortut tamanna ilisarnaatigaat. — Juá. 13:35.
5 Allat mianersoqqunissaat eqqumaffigalugu: Eqqumaneq imminut misissornerinnaanngilaq allanittaaq nassataqarpoq. Peqquneqarsimavugut allanik ajoqersuganngortitsiortornissatsinnik. (Mat. 28:19, 20) Tullitsinnik asanninnikkut allat mianersoqqusariaqarpavut silarsuup matuma aserorneqarfissaani anigueqataaniassammata. Akisussaaffik tamanna kristumiut tamarmik pisussaaffigaat. Pallorfiginninnitsinni tunngaviusut tamanna ilagaat. (Rûm. 10:9, 10; 1 Kor. 9:16) Annaassiniarnermi tamatumani soqutigisaqannginneq imaluunniit toqqaannartumik akerlilersuineq naapikulasarpavut. Akiuutiinnarnissatsinnik pisussaavugut, allaat amerlanerit mianersoqqusinerput sumiginnaraluarpassulluunniit. (Hes. 33:8, 9) Guutimut tullitsinnullu ilumoortumik asanninnitta qasujuinnissatsinnik ikiussavaatigut.
6 Imminut naammagisimaarnissamut piffissaanngilaq. Ulluinnarni inuunerup isumakuluutaanik paatsiveerussarteqinata, imaluunnit nuannaarniutinut tiguartinnata taamaalilluta silarsuarmit tammartitaalluta. (Lúk. 21:34, 35) Siornatigornit aatsaat taama piffissap pingaaruteqartiginera malugisariaqarparput. Pissutsinik aaqqissuussaanerup ajortup Jesus Kristusikkut eqqartuunneqarfissaa qanilliartorasuarpoq. Taamaallaat eqqumaniartut aniguissapput. Jesusip siunnersuutaa malikkutsigu ’piumaartussanik tamanik qimarratiginnissinnaallutalu’ annertuumik qujamasunnissatsinnut pissutissaqassaagut. — Lúk. 21:36. (kmD 95/7 „Hold jer vågne“)