Jehova unnersiutigiuaannaruk
1 Iliuutsit ikittuinnaat ima pingaartigipput tamatigut naammassineqartussaallutik. Tamakku ilagaat nerineq, anersaartorneq naammattumillu sininneq. Apustilip Paulusip nutaarsiassamik nuannersumik oqaluussissutiginninnissaq kaammattuutigigamiuk eqqarsaat tamatumunnga assingusoq atorpaa. ’Taammaattumik soraarata taassumuuna pilliutinik qujaniutinik Guuti aatsivigisigu.’ (Epr. 13:15) Taamaattumik Jehovamik unnersiutiginninnerput sammiuartariaqarparput. Aap, ullut tamaasa Ataatatsinnik qilammiusumik unnersiutiginneqataaniartariaqarpugut.
2 Inuit ilaasa oqaluussissutiginninnermik soqutiginninnini akornusernialermassuk Jesus ima oqarpoq: ’Guutip naalagaaffia oqaluutigisassaraara.’ (Lúk. 4:43) Ukiuni pingasuni affarmilu kiffartuussinermini ullut tamarluinnaasa, qanoq ilisukkulluunniit Guuti naalannarsisittarpaa. 1 Korintumiut 9:16-imi erserpoq Paulus aamma taamaassimasoq, tassani taanna oqarpoq: ’Uannut eqqanaqqajaqaarluunniit iivangkiiliu oqaluutiginngikkukku.’ Ullumikkut Kristumiut aalajaatsut kajumissaarneqarsimapput neriuutigisartik illersussallugu allanut piareersimaqqullutik. (1 Pît. 3:15) Ullumikkut pioneerit hundredtusintilikkuutaat eqiasuillutik ilagiinnilu oqaluussisartut millionilippassuit ilungersuutiginnipput maligassiuisut taakku malinniarlugit.
3 Eqqarsaatigigaangatsigu maligassiuisorput, Jesus Kristus, qanoq uummammigut ilumoorlunilu eqiasuitsigisimasoq kissaatigilersarparput taassuma tumaanik malinninnissarput. (1 Pît. 2:21) Ulluinnarni ajornartorsiutit pissutigalugit ilaatigooriarluta nikallortoorsinnaasarpugut. Qanoq ililluta periarfissarsisinnaavugut Jehovamik unnersiutiginninnissatsinnik ulloq naallugu sulisarutta saniatigullu ilaqutariinni pisussaaffiit piffissarujussuarmik atuiffiusut eqqarsaatiginiarlugit? Meeqqammi atuarfimminnik paarsiniartut? Eqqarsaqqajaasoqarsinnaavoq Jehovamik unnersiutiginnilluni nalunaajaanissaq ullut tamaasa pisinnaanngilluinnartoq. Ilaatigut ilaat ataasiakkaat allaat qaammat naallugu nutaarsiassamik nuannersumik allatigulluunniit oqaluussinngitsoortarput.
4 Jeremias oqaluussinngitsoorsinnaasimanngilaq. Piffissap ilaani sivikitsumik Jehovap aqqani oqaluussinngillatsiarami misigisimavoq ilumini soorlu ikuallattoqartoq akiorsinnaanngisaminik. (Jer. 20:9) Naak akerlilersorneqaraluaqaluni soraarani periarfissatigut allatigut nassaartarsimavoq Jehovap tusarliussaata allanut nalunaajaatiginissaanut. Sapiilluni aalajangersimarpalullunilu maligassiuisimanera malinniarsinnaanerparput ullut tamaasa Pinngortitsisutsinnik unnersiutiginninniarluta periarfissanik allanik ujartuisarnitsigut?
5 Oqaluussisartut allat ilagalugit piareersagaasumik aatsaat Jehovamik oqaluussissutiginninnissarput killilersimaartariaqanngilarput. Taamaallaat ataasiinnaq pisariaqartipparput, tassa inuk tusarnaarusuttoq. Ullut tamaasa allanik naapitaqartarpugut — ornittarpaatigut, suleqatigivavut, pisiniarfimmiluunniit tunuleriiaarlutik utaqqeqatigivavut, bussimiluunniit ingerlaqatigalutigit. Iliuuserisassatuaavoq inussiarnersumik ilassinninnissaq apeqquteqarluniluunniit arlaanniilluunniit maluginiarsimasamik eqqarsalersitsisumik oqaloqatiginninnissamik aqqutissiuisinnaasumik. Oqaluussisartorpassuit misigisarsimavaat periarfissat taamaattut oqaluussissutiginninnermi kinguneqarluartarsimasut. Nutaarsiassamik nuannersumik allanut oqaluussissutiginninnissamut periarfissarpassuit eqqarsaatigigutsigik takorloorsinnaanavianngilarput qaammat ilivitsorsuaq Naalagaaffik pillugu nalunaajaanngitsoornissarput.
6 Siunissarput tamaat Jehovamik unnersiutiginninnissarput piginnaatitaaffissuuvoq uagutsinnut. Tussiaasiortup oqarneratut, anerneqartut tamarmik Jehova unnersiutigissavaat, kissaatigaarput uagutsinnuttaaq tamanna atuulluinnartoq. (Tuss. 150:6) Uummatitta killippaatigut taamaaliortuarnissatsinnik, ullut tamaasa periarfissat suulluunniit atorlugit Jehovamik oqaasianillu oqaluutiginnittuartissavaatigut. (kmD 95/10 Lovpris altid Jehova)