Ullut tamaasa Jehova unnersiutigiuk
1 Guuterput Jehova naleqanngitsuuvoq, Pinngortitsisuulluni asannittoq. Inuunermut tamarmut pilluarnissamullu aallaaviuvoq. Angingaarmat pinngortitat tamarmik unnersiutigisariaqarpaat. Inuttut ataasiakkaatut tamatta tussiaasiortutut oqarnissarput kissaatigaarput: „Uangali neriuttuinnassaanga, erinalimmillu unnersiutigiuassavakkit. Ullut tamaasa oqaluttuarissavakka iluarsutsit, aamma suliatit annassutaasut kisissaanngitsut.“ (Tussiaat 71:14, 15) Taamaaliorumalluta ullut tamaasa Jehovamik unnersiutiginninnissamik periarfissat takkukkaangata eqqumaffiginiartuartariaqarpavut, naapertuilluassusia aniguisitsisimaneralu pillugit ajunngitsumik eqqartuinissarput piareersimaffigalugu.
2 Kristumiut siulliit Jehovamik unnersiutiginninnissamik maligassiuilluarsimapput. Piinsip ulluani 3000-it kuisittut pillugit apustilit suliait 2:46, 47-mi atuarpugut: ’Ullullu tamaasa qasusuillutik isumaqatigiillutillu naalaffimmiittarput, . . . Guutilu unnersiutigaat inunnilu tamani nuannarineqarlutik. Naalagarlu annattunik ullut tamaasa ilagiinnut ilanngussisarpoq.’ Sallusuissummik Jehovamik Messiasiutitaanillu angingaartumik ilinniartarput. Nuannaarnerat allanut sunniuteqarlunilu tusarnaarnissamik ilinniarnissamillu Jehovamillu unnersiutiginninnissamik kaammattuutaavoq.
3 Ullut tamaasa periarfissat takkuttuartarput: Amerlasuut ullut tamaasa Jehovamik unnersiutiginninnissartik sukkulluunniit nalunaajaanermikkut paasisimavaat. Piareersarsimagaangamik ajunnginnerusumik kinguneqartarpoq. Qatanngutip arnap sukkulluunniit nalunaajaanissaminik aalajangiussisimasup, ullut ilaanni paasilerpaa biilimini tillinniartoqarsimasoq biilimilu ingalaavi marluk aserorneqarsimasut. Sannavimmut sianerpoq mekanikerimullu oqaluussinissani piareersalerlugu. Piareersarnermini ilanngullugu qinnutigaa Jehovap siulersuinissaa. Tamatuma kinguneraa mekanikerimut nalunaaquttap akunnera ataaseq oqaluussiffigineranik atuakkamillu ’Paratiisilersaarummik’ pineranik.
4 Alla qatanngut arnaq qimmiminnik aneerussingaangamik eqqaamiuni naapikulasarsimavaa. Ullut ilaanni inuunermi ajornartorsiutit itinerusumik eqqartulerpaat, taamaalilluni arlaleriarluni oqaloqatigiinnernik pilersitsivoq. Kingusinnerusukkut sivitsulaartoq atuaqqissaaqatiginninneq aallartinneqarpoq. Kingorna soqutiginartumik eqqaamiu nassuerpoq Jehovap nalunaajaasui matuminut kasuttorsimasuuppata oqaloqatigisimanaviarnagit, tassami Guuti Biibililuunniit upperisimannginnamigit.
5 Allat tuniniaasunut allanulluunniit imminnut aggertunut nalunaajaasarsimapput. Qatanngut arnaq Irlandimeersoq aningaasanik sillimmasiinissamik tuniniaasartumik pulaarneqarsimavoq. Nassuiaappaa inuunermik naassaanngitsumik neriugisaqarnerminik. Eqqarsaat angummut tassumunnga katuullisut perorsarneqarsimasumut nutaajulluinnarpoq. Atuakkamik ’Paratiisilersaarummik’ pivoq, sapaatip-akunnera ataaseq qaangiummat ataatsimiinnermut najuuppoq atuaqqissaaqatigineqarusullunilu. Tuniniaasartoq maanna qatanngutaavoq kuisimasoq.
6 Jehovamik unnersiutiginninnissamik periarfissat ullut tamaasa takkuttartut eqqumaffiginiarnerusariaqarpavut. Atuagassiat atuagassiaaqqallu saqqumisumiitinnissaat neqeroorutigeriaannaallugit iluaqutaasarpoq. Utaqqilluni issialaaginnartilluniluunniit minuttialunnguani qasuerserlutik issiasunut oqaluussinissamut periarfissiisarpoq. Atuartut ilaasa atuagassianik Biibililersaarutaasunik nerrivimminni saqqumisumiitsitsisarnermikkut maluginninniarsimasunut apeqquteqalersitsisarsimapput, taamaalillutillu oqaloqatigiinnermik pilersitsisinnaalluni. Allassimaffinnik atorsinnaasannik eqqarsaateqarniartarit, Jehovamullu qinugit ikioqqullutit. Taamaalillutit pilluaqquneqangaarsinnaavutit. — 1 Juá. 5:14. (kmD 95/12 Lovpris Jehova hver dag)