Unnukkut oqaluussineq misilissimaviuk?
1 Tamatta suliatta inerneri takussallugit nuannaarutigisarparput. Suliattalu inernerinik ajunngitsunik takussutissaqanngikkaangat suliaq qasunarsinnaasarpoq naammagisimaarnaranilu. Siunertaqarluartumik suliaqarneq immini akissarsiaavoq, aap pilluaqqussutaalluni. (Naleqqiuguk Nalunaajaasup oqaasii 3:10-13.) Oqaluussinermittaaq suliarput taamaappoq. Misilittakkat tunngavigalugit nalunngilarput matumiit matumut oqaluussisimagaangatta Biibililu pillugu inunnik oqaloqateqarsimagaangatta, angerlartarpugut anersaakkut inuummarissisimalluta. Naammassisaqarsimalluta misigisarpugut.
2 Sumiiffiit ilaanni ulluunerani inuit angerlasimasut naammattooruminaallisimaqaat. Nalunaarusiat takutippaat sumiiffinni amerlasuuni ulluunerani affaat sinnerlugit angerlarsimasanngitsut. Taamaattumik ilagiit amerlasuut unnukkut oqaluussinernik aaqqissuussisimapput, tamannalu kinguneqarluarsimavoq. Oqaluussisartut oqaluttuarput ualikkut kingusinnerusukkut inuit pulaaraagamikkik amerlanerit angerlarsimasartut, eqqissisimanerusartullu Naalagaaffimmillu tusarliussamik tusarnaarumanerusartut. Angalaartarfinni unnukkut oqaluussillutit misilissimaviuk? — Naleqqiuguk Mákorse 1:32-34.
3 Utoqqaanertat unnukkut oqaluussiartortarnissanik aaqqissuussisut: Sumiiffiit ilaanni ualikkut kingusinnerusukkut unnulaarneraniluunniit katersuuttitsisarnerit aggialluarfigineqartarsimapput Tamanna immaqa inuusuttunut oqaluussisartunut atuarfimmiit ualikkut soraartartunut imaluunniit inersimasunut ualikkut kingusinnerusukkut suliffimminniit soraartartunut periarfissaasinnaavoq. Oqaluussisartut ilaat weekendini kiffartuussisinnaasanngitsut sapaatip-akunnerata ingerlanerani unnukkut oqaluussinermut akuttunngitsumik peqataasarnertik nuannaarutigaat.
4 Unnukkut oqaluussisarnerit kiffartuusseriaasiusinnaapput assigiinngitsut. Soorlu illumiit illumut atuagassiat atorlugit imaluunniit qaammammi neqeroorut atorlugu oqaluussisoqarsinnaavoq. Ullukkut weekendinilu naapissinnaanngisat unnukkut angerlarsimatillugit naapinnissaat periarfissaalluarpoq. Immaqa aamma aqqusinermi angalaarneq iluatitsilluarfiusinnaavoq, inunnik sulereerlutik angerlartunik atassuteqarfiusinnaasumi. Amerlasuut paasisimavaat pulaaqqiinermut unnuk atussallugu piffissaalluarnerusoq.
5 Mianersorit periaaserillutillu: Sumiiffiit ilaat unnukkut angalaarfigissallugit ulorianarsinnaapput. Taamaattumik silatusaarnerussaaq aqqusernit qaammarsagaalluartut qinissallugit marlukkuutaarnissarlu arlalikkuutaarnissarluunniit, aammalu sumiiffiit navianartorsiorfiusinnaasut oqaluussiffiginnginnissaat. Kasuttoreeraanni qaamasup nalaanut pisariaqarpoq erseqqissumillu imminut ilisaritilluni. Siuneqassuseqarit. Pulaakkamut piffissaq ajorpat — soorlu ilaqutariit nerileruttorpata — piffissakkut allakkut aggeqqinnissat neqeroorutigiuk. Nalinginnaasumik unnulaarnerani oqaluussineq ajunnginnerusarpoq.
6 Ingammik aasap qaamasaleruttorfiani unnukkut oqaluussisarneq tulluarpoq. Jehovap suliniutigut pilluaqqussavai ’kiffartuukkutsigu ullukkullu unnuakkullu’. — sar. 7:15. (kmD 7/96 Har du prøvet aftenforkyndelse?)