Upperluta saqisariaqarpugut
1 Ullumikkut inuit millionilippassuit inuunertik nunap piinut tunngavilertarpaat taamaalillutik isumaatsuliorlutik pisuussutit salloqittaasut tatigivallaalerlugit. (Mat. 13:22) Pisuussutitik annaaneqaraangata, naleerukkaangata tillinneqaraangataluunniit sakkortuumik ilinniarfigisarpaat. Silatunerusumik pisuussutinik anersaakkut ittunik noqqaassuteqarnissatsinnut kajumissaarneqarpugut. (Mat. 6:19, 20) Tamatumalu nassataraa ’upperluta saqinissarput’. — 2 Kor. 5:7.
2 Oqaaseq ’upperneq’ griikerit oqaasiannit nutserneqarsimavoq, tassani eqqarsaatigineqarpoq tatiginninneq, upperinninneq, qularutiginninngilluinnarneq. Upperluni saqineq imaappoq artornartut suulluunniit takkukkaluartut atorsinnaallugit Guutimut tatiginnilluni, qularinagu ingerlavissamik siulersuinissamik piginnaaneqartoq, pisariaqartitatsinnillu isumassuinissaminut piumassuseqarluartoq. Jesusip naammalluinnartumik maligassiuussimavaatigut; pingaaruteqarnerusunut aallussilluartuuvoq. (Epr. 12:2) Tamatumunnga assingusumik uummaterput takussaanngitsunut, anersaakkut ittunut saatsinniartuartariaqarparput. (2 Kor. 4:18) Eqqaamajuartariaqarparput ullumikkut inuuneq nalorninartoqarmat, pinngitsoortissinnaanngilluinnarparput Ataatarput qilammiusoq, Jehova.
3 Aammattaaq qularutiginngilluinnartariaqarparput Jehovap peqatigiissortani takussaasut ikiortigalugit ingerlatittarmatigut ’inussiaq aalajaallunilu silatooq’ siulersortigalugu. (Mat. 24:45-47) Uppernerput takutittarparput ilagiinni ’siulersortivut naalallugit tusartarlugit’. (Epr. 13:17) Maniguulluta teokratiimik aaqqissuussaanermut suleqataagutta ersersissavarput Jehova tatigalutigu. (1 Pît. 5:6) Uummammik tamarmiusumik kissaatigisariaqarparput peqatigiiffiup suliarititassaanut tapersersuiumalluta. Tamatuma qatanngutitsinnut asanninnikkut ataasiussutsikkullu qanimut attaveqalersissavaatigut. — 1 Kor. 1:10.
4 Upperneq qanoq nukittorsarneqarsinnaasoq: Uppernitta uninngaannarnissaa pinngitsoortinniartariaqarparput. Sakkortuumik akiuuttariaqarpugut nukittorsarumallugu. Akuttunngitsumik atuaqqissaartarnikkut, qinunikkut ataatsimiinnernullu najuuttarnikkut uppernerput nukittorsarneqarsinnaavoq, Jehovallu ikiuineratigut misilinneqarnerit suulluunniit ajugaaffigisinnaavavut. (Evf. 6:16) Biibilimik atuaqqissaartarnissannut ataatsimiinnernullu piareersartarnissannut pilersaaruteqarluarsimavit? Ilikkakkatit akuttunngitsumik eqqarsaatigeqqissaartarpigit, Jehovamullu qinunikkut saaffiginnittarpit? Ataatsimiinnernut tamanut sapinngisat tamaat najuullutillu peqataasarpit? — Epr. 10:23-25.
5 Upperneq suliatigut ersertarpoq. (Jâk. 2:26) Pingaartumik allat neriuutitsinnik oqaluttuuttarlugit uppernerput ersersissinnaavarput. Allat nutaarsiassamik nuannersumik oqaluttuunnissaannik periarfissarsiortuartarpit? Pissutsit atukkatit allanngortissinnaavigit, taamaalillutit kiffartuussinerulersinnaajumallutit? Siunnersuutit pisartakkavut, kiffartuussinermut pikkorinnerulernissamut siunertarineqartut malittarpigit? Anersaakkut anguniagaqarpit angujumallugillu noqqaassuteqartarpit?
6 Jesusip mianersoqquaatigut inuunerup matuma piinik isumakuluppallaarnissamut, timip pii imaluunniit namminissarsiortumik soqutigisat pissutigalugit anersaakkut isiginninneq ersarlulersinnaammat. (Lúk. 21:34-36) Qanoq saqinerluta mianersuutigisariaqarparput taamaalilluta uppernikkut umioqqunata. (Evf. 5:15; 1 Tim. 1:19) Neriuppugut tamatta naggataatigut oqarsinnaajumaarluta ’sorsunneq ajunngitsoq sorsunnerisimallugu, arpaffissaq naallugu’. — 2 Tim. 4:7. (kmD 9/96 Vi må vandre efter det vi tror)