’Annerusumik ilungersorniaritsi’
1 Apustili Peterip kristumiut ukiuni hundredelinni siullerni kajumissaarsimavai annerusumik ilungersoqqullugit Guutimut attaveqarnerat ’aalajangersarsinnaaqqullugu’. (2 Pît. 1:10) Ullumikkut uaguttaaq Jehovamut kiffartornitsigut Jehovap iluarisaanik iliorluta annerusumik ilungersuuteqarusuppugut. Sunilli nassataqassava? Jehovamut qanimut attaveqalerutta uagutsinnullu iliuuserisimasarpassui eqqarsaatigilluarutsigik, taassumunnga pitsaanerpaamik ilungersorluta kiffartorusulissaagut. Oqaluussisarnitta pitsaanerulernissaa, aammalu ajornanngippat, annertunerulernissaa kissaatigissavarput. — Tuss. 34:9; 2 Tim. 2:15.
2 Qatanngutip angutip inuusuttoq oqaluussisarnermut iliuuseqarnerulerusuttup paasisimavaa aalajangersimasumik Biibilimik atuaqqissaartarnermigut Jehovamik pingaartitsinini annerulersoq ilungersuussininilu ineriartortoq. Tamatuma pioneerinngornissamik qinnuteqalersippaa. Qatanngut arnaq inunnut takornakkaminut oqalunniarnissamik ajornakusoortitsisoq, ’Ræsonnerebogimi’ aallarniissutissat ilaannik sungiusarpoq, sivitsorianngitsorlu kiffartornermini angusaqarluarluni. Aappariit Biibilimik atuaqqissaaqatigisalerpai maannakkullu taakkua sallusuissut ilassisimavaat.
3 Naammassisinnaasatit nuannaarutigikkit: Ilatta ilaat peqqiilliornermik, ilaquttanit akerlilersorneqarnermik, aningaasaqarniarnikkut ajornartorsiutinik imaluunniit angalaartarfigisami soqutigisaqanngissutsimik akiugaqartarput. Ajornartorsiutit allarpassuit ulluni kingullerni nalinginnaalersimasut kiffartornitsinnut akornutaasinnaapput. (Lúk. 21:34; 2 Tim. 3:1) Taamaappat imaassava Jehovamut tunniusimanerput malillugu inuunngitsugut? Sapinngisannguarput tamaat ilungersuussigutta taamaanngilaq.
4 Silatusaarnerunngilaq allat naammassisaat tunuliaqutaralugit imminut nalilertarnissaq. Akerlianik Biibilip kaammattuutigaa ’kialuunniit nammineq suliani misigilissagaa’. Jehovap nuannaarutigisarpaa sapinngisannguatsinnik ilungersoraangatta taava immitsinnut ’usorsitsaatissaqassaagut’. — Gal. 6:4; Kul. 3:23, 24.
5 Peterip kajumissaarutaa malitsigu ’ilungersorluta taassumunnga naapeqqulluta innarluilluta assuarnaallutalu eqqissilluta’. (2 Pît. 3:14) Toqqissitissavaatigut isumatsigullu eqqissitilluta Jehovap kisimi tunniussinnaasaanik. — Tuss. 4:9.