Soqutiginnittut tamaasa isumassuinermik ilumoortumik nittaavigikkit
1 Silarsuaq tamakkerlugu Naalagaaffimmik oqaluussissutiginninneq naggaserneqangajalerpoq, taava ’Guutimik ilisimasaqanngitsut’ tamarmik naassaanngitsumik piuneerutsinneqassapput. (2 Tás. 1:7-9) Taamaattumik allat inuunerannik ilumoortumik isumassuinerup Jehovap inuttaasa Naalagaaffiup tusarliussaanik sapinngisamik amerlanerpaanik angusiniarput. — Sef. 2:3.
2 Qaammatit tamaasa nalunaaquttap akunneri millionillit ’ajunnginnerusut pillugit nutaarsiassanik nuannersunik’ tusarusuttunik ujarlernermut atorneqartarput. (Jes. 52:7, NV.) Amerlasuut Napasuliaq Alapernaarsuiffik aamma Iteritsi! imaluunniit atuagassiaaraq Guutip sumik piumaffigaatigut? pisimavaat. Ilumoorluni isumassuinerup soqutiginnittunut tamakkununnga tamanut pulaaqqiisittariaqarpaatigut. — Uss. 3:27.
3 Eqqorluartunik allattuisarit: Kikkut soqutiginninnermik ersersitsinersut atuagassianillu pinersut eqqorluartunik peqqissaartumillu allattortarutsigik angusaqarluarnerussaagut. Paasissutissat soorlu makkua pulaakkap atia adressialu, pulaarnerup qanga pinera, atuagassiat suut tunniunneqarnersut sunalu eqqartorneqarsimanersoq sunniuteqarluartumik pulaaqqinnissaanut iluaqutigissavatit. Pulaaqqaarnermi pulaakkap oqaaserisimasaanik allataqarsimaguit, pulaaqqiinermi oqaloqatigeqqilerukku immaqa innersuussutigisinnaavat. Pulaakkap inuttut atugarisaanik allataqartoqassanngilaq.
4 Piaartumik pulaaqqiisarit: Qaammammi kingullermi atuagassianik tunisatit qassit pulaaqqinniarsimavigit? Oqaloqatiginagit sapaatit akunneri arlallit qaangiussimappat? Naassaanngitsumik inuunissaannut ilumoortumik soqutiginninnerup tuaviornerpaamik pulaaqqiisittariaqarpaatigut, ajornanngippat ullualuit qaangiutsinnagit oqaloqatigiinneq eqqaamalluartillugu. Soqutiginninnera allisinniarlugu aggeqqiaarnikkut ’oqaaseq uummataannut siaruartigaagaluaq piiariartorlugu’ Satanip aggernissaa immaqa akornusersinnaavat. — Mák. 4:15.
5 Piareersarneq pisariaqarpoq: Pulaaqqiisarnivit sunniuteqarneri qanoq piareersarluarsimatigininnut atassuteqarluinnarput. Qanoq oqarnissat piareersaruk. Pulaaqqaarnermi atuagassianik atuagassiaaqqamilluunniit nutaamik neqeroornermi qanoq oqartoqarsinnaasoq Naalagaaffimmik kiffartorneq apriili 1997-imoortumi tunuani arlalinnik pitsaasunik siunnersuuteqarpoq. Taava tulliuppoq aggeqqinnermi qanoq oqassanerluni eqqarsaatigissallugu. Pulaaqqiiguit qanoq oqarsinnaavit? Biibilimik atuaqqissaaqateqarneq qanoq aallartinneqarsinnaava?
6 Nunarsuup eqqiarnissaanut inuuffigiuminarnerulernissaanullu suna pisariaqartoq pillugu oqaloqatigiinneq ingerlateqqilerukku ima oqarsinnaavutit:
◼ „Kingullermik maaniikkama isumaqatigiippugut nunarsuaq paratiisinngussappat annertuunik allannguisoqartariaqartoq. Isumaqarpit inuit taama annertutigisunik allannguisinnaasut? [Pulaakkat akili.] Sooq Guuti akuliuttariaqarnersoq uani allassimavoq.“ Tussiaat 37:38 atuaruk. Taava Guutip sumik piumaffigaatigut?-mi ilinniagassaq 5-imut ingerlaqqigit, immikkoortut 4 aamma 5 ilaannik qinersimasannik atugaqarit takutinniarlugu Guutip qanoq ililluni siulittuut tamanna naammassissagaa. Atuagassiaaraq atorlugu Biibilimik atuaqqissaaqatiginissaa neqeroorutigiuk.
7 Pulaaqqaarnermi Guutip naalagaaffia oqaloqatigiissutigisimagussiuk pulaakkallu atuagassiaaraq nutaaq pisimappagu pulaaqqiinermi ima oqarsinnaavutit:
◼ Kingullermik ilinnut eqqaavara Guutip naalagaaffia naalagaaffiviusoq nunarsuaq tamakkerlugu naalakkersuisussaq Jesus Kristusilu kunngiussasoq. Naalakkersuinerup taamaattup siulersuisullu taamaattup pitsaaqutaanik takusaqarsinnaavit?“ Pulaakkat akili. Atuagassiaaqqami nutaami ilinniagassaq 6 qupperuk. Immikkoortut 6 aamma 7 ilaannik qinikkannik atugaqarit quppernerlu 13-imi assiliaq atoruk, Guutillu naalagaaffia siunissami inuiannut qanoq iliorumaartoq takutiguk. Daniel 2:44 atuaruk atuagarlu ’Ilisarsineq’ naleqqussorinarpallu Biibilimik atuaqqissaaqateqarneq neqeroorutigiuk.
8 Silarsuarmi upperisarsiortut inuiannut ajornartorsiortitsisimanerannik paasinnissimasumik naapitaqarsimaguit pulaaqqiinermi ima oqarsinnaavutit:
◼ Upperisarsioqatigiit sorliit Guutimit iluarisaanersut eqqarsaatigisimaviuk? [Pulaakkat akitiguk.] Atuagassiaaqqap uumap Guutip sumik piumaffigaatigut? upperisap ilumoortup ilisarnaataasa ilai eqqaavai.“ Ilinniagassaq 13 qupperuk immikkoortunilu 3-miit 7-imut uingasunik allannillit tallimat erseqqissakkit. Taava ima oqarsinnaavutit: „Upperisalli ilumoortup nassaarinera naammanngilaq, inuttut ataasiakkaatut Guutip sumik piumaffigineraatigut aamma paasisariaqarparput.“ Juánase 4:23, 24 atuakkit. Oqaloqatigiinnerup ingerlaannarnissaa neqeroorutigiuk. Atuagassiaaqqami ilinniagassaq 1 qupperuk qanorlu atuaqqissaaqatigiinneq ingerlasartoq takutiguk.
9 Ilaqutariilluni pilluarneq oqaloqatigiissutiginiarlugu pulaaqqiiguit ima oqarsinnaavutit:
◼ „Kingullermik oqarpunga Biibilimik maleruaaneq ilaqutariilluni pilluarnerup isertugaatigigaa. Biibilili nalitsinni ilaqutariinnik atorneqarsinnaava pisoqaavallaarpaluunniit? Qanoq isumaqarpit?“ Pulaakkat akili. Atuagaq ’Ilisarsineq’ saqqummiuguk. Kapitali 2 qupperuk immikkoortumilu 13-imi issuagaq atuarlugu. Immikkoortumi 3-mi eqqarsaatit atorlugit Biibilimik atuaqqissaaqatigiinneq neqeroorutigiuk.
10 Soqutiginninnermik allisitsiniaalluta eqqorluartunik allattuinikkut, anitinnata piareersarluarnikkut aggeqqiaartarnikkullu tullitsinnik asannittuliorsinnaavugut annassutip aqqutaanut kajungilersitsisumik. — Mat. 22:39; Gal. 6:10.