Allat Guutip oqaasianik ilinniartikkit — atuakkat nutaannginnerusut atorlugit
1 Paasitinneqaratta septembarimissaaq atuakkanik nutaannginnerusunik 192-inik quppernilinnik neqerooruteqassasugut immaqa eqqarsarpugut: „Sooq? Atuakkat nutaanerusut atussallugit pitsaanerussanngila? Ullutsinnut naleqqunnerupput kusanarnerusumillu isikkoqarlutik.“ Taamaakkaluarpoq, imali paasisariaqarnerpa atuakkat pisoqaanerusut pingaaruteqarunnaarsimasut, imaluunniit inuit tamakku atuarlugit sallusuissummik ilikkarsinnaanngitsut?“ Soorunami taamaanngilaq. Atuagaativut sannatinut sanasut atortagaannut assersuunneqarsinnaapput. Tamatigut nutaanik sannatiliortoqartarpoq, nutaanik sannalerlugit ilusilerlugillu. Isumaqarpali sannatit nutaanngitsut tamaasa atorunnaartariaqartut? Naamik. Nutaannginnerusut ilaatigut allaat nutaanit pitsaanerusinnaapput pingaarnerutinneqarsinnaallutillu. Aamma atuagaativut eqqarsaatigalugit taamaappoq. Atuagaatitsinni nutaannginnerusuni paasissutissat, assersuutit tunngavilersuutillu kingusinnerusukkut allani uteqqinneqarsimanngitsut nanisinnaavavut. Atuakkat kusanarpata atorneqarsinnaappatalu qiimasulluta atortariaqarpavut, allat paasissutissat pissanganartut imarisaat iluaqutigisinnaammatigik.
2 Qanorli ililluta atuakkat nutaannginnerusut tamakku neqeroorutigisinnaavavut? Tulliuttuni siunnersuutit ilaat saqqummiutissavavut. Eqqaamajuk najoqqutassaannaammata. Ilinnut angalaarfigisartakkannullu naleqqussartariaqarpatit.
3 ’Lykkebog’-i atorusukkukku immaqa ima oqarsinnaavutit:
◼ „Kutaa, . . .-mik ateqarpunga. Kasuttorfigaakkit piffissama ilaa atorlugu inuit allat oqaloqatigigakkit tamatta upperisarput sumik tunngaveqarnersoq pillugu. Ilaasa ilisimatuussuseq tunaartaraat allat Korani atorpaat. Illit upperisannut suna tunngavigaajuk? [Tusarnaaqqissaaruk.] Uanga Biibili atorpara pilluarnarnerusumik inuuneqalersissimammanga. Inuttulli allatut kissaatigaara pilluarlunga inuunissara, ajunngitsunik ikinnguteqarlunga ilaallu ilanngullugit. Isumaqarama Biibili tamatumunnga matuersaataasoq isumaqarpit uppiavallaartunga? [Tusarnaaqqissaaruk. Isumaqarpat taama upperisaqarneq uppiavallaarnerusoq ima aperisinnaavat: „Taava sumi isumaqarpit pilluarnissaq nanineqarsinnaasoq?“.] Tamatumunnga assersuummik taasaqarsinnaavunga. [Matîuse 7:12 takutiguk oqaaseqatigiilli siulliit kisiisa atuarlugit.] Najoqqutassaq tamanna maleruarsinnaasuugutsigu ajornartorsiuterpassuit pinngitsuussagaluarpavut, ilaa? [Tusarnaarit.] Atuagaq manna ikiortigalugu nanisimavakka Biibilimi inuunermut pitsaanerusumut najoqqutassiarineqartut. Ilinnut tunniukkusuppara. [Atuagaq tunniuguk. Taava ’Lykkebog’-imi illit nammineq nuannarinerusannik imaluunniit pulaarfigisavit soqutiginerusinnaasaanik takutiguk.]“
4 Siunnersuutit tulliuttut aamma aqqusinermi atorneqarsinnaapput. Ima oqarsinnaavutit:
◼ „Inuit pilluarneq soqutigiuarsimavaat. Filosoffit, psykologit immikkullu ilisimasallit allat pilluarneq ujartuaannarsimavaat. Illit isummat malillugu pilluarneq qanoq anguneqarsinnaava? [Tusarnaarit oqaaseqarlutillu.] Atuakkami matumani tamanna allanit allaanerulaartumik sammineqarpoq. Tassami, atuagaq pisoqaaqisoq taamaattorli nutaajuartoq Biibili tunngavigalugu allagaavoq. Pisinnaavat. Angerlaassinnaavat misissorlugulu. Pissanganartorujussuuvoq.“
5 Suliffinni atuakkamik tunniussiumaguit, atuagaatitta ilaat sunaluunniit atorsinnaavat ima oqaannarlutit:
◼ „Ungasinngitsukkut atuagaq nuannersoq atuarpara. [Oqaluttuarilaaruk, eqqaallugu sooq immikkut ittutut isigigit.] Illit aamma atuassagaluarpat. Piumaguit ilinnut nassarsinnaavara. Atorsinnaavat imaluunniit pigiinnarsinnaavat.“
6 Qatanngutip saqqummiusseriaatsimik tulliuttumik siunnersuuteqartup eqqaavaa allassimaffimmik atuarnissani pulaakkat quliugaangata qulingiluat akuerisaraat. Imagooq oqartarpoq:
◼ „Kutaa, . . .-mik ateqarpunga. Sanilitit oqaloqatigaakka una pillugu: Qanoq ililluta silarsuarmi matumani paatsiveqanngiffiusumi eqqissineq piviusoq angusinnaavarput? Illit qanoq isumaqarpit? [Tusarnaaqqissaaruk.] Isumaqarpit FN-ip nunarsuarmiunut tamanut eqqissinissaq pilersissinnaagaa? [Pulaagaq oqaaseqartiguk.] Nalunngiliuk New Yorkimi FN-ip illorsuata silataani inuusaliap ataani allassimaffik Biibilimeersoq allassimasoq? [Akinissaa utaqqiuk.] Takuuk uani Jesaja 2:4-imi qanoq allassimasoqartoq. [Oqaatsit ’saffiussavaat panatik assallatserummut savissaliaralugit’ erseqqissakkit.] Isumaqarpit tamatumani iluatsitsisimasut? [Pulaagaq oqaaseqartiguk.] Ilumoorputit, kisianni versi 3-mi allassimasoq malugiuk. Inuit Guutimit ajoqersorneqartut eqqissineq tamanna misigiumaarpaat. FN upperisarsiornerillu Guutimit Biibili tunngavigalugu ajoqersorneqarsimasorinanngillat. [Taava atuakkat ilaat nutaannginnerusut neqeroorutigisinnaavat. Tamarmik oqaluuserisamut naapertuuttumik imaqarput.]“
7 Oqaluussisartup atuakkamut „Guds evige forsæt . . .“-imut saqqummiusseriaatsimik naatsumik matuminnga siunnersuisup eqqaavaa sukkulluunniit oqaluussinermi atuakkap neqeroorutigisarnera kinguneqarluartartoq:
◼ „Kutaa, . . .-mik ateqarpunga. Inuit amerlanersaat inuunerminni anguniagaqartarput, angunissaalu sulissutigisarlugu. Amerlasuut aamma piffissani aalajangersimasuni immikkut anguniagaqartarput. Illit anguniagaqarpit? [Pulaagaq oqaaseqartiguk.] Atuakkami matumani takutinneqarpoq Guuti naassaanngitsumik siunertaqartoq naammassiumaagassaminik. [Qupperneq 7, immikkoortoq 1 innersuutigiuk atuagarlu neqeroorutigalugu.]“