Ilaqutariit soraajuitsumik siunissaqalernissaannut ikiukkit
1 „Piumatussuseq peqqinnarpoq,“ niuertoq niuernermik højskolemi USA-mi ukioq kingulleq atuartunut taama oqarsimavoq. „Piumatuujusoqarsinnaavoq imminut iluarisimaajutigaluni.“ Tamanna siunissamik qulakkeeriniarluni imminuinnaq isumaginermik silarsuup siuarsaaneranut assersuutaavoq. Tamatumunnga akerliulluinnartumik Jesusip ajoqersorpaatigut ’imminik isumakkiissasugut . . . silarsuaq tamaat inuup pigileraluaruniuk, tarninili annaallugu’ iluaqutigissanngimmagu. (Mat. 16:24-26) Soraajuitsumik siunissaqarneq qulakkeerniarlugu Guutip piumasaanik iliorneq — ullumikkut ilaqutariit anguniagassaasa pingaarnersaat — inuunermi qitiutittariaqarpoq. (Tus. 143:10; 1 Tim. 4:8) Tusarliussaq tamanna atuakkami Ilaqutariittut pilluarneq isertugaateqarpoq-mi kapitalimi kingullermi erseqqissarneqarpoq. Atuakkap nutaap tamatuma inuunermi suup ilumut pingaartuuneranik ilaquttallu iluaqutissaannik qanoq iliorsinnaanerannik inuit paasitissavai. Oqaluussisartutut ’Ilaqutariinnut atuagaq’ taanna inunnut atuaqqullugu qanoq kajumissaarutigisinnaavarput? Aajuku siunnersuutit:
2 Saqqummiusseriaatsini tulliuttuni oqaatsit aallarniutit qungujulluni oqaatiginissaat pingaartorujussuuvoq. Ima oqarsinnaavutit:
◼ „Kutaa, . . .-mik ateqarpunga. Isertukkamik oqaluttuukkiartorlutit aggerpunga. [Nipangillatsiarneq] Atuakkami uani eqqartorneqarpoq. [Atuagaq takutiguk] Takunikuuiuk? [Atuagaq isaaguk.] Sapaatip akunneranit sivikinnerusumik ilaqutariittut inuunermut tunngasut tamaasa Biibilip akissutai pisinnaavatit. [Pulaakkat oqaaseqartiguk.] Atuagaq atuarusukkukku pisinnaavat. [Oqaaseqanngilaarneq.] Kingusinnerusukkut alakkaqqikkumaarpunga apeqqutissaqassagaluaruit.“
3 Pulaaqqiiguit ima aallarniillutit oqaloqatigiinneq immaqa nangissinnaavat:
◼ „Kutaa. Pulaaqqinnissannut qilanaarsimavunga. Neriuppunga ilaqutariittut inuuneq pillugu atuagaq pissarsiffigisimassagit. Atuakkap siunnersuutai qanoq isumaqarfigaagit? [Pulaakkat oqaaseqartiguk.] Ersarippoq ilaqutariittut pilluarluni inuussagaanni tamarmik sulissutiginnittariaqartut. Paasisimavarpulli ulluinnarni Guuti ilaatikkutigu ajornarpallaanngitsoq. Amerlasuut Guutimut tunngasut paasilluarsimanngilaat. Guuti kinaava? Ilinnut uannullu suna piumasaraa? Qanoq ililluta nalunngissinnaavarput sumik piumasaqarfigineraatigut? Tamakkuninnga imminut aperinikuusimavit? [Pulaakkat oqaaseqartiguk.] Akissutit Biibilimiipput, atuagassiaaqqallu uuma oqaatigilluarpai. [Atuagassiaaraq Guutip sumik piumaffigaatigut tigujuk quppernermilu 3-mi immikkoortoq 1 atuarlugu.] Malugiuk apeqqutit pingasut siullersaat immikkoortumi akineqarmat? [Pulaakkat akissuteqartigut.] Apeqqutit aappaata pingajuatalu akissutaat aamma tusarusukkukku immikkoortut tullii marluk atuarsinnaavavut. Massakkut piffissaqarpit?“ [Piffissaqanngippat piffissamik kingusinnerusumik isumaqatigiigitsi, atuagassiaararlu tunniuguk.]
4 Ataataasoq anaanaasorluunniit naamattoorukkit siunnersuut una atorsinnaavat:
◼ „Inunnik ilaqutariittut inuunerup iluani angusaqarluarusuttunik ujarlerpunga. Ilaqutariinnik nukittuunik ineriartortitsissagaanni suna pisariaqarsoraajuk? [Akinissaa utaqqiuk.] Ilumoorpoq siunnersuutit isummallu amigaatiginnginnatsigik. Isumaqarpugulli ilaqutariittut pilluarnerup isertugaataa qangali isertugaataasoq, ukiut 2000-ingajaat matuma siorna Biibilimi allanneqarsimasoq. Biibilip unnersuussutaasa ilaat atuakkami uani allassimapput. [Atuagaq takutiguk.] Atuakkap siunertarisaanik taaneqarsinnaasoq takutilaarlara. [Qupperneq 10 qupperuk, immikkoortullu 17-p naggataa tungaa atuaruk.] Atuakkap sammisai qanoq isumaqarfigaagit? [Pulaakkamut atuagaq isaaguk, tusarnaarluarlutillu.] Atuagaq atuarusukkukku pisinnaavat. Aggeqqikkumaluunniit tigoqqiinnarsinnaavara.“ [Pulaarneq naggaseruk.]
5 Ullualunnguit qaangiuttut, kingusinnerpaamilluunniit sapaatip akunnera ataaseq qaangiuttoq, aggeqqikkuit immaqa imatut oqarsinnaavutit:
◼ „Pulaaqqinnissat pissanngatigisimavara. Neriuppunga atuarsimasatit pakatsissutigisimassanngikkitit. [Akinissaa utaqqiuk.] Kapitalit aappaat ataqqeqatigiinnerup aapparmut asanninnermut ilaaneranik eqqartuisoq uanga nammineq assut nuannaraara. Imaanngila ataqqeqatigiinnginnerup ajornartorsiuterpassuit pilersittarai? [Akinissaa utaqqiuk.] Atuagaq ilaqutariinnut ilinniutitut oqaatigineqarsinnaavoq. Ilaqutariinnulli tamarmiusunut neqeroorutigaarput Biibilimik pikkorissarneq nalunaaquttap akunneri 20-t missaanni sivisussusilik atuagaq pissanganartumik ima atilik Ilisarsineq inuunermut naassaanngitsumut sammisoq atorlugu. Assiliaq una qanoq isumaqarfigaajuk? [Assiliaq quppernerni 4-mi aamma 5-imiittoq takutiguk tusarnaarluarlutillu.] Pissutsini taamaattuni ilaqutariittut inuunissaq nuannerunanngila? [Akinissa utaqqiuk.] Pikkorissarnermut atuagaq qanoq aaqqissorneqarsimasoq takutilaarlara. [Qupperneq 9 qupperuk. Immikkoortoq 11 atorlugu atuagaq qanoq atuaqqissaaqatigiissutigineqartartoq takutiguk.] Ilaquttatillu soqutigisinnaavisiuk?“ [Angerpat piffissamik nutaamik isumatigiigitsi. Naaggaarpat atuagaq neqeroorutigiuk, pulaarnerlu inussiarnersumik naggaserneqarluni.]
6 Saqqummiusseriaaseq naannerusoq, toqqaannarnerusoq qiimarpasinnerusorlu atorusunnerugukku siunnersuut tulliuttoq misilissinnaavat:
◼ „Kutaa. Ullumikkut aggerpunga atuagaq innuttaaqatigiinni ajornartorsiutaanerpaasut ilaannik eqqartuisoq takutinniarlugu. Sunaanersoq isumaqatigiissutiginerparput? Illit sunaatippiuk? [Pulaakkat akissuteqartiguk. Tusarnaaqqissaarit atuagarlu takutiguk.] Ilaqutariit avissaartuunnerat ajornartorsiutaavoq annertooq kisimmiittunik pilersuisunik, ilaqutariinnik avissaartorsimasunik meeqqanillu isumagineqanngitsunik kinguneqartoq. Isumaqanngilatit tamanna ullumikkut innuttaaqatigiinni ajornartorsiutaasoq? [Pulaakkat akissuteqartiguk.] Atuakkap imaasa allattorneri takulaariakkit. [Nipangersimalaarit.] Apeqqutinik oqaloqatigiissutissanik atuagaq imaqarpoq. Siunnersuutai tamarmik Biibilimit tigusaapput. Uanimi allassimasup ilumoornera upperaarput. [Jes. 48:17 atuaruk oqaaseqarfigalugulu.] Atuagaq atuarusukkukku pisinnaavat. Tullianik aggeruma qanoq isumaqarfiginerit tusarusuppara.“
7 Tullianik aggeruit oqaloqatigiinneq ima nangissinnaavat:
◼ „Kutaa. Kingullermik maaniikkamali atuagaq naallugu atuarsimassagunanngilat, quppernermili 27-mi takutitaqalaarusuppunga. [Pulaakkat oqaloqatigiinnermut peqataalersiuk nipangersimalaarnikkut.] ’Matuersaatit’ marluk eqqartorneqarput. ’Matuersaat’ siulleq tassaavoq asanninneq, Biibilillu asanninnerit assigiinngitsut sisamat eqqartorpai. ’Matuersaatit’ aappaat tassaavoq ataqqeqatigiinneq. Minuttinik qulinik piffissaqaruit taakku marluk sammisinnaavavut.“ [Immikkoortoq 3-miit 10 ilanngullugu sammikkit, pulaaqqinnissamullu isumaqatigiissuteqarit. Pingaarpoq isumaqatigiinnertut minuttit qulinnaat atorneqarnissaat.]