Naalagaaffiup Nutaarsiassaatai-sa kingorna soqutiginninneq malittariuk
1 Sapaatit-akunnerini kingullerni Naalagaaffiup Nutaarsiassaatai nr. 35-p „Inuit tamarmik qaquguluunniit asaqatigiissinnaalissappat?“-mik qulequtallip agguaannera nuannaarutigisimavarput. Tamatumunnga qinngaqqunnanngitsut sapinngisamik amerlanerpaat naqitaaqqamik tamatuminnga agguarniarlugit oqaluussisartut suliniarsimapput. (Mat. 10:11) Pilersaarutit naapertorlugit suliniuteqarneq immikkut ittoq sapaammi 16. novembari naassaaq, oqaluussisarfiilli tamakkerneqarsimanngippata immaqa utoqqaanertanit qinnuigineqarsinnaavusi Naalagaaffiup Nutaarsiassaatai nr. 35-nik peqartillusi agguaassineq ingerlatiinnaqqullugu.
2 Naqitaaraq amerlasuunik soqutiginnilersitsisimavoq. Soqutiginnilerlaat takusinnaavaat asanninneq pissusissamisoortoq inuit nalinginnaasumik pigiunnaarsimagaat, taamaattumillu siunissaq sumik nassataqassanersoq eqqarsaatigalugu. (2 Tim. 3:3) Soqutiginninneq pilersimasoq tamanna malittarissavarput.
3 Naalagaaffiup Nutaarsiassaatai atorlugu sulineq inerititaqarpoq: 1995-imi naqitaaqqat atorlugit immikkut suliniuteqarnermi arnaq naqitaaqqamik taama ittumik pisimavoq, naalagaaffilersaartarfimmilu ataatsimiinnermut takkulluni Jehovap Nalunaajaasuisa upperisaat ilinniarnerorusukkamiuk. Ataatsimiinnermi Biibilimik atuaqqissaaqateqarnissaminut akuersivoq, taamanerniillu ataatsimiinnerit tamangajalluinnaasa najuuffigisimallugit. Sivitsunngitsoq oqaluffeqarfimmut ilaasortaaffigisaminut allappoq ilaasortaajunnaarnini nalunaarutigalugu.
4 Maannakkut oqaluussisarfinni inuit amerlasuut Nalagaaffiup Nutaarsiassatai nr. 35 atuareersimavaat. Qanorli qisuariarsimappat? Naak ilaat immaqa ajunngitsumik qisuariaraluarlutik iliuuseqaqqinnavianngillat Jehovap nalunaajaasuinik pulaartoqaqqinngikkunik. Pulaaqqiinissat pilersaarusioreerpiuk? Tullitsinnut asannittumik soqutiginninnitta taamaaliornissatsinnut kajumissisittariaqarpaatigut. Naalagaaffiup Nutaarsiassaatai-nik soqutiginninnermik ersersitsisut tamarmik pulaaqqinneqartariaqarput.
5 Pulaaqqiiguit qanoq oqassavit: Immaqa naqitaaqqami tusarliussap ilumuussusia oqaaseqarfigeqqaalaassavat taavalu eqqarsalersitsisunik apeqquteqarlutit. Pulaakkap oqaaseqarnerani tusarnaaqqissaarit, taamaalillutit qanoq isumaqarnersoq paasikannissagakku. Taava eqqarsaatinik tulluartunik Guutip sumik piumaffigaatigut?-meersunik, naqitaaqqami eqqaaneqartumeersunik, innersuussigit. Pulaakkat ajunngitsumik qisuariarpat ingerlaannaq atuaqqissaaqatitaariniarsinnaavat.
6 „Naalagaaffiup Nutaarsiassaatai“ nr. 35-mik soqutiginninnermik ersersitsisimasunik pulaaqqiiguit saqqummiussinissamut siunnersuutit tulliupput:
◼ „Eqqaamajunnarsivat qanittukkut naqitaaraq ilinnut tunniussara. Oqariartuutaa ullumikkut inuit akornanni avissaartuunnermut pissutaaqataasumut attuumassuteqarluinnarpoq, tassa allanut asanninnermik amigaateqarnermut.“ Naqitaaqqami quppernermi 2-mi qulequttap „Sooq tullermut asanninneq nillertunngorsimava?“-p ataani nalunaajaatinut saqqummiunneqartunut uparuussigit. Taava ima aperigit: „Isumaqarpit Guutip siunertarisimagaa inuit taamaassasut?“ Pulaakkat akitiguk. Taava Guutip sumik piumaffigaatigut?-mi ilinniagassaq 5 qupperuk Biibilimillu atuaqqissaaqatigisalerniarlugu.
◼ „Siullermik naapikkatta ’Inuit tamarmik qaquguluunniit asaqatigiissinnaalissappat?’-mik qulequtalimmik tunivakkit. Isumaqarpit neriuut tamanna piviusorsiortuusoq?“ Pulaakkat akitiguk. Guutip sumik piumaffigaatigut?-mi ilinniagassaq 6 qupperuk immikkoortorlu 6 atuarlugu. Taava Mika 4:3, 4-mi Guutip neriorsuutaa atuaruk. Pulaakkat soqutiginnippasippat, atuagassiaaraq Biibilimillu atuaqqissaaqatigisalernissaa neqeroorutigikkit.
◼ „Kingullermik maaniikkama naqitaaqqamik ’Inuit tamarmik qaquguluunniit asaqatigiissinnaalissappat?’-mik qulequtalimmik qimatsivigaakkit. Angerlarsimaffimmi akeqanngitsumik Biibilimik atuaqqissaartarneq tassani neqeroorutigineqarpoq. Maanna maaniippunga ikiuut Biibilimik atuaqqissaarnermi atortagarput takutinniarlugu. [Atugaq ’Ilisarsineq’ takutiguk.] Atuakkami tassani erseqqissumik takutinneqarpoq qaqugu inuit tamarmik imminnut asalerumaartut, apeqqutillu immaqa eqqarsaatigineqartartut imaattut akineqarput: Sooq utoqqalisarlutalu toqusarpugut? Sooq naalliunnartut atuunnerat Guutip akueraa? Asasavut toqusimasut sumiippat? Atuaqqissaartarneq qanoq ingerlasarnersoq naatsumik takutilaarlara.“ Pulaakkat piumanngippat aperisinnaavat nammineerluni atuagaq atuarusunneraa. Piumappat atuagaq tunniuguk. Aggeqqinnissat pilersaarusioruk.
7 Oqaluussisarfiit Naalagaaffiup Nutaarsiassaatai nr. 35 atorlugu oqaluussiffigilluarneqareerpata qaammatip sinnerani atuagaq ’Ilisarsineq’ neqeroorutigineqarsinnaavoq. Atuakkamik tamatuminnga saqqummiusseriaatsit assigiinngitsorpassuit Naalagaaffimmut kiffartorneq-mi normuni ukunani nassaarineqarsinnaapput: decembari 1995, marsi, juuni aamma novembari 1996 aamma juuni 1997.
8 Naalagaaffiup Nutaarsiassaatai-nik immikkut agguaassinerup tamatuma oqaluussinitsinni tamatta aallussilluarnerulernissatsinnut kajumissisittariaqarpaatigut. Jehovap ikiuineratigut qularutigissanngilarput suliniuteqarnerup tamatuma kinguneqarluarnissaa, inuit sumi tamaani takunnissinnaalersillugit Guutip piumasarigaa inuit imminnut asaqatigiissasut. Naalagaaffiup Nutaarsiassaatai-sa kingorna soqutiginninnermik malittarinninnitsinni ilungersornivut qanortoq Jehovap pilluaqqujuarligit.