Atuagassiaaraq Tusagassat nuannersut Guutimeersut! qanoq atorneqassasoq
Atuagassiaaraq nutaaq pulaaqqiinissamut atuaqqissaaqateqalernissamullu suliarineqarsimasoq
1. Ataatsimeersuarnermi “Uummatit paariuk!”-mi atuagassiaaraq suna pulaaqqiinissamut atuaqqissaaqateqalernissamullu saqqummersinneqarsimava?
1 Atuagassiaaraq nutaaq ataatsimeersuarnermi “Uummatit paariuk!”-mi pisarput pulaaqqiinissamut atuaqqissaaqateqalernissamullu iluaqutissarput nuannaarutigeqaarput. Atuagassiaaraq Tusagassat nuannersut Guutimeersut! atuagassiaaqqamut Guutip sumik piumaffigaatigut?-mut taartaasoq assinguvoq, ilinniagassat naatsunnguullutik. Taamaattumik atuagassiaaraq matumi atuaqqissaaqateqarnermi atorneqarnissaanut tulluartuuvoq. Atuagassiaaqqami Guutip sumik piumaffigaatigut?-mi kristumiunut piumasaqaatit, nutaanut akuerissallugit ajornakusoorsinnaasut allaaserineqarsimapput, atuagassiaaqqamili nutaami tusagassat nuannersut Biibilimeersut pingaarnerutillugit sammineqarput. — ApS 15:35.
2. Sooq atuagassiaaraq Tusagassat nuannersut Guutimeersut! sananeqarsimava?
2 Sooq sananeqarsimava? Sallusuissut inunnut soqutinartunngortinniarlugu atuagarlu Biibilimi ajoqersuutigineqartut Biibilimik atuaqqissaaqateqarnermi pingaarnerpaaq atorlugu atuaqqissaaqateqalernissamut aqqutissiuisussamik qatanngutit nunanit tamaneersut ujartuisimammata. Inuit atuakkamik atuarnissaminnut merserisaqartut atuagassiaaraq atorlugu Biibilimik atuaqqissaarnissaminnut kajuminnerusarput. Atuagassiaaqqap oqaatsinut amerlasuunut nutseruminarnerujussuunera tamatumunnga aamma pissutaavoq.
3. Atuagassiaaraq taanna Biibililersaarutinit allanit qanoq allaanerua?
3 Qanoq aaqqissuunneqarsimasoq: Biibilersaaruterpassuaativut allanik ikiorteqanngikkaluarluni atuarneqarsinnaanngorlugit, aamma sallusuissut paasineqarsinnaanngorlugu allanneqarsimapput. Atuagassiaaraq una allaaneruvoq. Biibilimik atuaqqissaarnermi ilitsersuutitut aqutsisoqartillugu atugassatut allanneqarsimavoq. Taamaattumik tunniukkutsigu immikkoortoq ataaseq marlulluunniit atuarlugillu sammineqarunik ajunnginnerussaaq. Immikkoortut naatsunnguupput matumi suliffeqarfimmiluunniit sammineqarsinnaasut. Atuagassiaaqqami immikkoortoq siulleq aallarniutigissallugu ajunnginnerusaraluartoq, suminngaanniilluunniit aallartilluta atuaqqissaaqateqalersinnaavugut.
4. Atuagassiaaraq Biibiliminngaanniit toqqaannartumik ilinniartitsinissatsinnut qanoq iluaqutigaarput?
4 Biibililersaarutitsinni amerlasuuni apeqqutinut aallassimasunut akissutit immikkoortuni nassaarineqarsinnaapput. Atuagassiaaqqamili uani akissutaat amerlanertigut Biibilimi nassaassaapput. Inuit amerlanerit Biibilimiit ilikkagaqarusunnerupput atuagaatitsinninngarnit. Taamaattumik allassimaffinnit innersuussutigineqartunit ikittuinnaat issuarlugit allanneqartarput. Innersuussutigineqartut nammineq Biibilimi atuarneqartariaqassapput. Taamaalillutik atuaqqissaaqatigisartakkat ilikkartarpaat ajoqersuutip Guutiminngaanneersuunera. — Es 54:13.
5. Sooq atuaqqissaaqateqarnissamut aqutsisup tamatigut piareersarluartarnissaa pingaaruteqarpa?
5 Allassimaffiit tamakkerlugit atuagassiaaqqami nassuiarneqanngillat. Sooq? Atuaqqissaaqatigisartakkap apeqquteqartarnissaanut kajumissaarutitut aamma aqutsisup ilinniartitsinermut piginnaasaata atorneqarnissaanut sanaajuvoq. Taamaattumik atuaqqissaaqateqarnissamut tamatigut piareersarluarsimanissaq pingaaruteqartorujussuuvoq. Sissuigassaq: Oqaluppallaarniaqinak. Allassimaffiit nassuiassallugit nuannarisaqaarput. Allassimaffilli qanoq paasineraa atuaqqissaaqatigisartagaq nammineq nassuiaatikkutsigu angusaqarluarnerussaagut. Isumatusaartumik apeqquteqartarnikkut allassimaffiit tamarmik immikkut qanoq isumaqarnersut tunngavilersuinissaanut ikiorsinnaavarput. — ApS 17:2.
6. Atuagassiaaraq qanoq atorsinnaavarput: (a) inuit Guuti Biibililu qularippatsigik? (b) illumiit illumut oqaluussinermi? (c) atuaqqissaaqateqalerniarluni toqqaannartumik neqeroornermi? (d) pulaaqqiinermi?
6 Qaammammi suna neqeroorutaanersoq apeqqutaatinnagu atuagassiaaraq taanna, Biibililersaarutit atuaqqissaarutigisartakkavut assigalugit, qaqugukkulluunniit neqeroorutigineqarsinnaavoq. Amerlasuut matumi atuaqqissaaqateqalerniarnissamut toqqaannartumik neqeroorutigissallugu iluarissaqaat. Tamatuma saniatigut ataatsimeersuarnermi oqaatigineqartutut, soqutiginnittumut uteqqinnikkut, pulaaqqiineq pissanganartunngortissinnaavaa. — Takukkit ungalusat qupp. 5-7.
7. Atuagassiaaraq atorlugu atuaqqissaaqateqarneq qanoq ingerlanneqassava?
7 Atuaqqissaarneq qanoq ingerlanneqassasoq: Apeqqutit ersarissunik naqinnillit normulersorsimasut aallarniutigisinnaavatit. Taava immikkoortoq allassimaffiillu uingasunik naqinnillit atuakkit. Allassimaffiit qanoq paasisariaqarnersut pulaagaq paasitinniarlugu isumatusaartumik allanik apeqquteqarit. Atuagarsi pulaakkap iluamik paasisimaneraa qulakkeerniarlugu, tullianut ingerlaqqinnginnermi, apeqqut ersarissumik naqinnilik uteqqiguk. Pulaarnerni siullerni apeqqut ersarissumik naqinnilik ataasiinnaq sammigussiuk ajunnginnerussagunarpoq. Piffissap ingerlanerani immaqa ilinniagassaq tamakkerlugu sammisinnaalissavarsi.
8. Allassimaffiit innersuussutigineqartut pillugit qanoq oqartassaagut, aamma sooq?
8 Apeqqummut ersarissumik naqinnilimmut allassimaffiit atuaqquneqartut toqqaannartumik akissutaapput. Pulaagaq isumaqaleqqunagu inuinnaat oqaasii atuaritit, allassimaffik innersuussutigigaangakku oqarnaveersaartassaatit “apustili Paulusi allappoq” imaluunniit “maluginiaruk Jeremia qanoq siulittuisoq”. Pitsaanerussaaq oqassalluni “Guutip oqaasiani allassimavoq” imaluunniit “Biibilimi siulittuut maluginiaruk”.
9. Atuaqqissaarnermi allassimaffiit innersuussutigineqartut tamarmik atuarneqartassappat?
9 Allassimaffiit innersuussutigineqartut tamaasa imaluunniit allassimaffiit atuaqquneqartut kisiisa atuartassavavut? Pissutsit apeqqutaapput. Allassimaffiit tamarmik innersuussutigineqarsimammata pissutissaqarluarpoq. Allassimaffiit tamarmik oqaloqatigiissutigineqarluarsinnaasunik imaqarput. Atuaqqissaaqatigisartagarli piffissaqarpianngippat imaluunniit soqutiginninnera atuarsinnaaneraluunniit killeqarpata allassimaffiit atuaqquneqartut kisiisa atuarneqarsinnaapput.
10. Qaqugukkut atuakkamut Biibilimi ajoqersuutigineqartut-mut ikaarsaartoqassava?
10 Qaqugukkut atuakkamut Biibilimi ajoqersuutigineqartut-mut ikaarsaartoqassasoq: Arlaleriarluni atuaqqissaareerpat atuaqqissaarnermillu sungiussereerpat, atuakkamut Biibilimi ajoqersuutigineqartut-mut ikaarsaartoqarsinnaavoq imaluunniit atuagassiaaqqap Tusagassat nuannersut Guutimeersut! naammassinissaata tungaanut atuarneqarsinnaavoq. Qaqugu ikaarsaartoqassanersoq oqaluussisartup nalilissavaa. Atuakkamut Biibilimi ajoqersuutigineqartut-mut ikaarsaarutta, aallaqqaataaniit atuarlugu aallartissavarput? Malittarisassiaqanngilaq, inuimmi tamarmik assigiinngitsuupput. Atuaqqissaaqatigineqartulli amerlanersaasa atuagaq Biibilimi ajoqersuutigineqartut annikitsualuttortai ilanngullugit sammeriikkat uteqqinneqarneri iluaqutigissavaat.
11. Sooq atuagassiaaraq nutaaq atorluartariaqarparput?
11 Silarsuarmi nutaarsiassanik nuannersunik akuttusuunik tusarfiusartumi, tusagassamik nuannersumik oqaluussissutiginninnerput pisinnaatitaafferujussuuvoq — Guutip naalagaaffia aqutsivoq silarsuassarlu nutaaq naapertuilluarfiusoq piviusunngortingajalerlugu. (Matt 24:14; 2 Petr 3:13) Qularutiginngilarput matuminnga tusartut isumassarsisitaalluni allatat uku isumaqataaffigissagaat: “Qaqqani takusap ila takorannissusia: pisuinnarluni aggerpoq nutaarsiassanik nuannersunik tusarliisoq, eqqissinissamik oqaluussisoq, pitsaanerusut pillugit nutaarsiassanik nuannersunik tusarliisoq, annassummik oqaluussissutiginnittoq, Zionimut oqartoq: ‘Guutit kunnginngorpoq!’” (Es 52:7, NW) Qanortoq atuagassiaaraq nutaaq angalaarfigisartakkatsinni qilalersunut atorluarisigu!
[Qupp. 5-mi ungalusaq]
Inuit Guuti Biibililu qularippatsigik:
● Sumiiffiit ilaanni oqaluussisartut misigisimavaat oqaatsit “Guuti” aamma “Biibili” atoraangatigik oqaloqatigiinneq unittartoq. Taamaattoqarpat, pulaarnermi siullermi ilissi angalaarfigisartakkassinni ajornartorsiutaasut aallarniutigisinnaavasi, assersuutigalugu naalagaaffimmik pitsaasumik pisariaqartitsineq, siunnersuutit atoriaannaasut ilaqutariinnut iluaqutaasinnaasut aamma siunissaq qanoq nassataqarumaarnersoq. Guuti piunersoq aamma sooq Biibili tutsuinartuunersoq qanoq paasineqarsinnaasut eqqaariarlugit immaqa atuagassiaaraq Tusagassat nuannersut Guutimeersut! ilisaritissinnaavarput.
[Qupp. 6-mi ungalusaq]
Illumiit illumut oqaluussinermi:
● “Guutip inuit pillugu siunertaa qanoq ajornanngitsigisumik paasineqarsinnaasoq takutikkusullugu kasuttorpunga. Naalliuutitsinnik Guutip aniguisikkumassaneraatigut eqqarsaatiginikuuiuk? [Akissutaa tusarnaaruk]. Akissutaa Biibilimi sumi nassaarisinnaanerit atuagassiaaqqami uani takutinneqarpoq. [Atuagassiaaraq tunniuguk ilinniagassamilu 1-imi immikkoortoq siulleq, aamma Jeremia 29:11 atuarlugit]. Una tunngavigalugu isumaqarpit Guuti uagutsinnut ajunnginnerusumik siunissaqartitsisoq? [Akissutaa tusarnaaruk]. Kissaatigigukku una tigummiinnarsinnaavat. Apeqqut ‘Guutip qanoq ililluni inuit naalliuutaannut pissutaasut piissavai?’ Biibilimi qanoq akissuteqarnersoq paasiniarlugu tulliani aggeqqikkuma immikkoortoq 2-mi sammissavarput.” Pulaagaq piffissaqarpasippat immikkoortup tullia sammisinnaavarsi allassimaffiillu pingasut atuarlugit. Ilinniagassami apeqqutip aappaata samminissaanut pulaaqqinnissannik isumaqatigiissuteqarfigiuk.
● “Inuit, pingaartumik ajornartorsioraangamik, Guutimut qinusarput. Illit qinusarpit? [Akissutaa tusarnaaruk]. Qinnutit tamaasa Guutimit tusarneqartarsoraagit, imaluunniit qinnutinik iluarinngisaqarpa? [Akissutaa tusarnaaruk]. Apeqqutit taakku Biibilimi qanoq akineqarnersut atuagassiaaqqami uani takusinnaavatit. [Atuagassiaaraq tunniuguk ilinniagassamilu 12-imi immikkoortoq siulleq sammillugu allassimaffiillu atuaqquneqartut atuarlugit.] Guutip qinnutitsinnik tusaarusuttarnera nuanningaarami, ilaa? Qinuneq iluaqutigilluassagutsigu Guuti ilisarisimaluartariaqarparput. [Ilinniagassaq 2-mut qupperit qulequtaaqqallu takutillugit]. Kissaatigigukku atuagassiaaraq una tigummiinnarsinnaavat ullorlu alla apeqqutit taakkua akissutaat Biibilimi atuarsinnaavavut.”
● “Inuit silarsuup qanoq pinissaa ernumassutigaat. Pissutsit pitsaanerulissasoraagit? [Akissutaa tusarnaaruk]. Biibilimi inunnut nuannersunik neriuuteqartitsinera inuppassuit tupigusuutigisarpaat. Aajuku apeqqutit ilaat Biibilimi akineqartut.” Atuagassiaaraq tunniuguk tunuaniittunillu apeqqumik soqutiginartitaanik toqqaatillugu. Ilinniagassaq toqqagaa qupperuk qanorlu atuaqatigiittoqartarnersoq takutillugu. Ilinniagassami apeqqut tulliuttoq samminissaanut pulaaqqinnissannik isumaqatigiissuteqarfigiuk.
[Qupp. 7-mi ungalusaq]
Toqqaannartumik neqeroorneq misiliguk:
● “Biibilimik atuartitsineq nutaaq takutikkumallugu saaffigaakkit. Atuagassiaaqqami uani 15-inik ilinniagassartalimmi apeqqutit pingaarutillit akissutaat Biibilinni sumi atuarsinnaagitit takutinneqarput. [Saqqaa tunualu takutikkit]. Biibili paasiniarnikuuiuk? [Akissutaa tusarnaaruk]. Ilinniagassat qanoq paasiuminartiginersut takutilaarlakkit. [Ilinniagassaq 3-mi apeqqutit pingajuanni immikkoortoq siulleq sammisiuk taavalu Saqqummersitat 21:4, 5-ilu atuarlugit. Tulluarpat, immikkoortup tullianut ingerlaqqigitsi allassimaffiillu atuaqquneqartut atuarlugit]. Atuagassiaaraq perusukkukku pisinnaavat. Minnerpaamik ataasiarlutit atuaqqissaarneq misileriassagit. Nuannarigukku ingerlaqqissinnaavugut. Tulliani aggeqqikkuma ilinniagassaq siulleq sammisinnaavarput. Maluginiaruk qupperneq ataasiinnaasoq.”
[Qupp. 7-mi ungalusaq]
Pulaaqqiinermi neqeroorutigiuk:
● Soqutiginninnermik ersersitsisimasumut pulaaqqiinermi oqarsinnaavugut: “Nuanneqaaq takoqqillutit. Atuagassiaaraq apeqqutinik soqutiginartorpassuarnik Biibilillu akissutaanik imalik nassarpara. [Atuagassiaaraq tunniuguk tunuaniittullu takutillugit]. Qulequttat ukua arlaat soqutiginarnerutippiuk? [Toqqagaa qupperuk]. Biibilip akissutaa nassaariniarlugu atuagassiaaraq qanoq atorneqarsinnaanersoq takutilaarlara”. Qanoq sammineqartarnersoq takutinniarlugu immikkoortoq ataaseq marlulluunniit allassimaffiillu atuaqquneqartut sammisigit. Biibilimik atuaqqissaaqateqarnermik aallartitsineq ila ajornanngissusia! Atuagassiaaraq tunniuguk aggeqqinnissanillu isumaqatigiissuteqarfigalugu. Ilinniagassaq naammassigussiuk ilinniagassaq alla pulaakkap toqqagaa aallaqqaataanniilluunniit aallartissinnaavarsi.