Naalakkap pigisai nakkutigineqarluarput

¹ Biibilip nalaani pilittat akisussaassuseqarnartumik atorfinitsinneqartarsimapput. Abrahamip kiffani peqqusimavaa Isak nuliassaanik ujaasiutissagaa. (1 Mos. 24:1-4) Kiffaq ilumut annertuumik akisussaaffilerneqarpoq Abrahamip kinguaassaasa ingerlajuarnissaannik qulakkeerisussamik. Tamaattumik apustili Paulus oqarsimavoq: ’Pilittat piumaffigineqartarput ilumuussasut.’ — 1 Kor. 4:2.

Kristumiutut ’pilittaaneq’

² Biibilimi oqaluussineq ilaatigut ’pilittaanertut’ allaatigineqarpoq. Apustili Paulusip assersuutigalugu Efesusimiut allaffigisimavai ’Guutip saammaanneranik inoqutigiissuni atortitassamik uannut pisitaasumik ilissinni atorteqqullugu’. (Evf. 3:2; Kul. 1:25) Inuiaqatigiinnut nutaarsiassamik nuannersumik oqaluussinissamik suliassani pilittatut suliassatut aalajaalluni naammassisariaqakkamisut isigisimavaa. (ap. sul. 9:15; 22:21) Apustili Peter qatanngutiminut tanitaasunut allassimavoq: ’Illusisitsisaqatigiigitsi oqalorujunnasi; nungullusi saammaannermit tunissut pisarsi missiliorlugu kiffartuuteqatigiigitsi Guutip saammaassisarnerinik tamalaanik pilittaasutut ajunngitsutut.’ (1 Pît. 4:9, 10; Epr. 13:16) Kristumiut ukiuni hundredelinni siullerni inuusut pigisaat tamarmik Jehovap ajunngingaassusianik pissuteqarsimapput. Tamaattumik pigisanut tamakkununnga pilittaapput atorluaasariaqarlutillu.

³ Jehovap nalunaajaasui ullumikkuttaaq taama isiginnittaaseqarput. Jehova Guutimut tunniulluinnarsimapput, pigisatillu tamaasa — inuunertik, nukitik, pigisatillu — ’Guutip saammaassisarnerisut tamalaatut’ isigaat. Pilittatut ajunngitsutut Jehovamut akisussaaffeqartutut misigipput tamakkua atorsinnaanerat eqqarsaatigalugu. Saniatigut nutaarsiassamik nuannersumik ilisarsisimapput. Tamannalu erlinnartutut atorluarniartariaqakkamissut isigaat, tassa Jehovap aqqa illernarsisinniarpaat aammalu allat sallusuissummik ilisarsinissaannik ikiorlugit. — Mat. 28:19, 20; 1 Tim. 2:3, 4; 2 Tim. 1:13, 14.

⁴ Jehovap nalunaajaasuisa pilittatut akisussaaffitsik paarilluarsimavaat? Taamaannera ukiumoortumik nalunaarusiami takuneqarsinnaavoq, tassami ukiumi kingullermi ’nutaarsiassap nuannersup’ oqaluussissutiginerani nalunaaquttap-akunneri 1 milliardit atorsimavaat, soqutiginnittunillu 4,5 millioninit amerlanerusunik Biibilimik atuaqqissaaqateqartarsimallutik. (Mat. 24:14) Jehovap pilittaasa aalajaannerat aamma ersersimavoq nunarsuaq tamakkerlugu oqaluussinermut ilagiinnullu tunngatillugit tunisiumatuneratigut, nakkutilliilluni angalasartunut allanullu illusisitsisarneratigut, ajornartoortunullu, soorlu sakkulersorluni aaqqiagiinnginnerni eqqorneqartunut, asseqanngitsumik ilalaarneratigut. Kristumiut ilumoortut ataatsimut isigalugit Naalakkap pigisaanik ajunngitsumik nakutiginnipput.

’Ilumoorlunilu silaqarlunilu pilittaq’

⁵ Pilittatut suliaq inunnit ataasiakkaanit aammalu peqatigiiffimmit naammassineqartarpoq. Jesusip kristumiut tanitat nunamiittut ’ilumoorlutillu silaqarlutillu pilittanik’ taasimavai. (Lúk. 12:42) ’Pilittap ilumoortup taassuma akisussaaffigaa ’nerisassanik agguaassineq’ aammalu nutaarsiassap nuannersup nunarsuarmi tamarmi oqaluussissutiginerani siuuttuunissaq. (sar. 12:17) Tamatumunnga tungatillugu pilittat ilumoortut, Siulersuisoqatigiit ikiortigalugit, Guutimit akisussaassusilerneqarput pigisatigut anersaakkullu ’talantit’ isumagilluarnissaannut. (Mat. 25:15) Immikkoortortaqarfiit ’pilittap ilumoortup’ maligassiaa malinniarsarivaat tunissutillu tamaasa akisussaassuseqarlutik Guutip naalagaaffiata soqutigisaanut atorniartarlugit. Tunissutit tamakku tamarmik paarisassanngortitaapput, ’ilumoorlunilu silatuullunilu pilittap’ tamakkua tunisisup siunertaa naapertorlugu aammalu silatusaartumik, atorluaasumik kinguneqarluartumillu atorneqarnissaat isumagisariaqarpai.

⁶ Kajuminnermit tunissutit atorluarneqarsimanerannut takussutissaavoq Jehovap Nalunaajaasuisa naqiterisarnerata ukiuni hundrelinni makkunani annertusiartorsimanera. Biibilinik biibililersaarutinillu — atuagassianik, atuakkanik, atuagassiaaqqanik, naqitaaqqanik aammalu Naalagaaffimmik Nutaarsiassat-nik — ’ulluni kingullerni’ makkunani agguaassisarneq ’nutaarsiassap nuannersup’ oqaluussissutigineqarnerani pingaaruteqarluinnarsimavoq. (Mák. 13:10; 2 Tim. 3:1) Atuagassiaq Napasuliaq Alapernaarsuiffik sakkuuvoq pingaarutilik ’Guutip inoqutigisai’ taakkualu suleqataat, ’savallu allat’, ’amerlangaartut’ ’piffissaq eqqorlugu nerisassanik’ pisinnaaqqullugit. — Mat. 24:45; Evf. 2:19; sarĸ. 7:9; Juá. 10:16.

⁷ Aallaqqaammut atuagassiaativut naqiterivinni nalunaajaasut piginngisaanni naqiterneqartarsimapput. Kisianni 1920-kkunni Jehovap kiffai isummerput namminneq naqiterigunik pitsaanerussasoq anersaakkullu iluaqutaanerussasoq. 1920-mi naqiterisarneq Brooklynimi New Yorkimiittumi annikitsutigut aallartissimavoq, kisianni annertusiartorluni. 1967-imi naqiterivissuit tassaasimapput inissiarsuit sisamat. Peqatigiiffik aamma nunani allani naqiteriveqartarsimavoq, kisianni taakkua amerlanersaat sorsunnersuup aappaata ataani matuneqarsimapput.

⁸ Qanorsuarluunniit USA-mi naqiterineqaraluarpat, nunarsuaq tamakkerlugu pisariaqartitat matussuserneqarsinnaanngillat. Taamaattumik ukiuni sorsunnersuup kingornatigut nunani amerlasuuni naqiteriviit pilersinneqarput, soorlu Canadami, Danmarkimi, Tuluit Nunaanni, Grækenlandimi, Schweizimi, Afrikami Kujallermi aammalu Tysklandip kitaani. 1970-ikkut aallartinneranni Australia, Brasilia, Filippinerit, Ghana, Japan Nigerialu ilanngunneqarsimapput. Naqiteriviit tamakkua ilaanni atuakkanittaaq sanasarsimapput. Aamma tamatuma nalaani Atuarfimmi Gileadimi ilaat naqiterinermik ingerlatsinnermut ilinniartinneqarsimapput, aallartinneqarlutillu nunat taakkua ilaannut qatanngutit tassaniittut naqiterinermi ikiorsinnaaqqullugit.

⁹ 1980-kkut ingerlaneranni nunani 51-ini atuagassianik naqiteriveqarpoq.a Tamanna Naalakkap pigisaanut nakkutilliilluarnermut takussutissaalluarpoq! Nalunaajaataavortaaq kimittooq Guutip naalagaaffiata siuariartorsimaneranut, Jehovallu nalunaajaasuisa millionilikkuutaat kajumillutik tunisisimaneranut, taakkua ’Jehova ataqqinaaserusukkamikku pigisaminnik’. (Uss. 3:9) Taakku tassaapput Jehovap sutigut tamatigut pilluaqqusilluni pilersitaanut pilittaalluartut.

Pissutsit allangorput

¹⁰ 1970-ikkunni 1980-ikkullu aallartinneranni naqiterinermi teknikkikkut siuariarneqarsimaqaaq, Jehovallu nalunaajaasuisa naqitereriaatsit nutaaliat atortalersimavaat. Siornatigut atuakkanik naqiterineq nalinginnaasoq atortarsimagaluarpaat, kisianni piffissap ingerlanerani nutaanerusumut offset-mik taaneqartartumut nuukkiartuaarsimapput. Tamatuma kingunerisimavaa qalipaatinut marlunnut (qernertumut qalipaammullu allamut) taarsiullugit sisamat atalernerisigut kusanartunik assiliartalersuisoqalersinnaanera. Qarasaasianik atuisarnerup naqiterinnginnermi sulineq allanngortissimavaa. Jehovap Nalunaajaasuisa elektronikkikkut assiliinikkut oqaatsinut assigiinngitsunut naqitigassanik ilioqqaaneq MEPS-imik taagutilik (Multilanguage Electronic Phototypesetting System) pilersippaat, tamannalu iluaqutigalugu atuagassiaativut massakkut oqaatsinut 370-init amerlanerusunut saqqummersinneqartarput. Qarasaasiat allat MEPS-itulli oqaatsinik taama amerlatigisunik atuisinnaanngillat.

¹¹ Qujanartumik MEPS aammalu atortorissaarutit allat, assersuutigalugu elektronikikkut nassitsineq, imaluunniit e-mail, atulerneqarnerisigut siuariarneqarsimavoq ’nerisassanik piffissakkut eqqortukkut’ siaruarterissutaasinnaasumik. Teknikki nutaannginnerusoq atorneqarallarmat, allaaserisat tuluttuujunngitsut qaammaterpaaluit tuuluttuut saqqummersinneqarnerata kingorna, ilaatigut allaat ukioq ataaseq qaangiukkaangat, saqqummersinneqartarsimapput. Ullumikkut Napasuliaq Alapernaarsuiffik oqaatsinut 115-inut ataatsikkut saqqummersinneqartarpoq, Iteritsi!-lu oqaatsinut 62-inut. Tamanna isumaqarpoq Jehovap nalunaajaasuisa 95 procentiisa Napasuliaq Alapernaarsuiffik-mi allaaserisat aalajangersimasut ataatsikkut atuaqqissaaqatigiissutigisaraat. Siuariarneq annertooq tamanna nuannaarutigeqaarput! Ersarippoq teknikkikkut nutaalianik tamakkuninnga atuilersimaneq tassaasoq Naalakkap pigisaanik silatuumik nakkutilliineq.

Aaqqissuussaanikkut pisariaqartitat nutaat

¹² Naqiterinikkut suleriaatsit nutaat tamakku Jehovap Nalunaajaasuisa nunarsuaq tamakkerlugu naqiterisarnerannut allannguutaasimapput. Offset-rotation-imik naqiterisarneq atuakkanik naqiterivinnit pisoqaanerusunit sukkaneroqaaq, kisianni aamma akisuneroqaluni. Qarasaasiakkullu atortorissaarutit allannermut, atuagassianut aaqqissuinermut, nutserinermut, ilusilersuinermut aammalu titartaanernut atortakkat pisoqqaanerusunit pisinnaasaqarnerupput, kisianni aamma akisoorujussuullutik. Paasinarsivoq nunani 51-ni atuagassiat naqiterneqartarnerat imminut akilersinnaajunnaariartortoq. 1990-kunni ’pilittap ilumoorlunilu silatuup’ tamanna eqqarsaatigeqqippaa. Qanoq kingunilimmik?

¹³ Misissuinerit takutippaat ’pigisat’ Jehovap nalunaajaasuisa ikinngutaasalu tunissutigisartagaat pitsaanerusumik atorneqarsinnaasut naqiterineq ataatsimut katiterneqarpat. Taamaattumik naqiteriviit ilanngartorneqalerput. Tysklandimi atuagassiat allallu maannakkut naqiterneqartarput nunani Europap kangianiittuni kitaaniittunilu atugassat, ilaatigut siornatigut namminneq naqiterisarfeqarsimagaluartuni. Italiami naqiteriviup Afrikap ilaani aammalu Europap kujataata kangiani oqaluussisartut atuagassianik pilersorpai, ilaatigut Grækenlandimiittut Albaniamiittullu. Afrikami atuagassiat massakkut taamaallaat Nigeriami Afrikamilu Kujallermi naqiterneqartarput. Nunarsuaq tamakkerlugu tamatumunnga assingusumik pisoqarsimavoq.

Eqqarsaatigisariaqakkat

¹⁴ 1998-imi juulimi atuagassiaatitsinnik naqiterisarneq nunat ilaanni Europamiittuni, soorlu Danmarkimi, Frankrigimi, Grækenlandimi, Hollandimi, Schweizimi Østrigimilu unitsinneqareersimassaaq. Atuagassianik Europami atorneqartussanik naqiterisarneq Englandimi, Finlandimi, Italiami, Spaniami, Sverigemi Tysklandimilu immikkoortortaqarfinni isumagineqartassaaq. Qanoq ililluni aalajangerneqarsimava naqiteriviit sorliit atuinnassanersut sorliillu atorunnaassanersut? Naalakkap pigisaanik nakkutilliilluarniarluni ’pilittaq ilumoortoq’ peqqissaartumik nalilersuisimavoq naqiterinermut nassiussinermullu aningaasartuutit nunani pineqartuni qanoq innersut. Aammattaaq nunani pineqartuni inatsisit misissorsimavaat paasiniarlugu sumi naqiterisarneq agguaassinerlu inatsisit eqqarsaatigalugit ajunnginnerussanersoq.

¹⁵ Atorluaanissaq pissutiginerullugu naqiteriviit ilaat matuneqartariaqarsimapput naqiterinerlu ataatsimoortinneqartariaqarluni. Nunami ataatsimi nunanut amerlanerusunut atuagassianik naqiterisarneq atoruminarnerullunilu atorluaanarneruvoq atortussiat akisuut eqqarsaatigissagaanni. Maannakkut nunani aningaasartuutitigut appasinnerusuni, atortussianillu pissarsiaqarnissamik aammalu nassiussuinissamut ajornannginnerusuni, naqiterisitsisarneq ingerlanneqartarpoq. Taamaalilluni Naalakkap pigisai eqqortumik nakkutigineqartarput. Nunami aalajangersimasumi naqiterisarneq unitsikkaanni soorunami isumaqanngilaq tassani oqaluussineq unitsittariaqartoq. Oqaluussisartut tamaaniittut atuagassianik biibililersaarutinik naammattunik pilersorneqartuassapput, aammalu nunani tamakkunani Jehovap nalunaajaasuisa hundredetuusintilikkuutaat suliassaminnik aallussilluarlutik tullerminnut ’eqqissineq oqaluutigiuassavaat’. (Evf. 2:17) Aaqqissuusseqqinneq tamanna aningaasatigut aammalu allatigut iluaqutaasimavoq.

¹⁶ Maskiinat naqiteriviit ilaat nutaaliaasut Danmarkimit, Grækenlandimit, Hollandimit Schweizimillu Nigeriamut Filippinerinullu nassiunneqarsimapput. Naqiterisartut pikkorissut immikkoortortaqarfinnit Europameersut qaaqquneqaramik nunani allani Betelimi sulisunik maskiinanik atuinissaannik ilitsersuiartorlutik aallarnissaminnut akuersisimapput. Nunani tamakkunani oqaluussisartut maannakkut nunani allanisut atuagassianik pitsaasunik pisalersimapput.

¹⁷ Iluaqutaasoq alla tassaavoq nunani ikittuni naqiteriveqarfitsinni atuagassiaatitta naqiterneqartarfiini aningaasartuutit isumagineqalermata. Nunani naqiteriveqarunnaarsimasuni aningaasat allanut atorneqarsinnaalerput, assersuutigalugu Naalagaaffilersaartarfinnik sanaartornermut aammalu qatanngutinut nunani piitsooqarfiusuni najugaqartunut. Naalakkap pigisai silatuumik nakkutigineqarmata apustili Paulusip oqaasii silarsuaq tamakkerlugu atorsinnaanngorput: ’Imaassanngilarli: allat isumakulukkunnaassasut ilissilu annikilliussasusi, kisianni ataaseq naligineqassavoq: maannakkut ilissi peqangaarsusersi taakkua piitsuussusiannut ikiuutaassasoq, . . . ataaseq naligineqaqqullugu.’ — 2 Kor. 8:13, 14.

¹⁸ Allannguinerup tamatuma Jehovap nalunaajaasui nunarsuarmi tamarmiittut imminnut qaninnerulersissimavai. Naak Danmarkimi nammineq naqiteriveqarsimagaluarluta, aliasuutiginngilarput atuagassiaativut Tysklandimi naqiterneqalersimammata. Qatanngutilli tyskit naammassisaat qujamasuutigaavut. Tysklandimi oqaluussisartut ajuallaatiginerpaat tunissutitik qatanngutinut Danmarkimiittunut, Ruslandimiittunut, Ukrainemiittunut imaluunniit nunani allaniittunut atorneqartarmata? Soorunami naamik! Nuannaarutigaat nunani tamakkunani tunissutit qatanngutit tunissutigisimasaat pisariaqartunut allanut atorneqarsinnaammata.

Naalakkap pigisai nakkutigineqarput

¹⁹ Jehovap nalunaajaasuisa naalagaaffilersaartarfiini nakkaatitsiveqartarpoq „Tunissutit naalagaaffiup sulineranut — Matîuse 24:14“-mik allagartalinnik. Kajuminnermit tunissutit tasssunga nakkartinneqartartut pisariaqartitsiffiusuni atorneqartarput. ’Pilittap ilumoortup’ taavalu immikkoortortaqarfiit ataasiakkaat tunissutit sunut atorneqassanersut aalajangertarpaat. Aningaasat nunami aalajangersimasumi nakkaatitsivinnut nakkartinneqarsimasut nunami kilometerinik tuusintinik ungasissusilimmi Jehovap nalunaajaasuisa suliniarnerannut atorneqarsinnaapput. Tunissutit ilaat nunat ilaanni qatanngutitsinnut anorersuarujussuarmit, kaavittuliornermit, nunap sajunneranit, aammalu nunap inuisa imminnut sorsuunnerannit nalaanneqarsimasunut atorneqartarput. Tunissutit atorneqartarputtaaq ajoqersuiartortitanut nunani 200-nit amerlanerusuni aallartinneqarsimasunut ikiuutissatut.

²⁰ Jehovap Nalunaajaasuisa ilagiivini nalinginnaavoq aningaasartuutinut tunngasut qaammammut ataasiarluni naatsumik eqqaaneqartartut. Jehovap Nalunaajaasui ataatsimiinnerni ataatsimeersuarnernilu nakkaatitsivinnik ingerlatitsineq ajorput, inuilluunniit ataasiakkaat aningaasanik qinnuigineq ajorpaat. Napasuliaq Alapernaarsuiffik ukiumut ataasiaannarluni allaaserisaqartarpoq qanoq iliorluni aningaasanik tunisisoqarsinnaasoq nunarsuaq tamakkerlugu oqaluussinermut tapersersuutissanik. Iteritsi!-mi Peqatigiiffiup aningaasartuutai aalajangersimasumik allaatigineqarneq ajorput. Nunarsuaq tamakkerlugu nutaarsiassamik nuannersumik oqaluussinermik suliaq, naalagaaffilersaartarfiliortarneq, piffissaq tamaat immikkut kiffartortut isumagisarnerat, uppeqatittalu ajornartoortillugit ikiorneqartarnerat qanoq ililluni isumagilluarneqarsimappat? Jehovap nuannivissumik innuttani anersaamik tunisiumatuumik pilluaqqusimavai. (2 Kor. 8:2) Tamatumunnga tunngatillugu ’pigisaminnik Jehovamik ataqqinaasiisimasut’ tamaasa qujaffigerusuppavut. Qularinngissinnaavaat ’pilittap ilumoortup’ Naalakkap pigisai nakkutigilluarumaarai. Jehova qinnuigisarparput nunarsuaq tamakkerlugu Naalagaaffik pillugu oqaluussissutiginninnermik suliaq pilluaqqujuaqqullugu.

[Quppernerup ataani ilanngussaq]