Pioneerit allanik ikiuipput
1 Jesus oqarsimavoq: ’Katersugassat amerlaqaat, sulisussalli ikeqaat. Taamaattumik katersugassat inuat qinnuvigisiuk sulisussanik katersuiffimminut aallartitseqqullugu.’ Ukiuni hundredelinni siullerni katersuisussat ikeqimmata oqaluussiffissarlu angeqimmat, nutaarsiassamik nuannersumik amerlanerpaat tusarleqqullugit Jesusip ataasiakkaarlugit aallartissinnaasimagaluarpai. ’Marlukkuutaarlugilli’ aallartippai. (Lúk. 10:1, 2) Sooq taamaaliorpa?
2 Ajoqersukkat taakkua nutaajummata misilittagakillutillu. Suleqatigiinnermikkut imminnut ilinniartissinnaapput kaammattoqatigiillutillu. Salomonip oqarneratut ippoq: „Marluugaanni ataasiinnaanermit pitsaaneruvoq.“ (Nal. oq. 4:9, 10) Allaat anersaap illernartup ukiumi 33-mi piinsip ulluani kuineqareernerata kingorna Paulus, Barnabas allallu oqaluussinerminni uppeqatitit ingiaqatigisarpaat. (ap. sul. 15:35) Taamanikkut angutinit pikkorissunit ilinniartinneqarneq qatanngutinut immikkut pisinnaatitaaffiusimavoq angisooq.
3 Ilinniartitaanermik aaqqissuussineq pitsaasoq: Kristumiut ilagiit ukiuni hundredelinni siullerni illua-tungimissut ilagiiupput oqaluussisartuusut. Ilinniartitaanerput aamma isumagaat. Inuttut ataasiakkaatut nutaarsiassap nuannersup kinguneqarluarnerpaamik oqaluussissutiginissaa kissaatigisariaqarparput. Oqaluussisartut amerlanerusut piginnaaneqarnerulersinniarlugit ikiuinissamik aaqqissuussisoqarsimavoq.
4 Guutip Naalagaaffianik Kiffartornermik Atuarfik-mi decembarimi 1997-mi oqaatigineqarsimavoq pioneerit oqaluussinermi allanik ikiuisarnissaannik Peqatigiiffik aaqqissuussisimasoq. Tamanna pisariaqartinneqarpa? Aap, ukiuni kingullerni pingasuni oqaluussisartut nutaat millioninit amerlanerusut kuisissimapput, taakkualu ilarpassui oqaluussisartutut pikkorinnerulissagunik ilinniartitaasariaqarput. Kikkut ikiuisinnaappat?
5 Pioneerit taamaaliorsinnaapput. Jehovap peqatigiissortaasa pioneerit siunnersortarpai innersuullugillu. Pioneerit Atuarfiat-ni sapaatit-akunnerini marlunni immikkut pisariaqartitaat matuniarlugit toqqaannartumik innersuunneqartarput. Aammattaaq nakkutilliisunit angalasartunit ataatsimeeqateqartarnitik utoqqaanertanillu innersuunneqartarnitik iluaqutigisarpaat. Pioneerit tamarmik Paulusitut Barnabasitullu misilittagaqartiginngillat, ilinniartitaalluarsimappulli, tamannalu allanut iluaqutaatikkusuppaat.
6 Kikkut aaqqissuussineq iluaqutigissavaat? Aaqqissuussineq tamanna oqaluussisartunut nutaanuinnaq kuiserlaanuinnarluunniit naatsorsuussaava? Naagga! Inuusuttoqarpoq utoqqaqarlunilu ukiorpassuarni sallusuissummiissimasunik, oqaluusseriaatsinili assigiinngitsuni pikkorinnerulernissamut ikiortikkusuttunik. Ilaat atuagassiarpassuarnik agguaassisarput, pulaaqqiinerli atuaqqissaaqatitaartarnerlu ajornakusoortillugu. Allat immaqa atuaqqissaaqatitaarneq oqitsuutippaat, paasilertarpaalli ilinniartut siumukarneq ajortut. Suut tunuarsimaartippaat? Pioneerit misilittagaqartut tamakkuninnga ikiueqquneqarsinnaapput. Pioneerit ilaat soqutiginninnermik ineriartortitsillaqqipput, atuaqqissaaqatitaallaqqillutik nutaanillu peqatigiiffimmut siulersuillaqqillutik. Aaqqissuussinermi nutaami tamatumani misilittagaat iluaqutaangaassapput.
7 Katersuunnernut tapersersuerusunnittut annertutigisumik periarfissaqarnak misigivit? Immaqa pioneerit ilaata suleqatigisinnaavaatit piffissami oqaluussisartut allat oqaluussiffigisinnaanngisaanni.
8 Suleqatigiilluarnissaq pisariaqartinneqarpoq: Ukiumut marloriarlutik ilagiit utoqqaanertaasa oqaluussisartut inuttut ikiortikkusuttut aaqqissuussinermut „Pioneerit allanik ikiuipput“-mut ilaanissaat aaqqissortassavaat. Taamatut ikiortikkusukkuit, pioneerilu taamatut suliassinneqarsimasoq oqaluussinissassinnut pilersaarusiussaasi — taavalu malittaralugu. Isumaqatigiinnerit tamaasa eqqortikkit. Suleqatigiikkaangassi nutaarsiassap nuannersup pitsaanerpaamik qanoq saqqummiunneqarsinnaanera maluginiartassavarsi. Saqqummeriaatsit ilaat sooq sunniuteqarluarnerunersut paasiniartarsiuk. Pitsannguallaatissatut pioneerip siunnersuutai ilassisakkit. Ilinniakkatit atornerujartortillugit siumukarnitit tamanut malunnarsissapput. (Takuuk Timûtiusimut agdlagkat sujugdlît 4:15.) Sapinngisamik akulikinnerpaamik suleqatigiittaritsi; oqaluusseriaatsit tamaasa peqataaffigisakkit, aamma torrutiinnarlugu oqaluussineq, oqaluusseriaatsilli ikiorneqarfigisariaqakkatit pingaartinnerukkit.
9 Kiffartornermik nakkutilliisup siumukarnerit soqutigissavai. Ilagiit atuakkamik atuaqqissaarnermi aqutsisuat ilaannikkut attaveqarfigisassavaa paasiniarlugu ikiuiniarluni aaqqissuussineq ilinniartup iluaqutigineraa. Nakkutilliisup angalasartup ilagiit tikeraaraangamigit aamma ilinniartoq ikiortassavaa.
10 Jehovap kissaatigaa innuttami ilinniartitaanissaat ’ajunngitsuliornernullu tamanut piginnaanngorsagaanissaat’. (2 Tim. 3:17) Pioneerit ikiuinissaannik aaqqissuussineq oqaluussisartutut piginnaanerminnik pitsannguallatsitsiniartunut iluaqutaasutut isigiuk. Peqataasinnaasutut immikkut pisinnaatitaaffeqaruit, qujamasuttuullutit, maniguullutit nuannaarlutillu peqataagit.