Nakkutilliisut siuttuusut — Kiffartornermik nakkutilliisoq
1 Kiffartornermik nakkutilliisup ilagiit oqaluussiffigisassarititaanni oqaluussinerup siuarsarneqarnissaanut tunngasut tamaasa soqutigai. Taamaalilluni nutaarsiassamik nuannersumik oqaluussinermi akisussaaffitsinnik eqqortitsinissatsinnik ikiussalluta pingaarutilimmi inissisimaffeqarpoq. Oqaluussisartutut aallussilluartutut oqaluussinermut tunngasunut tamanut aaqqissuussinerni siuttuuvoq. Ilinniartitsillaqqissuuvoq oqaluussisartut ataasiakkaat oqaluussinermi angusaqarnerunissaannik ikiuisartoq. — Evf. 4:11, 12.
2 Ilagiinni kiffartortut atuakkanik, atuagassianik oqaluussisarfinnillu isumaginnittut toqqaannartumik nakkutigisarai. Ilagiit atuakkanik, atuagassianik immersuiffissanillu naammattunik peqartuaannarnissaat akisussaaffigaa. Pulaarneqarumanatik nalunaarsimasut oqaluussisarfiit allattorsimaffiiniittut ukioq allortarlugu misissortarpai, qatanngutillu piukkunnaatillit taakkununnga pulaaqqusarlugit.
3 Kiffartornermik nakkutilliisup oqaluusseriaatsit assigiinngitsut, soorlu niuerniartarfinni, aqqusinermi oqarasuaatikkullu oqaluussinerit, nakkutigineqarnissaat akisussaaffigaa. Sapaatip-akunnerata ingerlanerani nalliuttunilu piffissaalluartukkut katersuunnerit aaqqissortarpai. Biibilimik atuaqqissaaqateqarnermik sulineq soqutigilluartarpaa. Aammattaaq assigiinngiaamik oqaluussisartut unittoqqaasullu anersaakkut ikiorneqarnissaat eqqumaffigaa. Pioneerit suliniutaat soqutigai aaqqissuussinerlu „Pioneerit allanik ikiuipput“ nakkutigisaralugu.
4 Ilagiit kiffartornermut ataatsimiititaliaanut ilaasortatut kiffartornermik nakkutilliisoq ilagiit atuakkamik atuaqqissaaqatigiivinut allannguutissanik siunnersuuteqartarpoq. Atuaqqissaaqatigiit attavigisatit pulaaraangagit najuuttarit, katersuunnernullu aaqqissuussinerit tapersersortakkit.
5 Ilagiinniittut tamarmik kiffartornermik nakkutilliisup siunnersuutai kajumillutik malittariaqarpaat. Oqaluussisartutut pikkorinnerulissutigissavarput oqaluussinerlu nuannarinerulerlugu.