Sunniisinnaassuseqartumik kiffartorit

¹ Qilak taarsivoq, nipi amiilaarnartoq nipittoriartorpoq qoqianngunarseqaluni. Putsutut isikkulik appariartorpoq. Susoqartoruna? Pillertat millionilikkuutaat aggerput nuna perlussiortikkiartorlugu. Pisoq tamanna, pruffiitip Joelip allaaserisaa, oqaluussilluni suliakkut Guutip kiffaanit tanitaasunit taakkualu suleqataannit, ’amerlangaartunit’, suliarineqartukkut ullumikkut eqquuppoq.

² Napasuliaq Alapernaarsuiffik-mi 1. maaji 1998-imoortumi, qupperneq 12-imi, immikkoortoq 19-imi, ima allassimasoqarpoq: „Guutip ullumikkut sakkutuui pillertat kristumiuunerartut ’illoqarfianni’ sukumiisumik nalunaajaasimapput. (Joel 2:9) . . . Akornutissanik sunilluunniit qaangiiuartarput angerlarsimaffinnullu millionilikkuutaanut ornigullutik, aqqusinerni oqarasuaatikkullu sumiluunniit inuit naapitassaatillugit Jehovap tusarliussaa oqaluussissutigisarlugu.“ Suliamut Guutip uagutsinnut suliassiissutigisimasaanut peqataaneq immikkut pisinnaatitaaffissuunnginnerpa?

³ Pillertaviit nerisassarsiornissaminnik taamaallaat siunertaqartut assiginagit uagut Jehovap nalunaajaasuisut inunnik oqaluussiffigisatsinnik ilumoortumik soqutiginnippugut. Allat sallusuissutsinik Guutip oqaasianiittunik ilinniartikkusuppavut naassaanngitsumillu annannerannik kinguneqartussamik iliuuseqarnissaannik ikiorusullugit. (Juá. 17:3; 1 Tim. 4:16) Taamaaliorsinnaassagutta kiffartornerput sunniisinnaassuseqartumik ingerlattariaqarparput. Qanorluunniit ittumik kiffartuuteqaraluarutta isumaliutigisariaqarparput kinguneqarluarnerpaasussamik periaaseqarluta piffissamilu naleqqunnerpaami sulisarnerluta. Silarsuaq manna allanngorartuarmat suleriaaserput akusiortariaqarparput sapinngisamik annertunerpaamik naammassisaqarnissarput qulakkeerniarlugu. — 1 Kor. 7:31, NV.

⁴ Inuit assigiinngitsorpassuartigut naapinniartarpavut, illumiilli illumut oqaluussisarneq kiffartornitsinni pingaarnerpaajuarpoq. Inuit angerlarsimanngitsoortikulavigit, imaluunniit sinittut naammattuukulavigit? Tamanna uggornartarpoq, nutaarsiassamimmi nuannersumik oqaluttuussinnaaneq ajorpavut. Qanoq iliortoqarsinnaava?

⁵ Eqaatsumik ingasaassinngitsumillu periaaseqarit: Ukiuni hundredelinni siullerni Israelimi aalisartut unnuakkut aalisartarsimapput. Sooq unnuakkut? Piffissaq taakkununnga pitsaanerpaajunngikkaluarpoq, taamaalineranili aalisakkanik amerlanerpaanik pisaqartoqarsinnaavoq. Unnuaq suliffigissallugu pissarsinarnerpaasimavoq. Vagttårnet-imi 15. juuni 1992-imoortumi tamanna pillugu ima allassimasoqarpoq: „Uaguttaaq oqaluussiffigisartagarput misissortariaqarparput, amerlanerpaat angerlarsimaneranni tusarnaarnissaminnullu piffissaqarneranni ’aalisariarsinnaaqqulluta’.“ Inuit ileqquinik maluginiaaqqissaarnerup takutippaa sumiiffiit ilaanni arfininngornermi ullaakkut sapaammiluunniit ullaap’tungaani inuppassuit angerlarsimasaraluarlutik taamaalinerani pulaarneqarusuppiarneq ajortut. Illit najukkanni aamma taamaappat ullorulernerani ualikkulluunniit oqaluussiartortarsinnaanngilatit? Tamanna kiffartornitsinnik sunniuteqarnerulersitsisinnaassaaq tullitsinnillu innimiginninnitsinnut ersiutaassalluni, tamannalu kristumiutut asanninnerup ilumoortup ilisarnaatigaa. — Mat. 7:12.

⁶ Filípimiunut agdlagkat 4:5-imi apustili Paulusip eqqaasippaatigut ’qanilaassuserput inunnut tamanut malunnarsitissagipput’. Unnersuussut isumassarsiarititaasoq tamanna naapertorlugu periaaserisartakkatsinnut atatillugu oqimaaqatigiissumik ingasaassinianngitsumillu pissuseqarnissarput kissaatigaarput, tamannali ilutigalugu aamma ilungersuussilluarluta angorniorlutalu oqaluussinissarput kissaatigalutigu. ’Inuit tutsaanni illunilu ajoqersuinissatsinnut’ tunuarsimaarnissarput kissaatiginngilarput, qulakkeerumalluguli piffissakkut silatusaartukkut kinguneqarluanissamut periarfissaqartukkut oqaluussisarnissarput. (ap. sul. 20:20) Itsaq Israelimi aalisartut assigalugit piffissani ’pisaqarluarnissamut’ periarfissaqarnerpaani ’aalisartarnissarput’ kissaatigaarput, imaanngitsoq piffissani uagut iluarinerpaasatsinni.

⁷ Soorlu sutigut allannguisinnaavugut? Ilaannikkut arfininngornermi sapaammiluunniit ullaap’tungaani qulingiluanut qulilluunniit qeqqanut katersuutsitsisoqartarpoq, ingerlaannarlu illumiit illumut oqaluussiartortoqartarluni. Utoqqaanertaqatigiilli ilaat aaqqissuussisimapput katersuuttut illumiit illumut oqaluussilinnginnerminni aqqusinermi niuertarfinnilu oqaluussisassasut imaluunniit pulaaqqiillutik. Ilagiinni allani ullaap’tungaani kingusinnerusukkut katersuuttoqartarpoq (qulinut, aqqanernut ullup’qeqqanulluunniit). Taava katersuuttut ingerlaannaq matumiit matumut oqaluussilertarput ualerlu ilanngullugu oqaluussisarlutik. Oqaluussisarfiit ilaanni ualikkut oqaluussineq ullaap’tungaani oqaluussinermit pitsaanerusarpoq. Taamatut allannguinerit illumiit illumut oqaluussinermi angusaqarluarnerunermik kinguneqarsinnaapput.

⁸ Naliliisinnaassuseqarit ileqqorissaarlutillu: Inuit matumiit matumut angalaarnitsinni naapittakkavut tusarliussatsinnut assigiinngitsorpassuarnik qisuariartarput. Ilaat tusarnaartarput, ilaat soqutigittaattarput amerlanngitsullu oqqakkumatusarput imaluunniit assortuiumatuujullutik. Taaneqartoq kingulleq eqqarsaatigalugu ’Ræsonnerebogimi’ eqqaasinneqarpugut ’inunnik sallusuissummut ataqqinninngitsunik oqqateqateqarnermi ajugaanissarput’ anguniagarinngikkipput. Pulaagaq akeqqersimaarpat pitsaaneruvoq qimagutiinnassalluni. Inuit uagutsinnik oqaloqatiginninnissaannik imaluunniit isummatsinnik akuerinninnissaannik kimigiiserfiginerisigut ajuallatsinngisaannassavavut. Inuit pinngitsaalillugit tusarliussatsinnik tusarnaartinniarnissaat kissaatiginngilarput. Taamaaliorneq ingasattajaarnerussaaq, oqaluussisartunillu allanik oqaluussinermillu ajornartorsiortitsilersinnaavoq.

⁹ Oqaluussiartunnginnermi oqaluussiffissap allagartaa takusariaqarpoq pulaarneqarusunngitsunik allassimasoqarnersoq takuniarlugu. Allassimasoqarpat oqaluussisartut tamaannga oqaluussiartortartut tamaasa ilisimatinneqartariaqarput. Kiffartornermik nakkutilliisumik isumaqatigiissuteqarsimatinnani pulaarneqarusunngitsut pulaarneqassanngillat. — Takuuk Naalagaaffimmut Kiffartorneq-mi januaari 1994-imoortumi Apeqquteqartarfik.

¹⁰ Illumiit illumut oqaluussinitsinni naliliisinnaassuseqarnitsigut sunniisinnaassuserput annertusisissinnaavarput. Matu tikileraangakku maluginiaaqqissaartarit. Saagut saagusimappat? Nipaalluinnarpa? Taamaappat imaassinnaavoq najugaqartut sinittut. Immaqa kingusinnerusukkut aggeqqikkutta oqaloqatigilluarsinnaanerussavavut; immaqa pitsaanerussaaq qaangiinnarallarutsigu. Normua allassinnaavarput uterfigeqqillugulu — immaqa oqaluussisarfitsinni kingullerpaatillugu.

¹¹ Soorunami taama piniarnata itersaasoortarpugut allatigulluunniit akornusersuisoortarluta. Ilaat immaqa allaat uumitsattarput kamallutilluunniit. Taamaattoqartillugu qanoq qisuariartassaagut? Ussatit 17:27-mi allassimavoq: „Imminut naalakkersinnaasoq angutaavoq silassorissoq.“ Soorunami oqaluussinerput ajuusaarutigissanngilarput, oqarsinnaavugulli piffissaanngitsukkut takkussimanerput ajuusaarutigalugu. Inussiarnersumik aperisinnaavugut piffissakkut taakkua iluarinerusaatigut aggeqqissinnaanerluta. Pulaakkavut inuttut soqutiginninnermik ilumoorluta ersersitsivigisarutsigik saamanerulersissinnaavavut. (Uss. 15:1) Pulaagarput unnuakkut sulikulasarnerarpat oqaluussisarfitta allagartaanut allassinnaavarput, kingorna piffissani naleqqunnerusuni pulaarneqartarsinnaaqqullugu.

¹² Aammattaaq oqaluussisarfitta peqqissaartumik suliffiginiarnerani naliliisinnaassuseqartariaqarpugut. Aggeqqaarnitsinni amerlasuut angerlarsimaneq ajormata uterfigeqqittariaqarpavut ajornanngippat tusarliussamik annassutissamik tusarlerniarlugit. (Rûm. 10:13) Nalunaarusiani ersersimavoq oqaluussisartut ilaasa inoqutigiit ataatsit ullormut arlaleriarlutik naapinniartarsimagaat. Soorunami tamanna saniliusunit malugineqartarpoq. Inuit ilaasa tamanna isumaqalissutiginnaavaat Jehovap nalunaajaasui pulaaqattaarniaannavissut. Qanoq ililluni tamanna pinngitsoortinneqarsinnaava?

¹³ Naliliisinnaassuseqarnikkut. Angerlarsimanngitsoortitavut uterfigigaangatsigik imminut aperisarsinnaavugut angerlarsimasoqarneranut takussutissaqarnersoq. Allakkat ussassaarutilluunniit allakkanik nakkartitsisarfikkut nuisaannarpata ilimanassaaq suli angerlarsimasoqanngitsoq, taamaappallu kasuttussalluni iluaqutaanavianngilaq. Piffissani assigiinngitsuni, assersuutigalugu unnukkut, arlalialunnguariarluni misileereeraluarluni suli naapinneqarsimanngippat immaqa oqarasuaatikkut pissarsiarineqarsinnaassaaq. Taamaanngippat naqitaaqqamik allagartamilluunniit allakkanut nakkartitsisarfikkut nakkartitsisoqarsinnaavoq, ingammik tamaani oqaluussisoqakulappat. Immaqa taava tulliani oqaluussisoqaqqilerpat naapinneqarsinnaassaaq.

¹⁴ Silarluppat pulaagarput eqqarsaatigisariaqarparput taassuminngalu oqaloqateqarnerput sivisunaarnaveersaarlugu. Iseqquneqarutta nateq natersuilluunniit tumiliorfiginaveersaartariaqarpavut. Qimmimillu qiluttoqarpat naliliisinnaassuserput atortariaqarparput. Oqaluussisartut opgangilinni angalaartut najugaqartunut akornusersuutaasumik nipituumik oqalunnaveersaartariaqarput nipiliornaveersaartariaqarlutillu.

¹⁵ Torissuseq ataqqinassuserlu: Aaqqissuussilluarutta oqaluussisarfimmi ataatsimi amerlasuujulluta maaniinnaq katersuunnaveersaarsinnaassaagut. Immaqa oqaluussisarfimmiittut ilaat tupattarput biilit arlallit oqaluussisartunik ilaasullit illumik eqqaannut unikkaangata. Kissaatiginngilarput inuit isumaqassasut ’tiguaajartortugut’. Oqaluussiffiusartup angalaarfigineqarnissaa oqaluussiartulertinnani katersuunnermi aaqqissussallugu pitsaaneruvoq. Oqaluussisartorpaalunnguit, soorlu ilaqutariit ataatsit, inunnut maluginiarnannginnerusarput oqaluussisarfiullu angalaarfigineqarnerani aaqqissuuteqqinneqarnissaat pisariaqartarani.

¹⁶ Torersumik periaaseqarnermut ilaavortaaq angajoqqaat oqaluussiartornermi meqqaminnik nakkutiginninnissaat. Meeqqat oqaluussinermi pissuserissaartariaqarput najugaqartunullu saneqquttunulluunniit iluaaginartumik pinnguarnissaminnut arpaqattaarnissaminnullu akuerineqartariaqaratik.

¹⁷ Aammattaaq kaffisorniarluni unikkallartarneq eqqarsaatigalugu oqimaaqatigiissaarisariaqarpoq. Rigets Tjeneste-mi, juuni 1995-imoortumi, quppernermi 3-mi, ima allassimasoqarpoq: „Oqaluussinitsinni kaffisorniarluta unikkallartarnitsinni piffissaq naleqangaartoq maangaannarsinnaasarpoq. Imaanngitsoq silarluppat imaluunniit nalunaaquttap-akunnerpaalunni oqaluussereersimalluni unikkallartarnissaq ajortuusoq. Ilarpassuattali oqaluussinertik ingerlatiinnartarpaat piffissarlu oqaluussinermut immikkoortissimasartik qatanngutit ilagalugit kaffisorniarluni unikkallarnernut atornaveersaartarlugu.“ Sutulaarniarluni unikkallartarnissaq inuup nammineq aalajangigassaraa, ilaannikkulli takuneqartarsimapput oqaluussisartorpassuit ataatsimoorrattut. Ilaatigut oqaluussinermi angusatik nipituumik oqalligisarsimavaat, tamannalu oqaluussinitta ataqqinassusianik ajoqusiisinnaavoq sunniutaanillu sanngiillisitsisinnaalluni. Naliliisinnaassutsip atorneratigut tamanna piffissamillu oqaluussinermut atugassaraluamik maangaannartitsinissaq pinngitsoortinneqarsinnaapput.

¹⁸ Oqaluussisartorpassuit angusaqarluarsimapput inuit sumiiffiinut orniguttarnermikkut — aqqusinernut, biilit uninngasarfiinut allanullu tamanit ornigarneqartartunut. Tamatumanissaaq kissaatigaarput oqaatsitsigut ingasaassiniannginnitsigullu nalunaajaateqarluarnissarput. Oqalussisartut ilagiit oqaluussisarfiisa killeqarfii ataqqisariaqarpaat inuit niuertarfeqarfinniittut qimuttuitsoqarfinniittulluunniit, imaluunniit niuertarfinni, soorlu kioskini orsussaarniarfinnilu ulloq unnuarlu naallugit ammasartuni, sulisut oqaluussisartunit assigiinngitsunit saaffigineqaqattaannginniassammata. Kiffartornitta torersumik ataqqinassuseqartumillu ingerlanneqarnissaa qulakkeerniarlugu oqaluussiffissatta killeqarfiisa iluanniinnaq sulisariaqarpugut, ilagiit allat kiffartornermut ataatsimiititaat aqqutigalugit isumaqatigiissusiortoqarsimanngippat oqaluussisarfianni ikiuussinnaasugut. — Naleqqiuguk Korintumiunut agdlagkat áipait 10:13-15.

¹⁹ Ilagiit ilaanni tamanit ornigarneqartartorpassuaqarpoq oqaluussiffissaqqissunik, tamakkulu oqaluussiffissatut aggorneqarsimapput. Tamakku oqaluussisarfissatut allagartalerlugit oqaluussisartumut ataatsimut arlalinnulluunniit tunniunneqarsinnaapput. Taamaalilluni oqaluussiffissap tamarmi suliffigilluarneqarnissaa qulakkeerneqartarpoq oqaluussisartullu amerlasuut ataatsikkut sumiiffimmi ataatsimi angalaartoornissaannik pinaveersimatitsisarluni. Tamannalu najoqqutassiamut Korintumiunut agdlagkat sujugdlît 14:40-miittumut naapertuuppoq: ’Tamatigut ippinnanngitsumik nalinginnanngitsumillu [torersumillu] ilioritsi.’

²⁰ Qallikkut isikkorput kiffanut Jehovap aqqanik taaguuteqartunut qinngaqqunnanngitsuullunilu naleqquttuusariaqarpoq. Atortuvuttaaq taamaattariaqarput. Oqaluussinermi pooqattat nungullarnikut biibilillu ipertuut eqiternikunillu quppernillit Guutip naalagaaffianik tusarliussamit inunnik allamut saasaarisinnaapput. Oqartoqarsimavoq atisat qallikkullu ipeersaarneq ’kinaanermik suunermillu, inuiaqatigiinnilu sumi inissisimanermik, inunnut nalunaaruteqartartut’. Taamaattumik oqaluussiartoraangatta pikatappasinnatalu ipeersaanngippasissanngilagut, imaluunniit mutiuallaanik akisuallaanilluunniit atisaqassanata. — Fil.1:27, naleqqiuguk Timûtiusimut agdlagkat sujugdlît 2:9, 10.

²¹ Korintumiunut agdlagkat sujugdlît 9:26-mi apustili Paulus ima oqarpoq: ’Uanga arpappunga maangaannaq pinnanga; tilluivunga silaannarmut pinnanga.’ Tamatumani Paulus ilaartariaqarparput sunniisinnaassuseqartumik kiffartornissarput aalajangiusimalluinnarlugu. Jehovap nalitsinni ’sakkutuuisut pillertatut’ eqiasuilluta oqaluusseqataanitsinni inunnut oqaluussiffigisartakkatsinniittunut tamanut annassummik tusarliigaangatta ingasaassinianngitsuullutalu naliliisinnaassuseqartariaqarpugut.