Guutip oqaasia siulittuutaasoq piviusunngussaaq
1 Jehovap Nalunaajaasuisa Biibilimi siulittuutit soqutigisariuarsimavaat. Taamaattumik ukioq manna ataatsimeersuarnerup qulequtaa „Guutip oqaasia siulittuutaasoq“ tusaratsigu pissangasimavugut. Jehova ’neriffissaq nalliuttaraangat nerisassatsinnik’ sunik sassaalliuteqarniarnersoq paasiumallugu pilerisimavugut. (Matîuse 24:45) Pakatsisinngivippaatigut.
2 Ataatsimeersuarnermi qulequttat pingaarnerit: Ullormi siullermi ataatsimeersuarnerup qulequtaa pillugu oqalugiaammi „Guutip oqaasia siulittuutaasoq aalluttaruk“ Jesusip qaqqami naalannarsisinneqarnera pissanganartumik nassuiarneqarpoq. (Matîuse 17:1-9) Nassuiaatip ersersippaa piffissap pitsaanerpaap isaariaaniittugut, ullummi kingullerpaat qaalernera nalleratsigu, aaqqissuussaanerlu nutaaq siuninnguatsinniilluni. Guutip oqaasia siulittuutaasoq aallutissagutsigu pingaarnerpaat ilaat tassaavoq akuttoqatigiimmik Biibilimik atuartarnissarput. Oqalugiaatit ataqatigiit „Guutip oqaasiata atuartarnera qiimmattaatigiuk“-mik qulequtalinnit atoruminartunik siunnersorneqarpugut Biibilimik atuarneq qanoq pissarsinarnerullunilu nuannersunngorsinnaaneranut.
3 Ullut aappaani ualikkut sammineqartumi ulluni kingullerni inuunitsinnut uppernarsaatit ilaat pillugit qularutiginngisarput nakussatsinneqarpoq. Tamaasa eqqaamavigit? Ullut pingajuanni ullaap tungaani Habakkukip siulittuuttaa uagutsinnut ersarilluinnartunngortinneqarpoq ullut inuuffigisavut Habakkukip inuuffigisaanut assersuunneqarmata neriorsoqqissaarneqarpugullu ungasinngitsukkut pingaaruteqaqisumik pisoqarumaartoq Jehovap guutiitsut suujunnaarsippagit iluartullu annaallugit. Jakob Esauilu pillugit isiginnaagassiap isumaa paasiviuk? Sulilluarluta ilungersorlutalu Jehovamit pilluaqqussutissat piniartigik, sianigisaqanngissuseq soqutigisaqanngissuserlu akiorlugit.
4 Atuagaq nutaaq pissanganartoq: Atuagaq nutaaq Giv agt på Daniels profeti! (Danielip siulittuutai eqqumaffigikkit!) saqqummernera qiimmattaatigisimavarput. Atuagaq pissanganaqisoq atuarlugu aallartereerunarpat. Atuakkamik saqqummiussilluni oqalugiartoq oqarpoq: „Pingaartutut maluginiartariaqarpoq Danielip allagaani siulittuutit tamangajammik eqquussimammata, taamaallaat annikitsualuit kisimik pinnatik.“ Ullut makkua pingaaruteqarneranut ersersinnginnerpaa?
5 Ataatsimeersuarnermi saqqummiussat Guutip neriorsuutaasa suli eqquussimanngitsut eqquunnissaannik qulannginnerput nakussatsinneqarpoq. Tamatuma kaammattorpaatigut Guutip oqaasiata siulittuutaasup inunnut allanut oqaluussissutigiuarnissaanut.