Tusariinnginnerparput?
1 Uffami tusareerparput! Jehovap oqaatsimini sorpassuit uteqattaartarpai innuttaasalu iluaqutigisarpaat. Jesus Naalagaaffik pillugu ajoqersuigaangami assigiingitsut uteqattaartarpai. Apustilit anersaamut tunngasut taamaattut pillugit uppernermi sorlaqarlersimasut eqqaaseqqittuartarpaat. — Rûm. 15:15; 2 Pît. 1:12, 13; 3:1, 2.
2 Aammattaaq ullutsinni Jehovap peqatigiissortaasa ilagiit ataatsimiinnerini oqaluuserisat pingaaruteqartut eqqaasitseqqissutigiuartarpaat. Atuagaativut arlallit arlaliarlugit atuaqqissaaqatigiissutigereersimavavut. Uteqqiisarneq pingaaruteqarpoq!
3 Uteqqiinermi pisariaqartitat matussuserneqartarput: Jehovap oqaaqqissaarisaqattaartarnerata paasinnittaserput itinerulersittarpaa, ikiortarlutalu nerutunerusumik isiginnittaaseqalernissatsinnut anersaakkullu eqqortumik toraagaqartuarnissatsinnut aalajangersimanerput sakkortusisittarlugu. (Tus. 119:129) Guutip maligassiaanik najoqqutassiaanillu eqqaasinneqaqqinneq tarrarsornertut ippoq. Imminut misissornissatsinnut tusakkatsinnillu puiutunnginnissatsinnut ikiussavaatigut. — Jâk. 1:22-25.
4 Sallusuissummik imminut eqqaasittuartanngikkutta uummaterput allanik sunnerneqassaaq. Satanip silarsuaata ajortumik sunniineranut akiuunissatsinnut Guutip oqaaqqissaarutaasa ikiussavaatigut. (Tus. 119:2, 3, 99, 133; Fil. 3:1) Guutip siunertaata piviusunngornissaanik akuttunngitsunik eqqaasinneqartarnitta ’eqqumaniarnissatsinnut’ kajumissaarpaatigut. (Mák. 13:32-37) Biibilip sallusuissutaanik uteqqiisarnerup naassaanngitsumik inuunerup aqqutaaniittuarnissatsinnut ikiorpaatigut. — Tus. 119:144.
5 Nammineq qanoq iluaqutigisinnaagipput: ’Uummaterput Guutip inatsisaanut saatsittariaqarparput.’ (Tus. 119:36) Ilagiit ataatsimiinnerisa ilaanni sammisassaq ilisimalluaraluarutsiguluunniit piareersartariaqarpugut, allassimaffiit issuarneqanngitsut quppertarlugit unnersuussullu qanoq atorsinnaaneripput eqqarsaatigalugu. Pisariaqanngitsutut isigalugu allattariarsorluni uteqqiinissamut piareersanngitsooqinak. ( Lúk. 8:18) Soorunalimi sallusuissutit tunngaviusut ataatsimiinerni uteqattaarneqarneri pissutigiinnarlugit tusarnaanngitsoorumanngilagut. — Epr. 5:11.
6 Tussiaasiortutut isumaqartariaqarpugut, soorlu ima allattoq: „Inatsisitit malillugit ingerlanera nuannaarutigitigaara pisuussutitut silarsuup tamarmi piisut.“ (Tus. 119:14) Aap, pingaarutillit tamakku tusareerpavut, qularnanngitsumillu tusaqqikkumaarpavut. Sooq? Jehovap nalunngimmagu tusartariaqarivut!