Atuakkamik Giv agt på Daniels profeti!-mik atuaqqissaarneq
1 Sapaatip-akunnerani 17. aprilimiit atuakkap Giv agt på Daniels profeti!-p atuaqqissaarneqarnissaa aallartissaaq. Amerlanersatta atuagaq taanna pissanganaqisoq atuareersimavaat, nuannaarutigisinnaavarpullu atuaqqissaaqatigiinnermi atuakkap imaanik pisuunngorsaqatigiissinnaaleratta. Oqaluussisartut, soqutiginnittut meeqqallu tamarmik kajumissaarneqarput sapaatip-akunneri tamaasa Biibilimi Danielimik allakkat atuaqqissaaqatigiissutigineqarnerani najuuttaqqullugit. — 5 Mos. 31:12, 13.
2 Atuaqqissaarnermut pilersaarut ilitsersuullu: Guutip Naalagaaffianut Kiffartorneq-mi matumani atuakkap Giv agt på Daniels profeti!-p naallugu atuaqqissaarneqarnissaanut pilersaarut ilanngunneqarpoq. Atuakkavit iluanut pilersaarutip assinganik ilisigit. Pilersaarummi takuneqarsinnaavoq kapitali sorleq, immikkoortut sorliit, Biibilimilu versit sorliit sapaatip-akunnikkuutaarlugit atuaqqissaarnermi sammineqassasut. Ataani allanneqartut nassuiarpaat atuakkami pineqartussat ilaat qanoq qaqugukkullu sammineqassasut. Atuaqqissaarnermi siulersuisoq kajumissaarneqarpoq sapaatip-akunneri tamaasa atuaqqissaarneq naggaserlugu Danielimik allakkat-ni versit pilersaarummi allanneqarsimasut uteqqiiffigesaqqullugit. Piffissaqarpat versit atuarneqarsinnaapput oqaaseqarfigineqarlutillu. Versit ilaat sapaatip akunnerini arlalinni ilannguteqqinneqartussaapput arlaleriarlutik sammineqaqqittaramik.
3 Piareersaqqissaarneq: Sapaatip-akunnerani sammineqartussat tuaviuunneqaqqunagit piffissaqarluartumik sammineqartarnissaat pilersaarusiornermi anguniarneqarsimavoq. Taamaattumik pingaaruteqarpoq atuaqqissaarnermi siulersuisup paasissutissanik allanik ilaartuinnginnissaa, atuakkamik taaneqartut kisimik sammineqassammata. Ilinniagassat ilaat sisamat naatsuarannguupput. Tamanna pissutigalugu sapaatip-akunnerani 5. juunimiit atuaqqissaarnerup naggataata tungaani Daniel 2:1-40 uteqqinneqassapput. Sapaatip-akunnerani 26. juunimiit Daniel 3:1-30 uteqqinneqassapput. Sapaatip-akunnermi 4. septembarimiit quppernermi 139-mi assilissat allassimaffiillu oqaluusereqqissaarneqassapput. Quppernerni 188-imi 189-imilu qulequttat sapaatip-akunnerani 2. oktobarimiit atuaqqissaarnermi sammineqassapput.
4 Sapaatip-akunneranut atuaqqissaaqatigiinnissamut piareersaqqissaartuartarit najuuffigalugit nuannaarutigilluarniassagakkit. Pingaartitsinerit takutiguk Jehovap peqatigiissortaa takussaasoq suleqatigilluarsinnaallugu siuneqassuserlu paasinninnerlu ’kiffap aalajaatsup’ tunniussai iluaqutigalugit. (Dan. 12:3, 4) Allat atuaqqissaarnermi aalajaallutik najuuttarnissaannik inussiarnersumik kajumissaakkit. Tamatta Guutip oqaasia siulittuutaasoq, Danielimik allakkat-ni mianernangaartumi saqqummiunneqarsimasoq eqqumaffigitigu. — Epr. 10:23-25; 2 Pît. 1:19.