Apeqquteqarfik

◼ Oqaluussisartoq sivisuumik unittooqqasoq nutaarsiassamik nuannersumik oqaluussisartunngoqqinnissaanut qanoq ikiorneqarsinnaava?

Unittooqqasup Jehovamut ilumoorluni kiffartuussinissani kissaatigippagu, nuannaarnissamut pissutissaqarluarpoq. (Lúk.15:4-6) Qularnanngitsumik ulluinnarni atukkat assortorneqarnerluunniit pissutigalugit atuaqqissaartarnini, ataatsimiigiartarnini, oqaluusseqataasarninilu unitsissimavai. Anersaakkut siuariarnissaminut qanoq pitsaanerusumik ikiorneqarsinnaava?

Kristumiutut asanninneq piviusoq takutinniarlugu tamatta iliuuseqartariaqarpugut. Ikiuutissaq anersaakkut ittoq sorleq pisariaqarnersoq utoqqaanertat aalajangipallassavaat. (Jâko 5:14,15) Sivikitsuinnarmik unittooqqappat oqaluussisaqqilernissaanut oqaluussisartumit misilittagalimmit ikiorneqarnissaa naammappoq. Sivisungaatsiartumilli ilagiit attavigisarsimanngippagit annertunerusumik ikiorneqarnissaa pisariaqassaaq. Taamaattoqartillugu atuakkamik qinerluakkamik upperisaanut pingaartitsineranullu ineriartortitsisinnaasumik atuaqqisaaqatigineqartalernissaa siunnersuutigineqarsinnaavoq. Kiffartornermik nakkutilliisup oqaluussisartumit piukkunnaatilimmit atuaqatigineqarnissaa isumagissavaa. (Epr. 5:12-14; takuuk

„Apeqquteqarfik“ Guutip Naalagaaffianut Kiffartorneq-mi novembari 1998-moortumi.) Taamatut ikiortarialimmik nalunngisaqaruit ilagiinni kiffartornermut nakkutilliisumut oqaatigisinnaavat.

Sivisuumik unittooqqasup oqaluussisaqqilernissaanik kajumissaarneqannginnerani oqaluussinissamut piukkunnaateqarnersoq paasiniarlugu utoqqaanertanit marlunnit oqaloqatigineqaqqaarnissaa siunnersuutigineqassaaq. Oqaluussisartunngorniartup nutaap oqaluussinissamut piumasarineqartut naammasiumallugit oqaloqatigineqartarnerattut periaaseq atorneqassaaq. (Takuuk Napasuliaq Alapernaarsuiffik, 1. juuni 1989-imoortoq qup. 12.) Unittooqqasup nutaarsiassap nuannersup allanut oqaluussissutiginissaa ilumoorluni kissaatigissavaa. Aamma piumasaqaatit tunngaviusut ’Organisationsbog’-imi qup. 94-imit 96-imut allassimasut inuunermini maleruartariaqarpai, ilagiinnilu ataatsimiinnerit aalajangersimasumik najuuffigisariaqarlugit.

Unittooqqasoq ajunngitsumik anersaakkut ittumik najoqqutaqaruni pissatsissutigissavaa Jehovamullu attaveqarnini naleqangaartoq attatiinnassallugu inuunermullu naassaaanngitsumut aqqut ingerlavigiinnalissallugu. (Mat.7:14; Epr.10:23-25) ’Ilungersuussingaarluni’ piguni kristumiutullu pissutsit attattuaannagassat ineriartortittuarunigit ’eqiattarnanilu pilussinnassanngilaq’. — 2 Pît.1:5-8.