Suleqataaqqilersinniarlugit ikiukkit
1 Apustilip Paulusip kristumioqatimi anersaakkut navianartorsiorsinnaaneri nalunngilluinnarpaa, taamaattumik ima allappoq: ’Sininnermit itissallusi piffissanngorsimasoq, annaffissarpummi maannakkut qaninnerummat uppertunngoqqaarnitsinnit.’ (Rûm. 13:11) Paulus isumaalussimavoq qatanngutaasa ilaat anersaakkut nukilaallisimammata; itersarnissaat kissaatigaa taamaalillutik suleqataaqqilerniassammata.
2 Silarsuatoqqap matuma unnuaa naalerpoq, silarsuassamullu nutaassamut ulloq qanillivoq. (Rûm. 13:12) Nutaarsiassamik nuannersumik oqaluusseqataajunnaarsimasunut isumaalunnissaq pissutissaqarluarpoq. Ukioq kiffartuussiffiusoq kingulleq qallunaat nunaanni 317-it kiffartuusseqqilersimapput. Qanoq ililluta unittoorsimasut allat Jehovamut kiffartuussinermut peqataaleqqissinniarlugit ikiorsinnaavavut?
3 Utoqqaanertat qanoq iliorsinnaasut: Unittoorsimasut amerlanerit sallusuissut qimassimanngilaat; nikallunganeq, inuttut ajornartorsiorneq timip piinik pingaartitsivallaarneq imaluunniit ulluinnarni inuunerup isumakuluutai allat pissutigalugit oqaluussisarunnaaginnarsimapput. (Lúk. 21:34-36) Ajornanngikkaagat soorunami unittoortinnagit ikiornissaat pitsaanerusarpoq. Ilagiinni allatsip ilagiit atuakkamik atuaqqissaarnermi aqutsisuannut oqaluussisartoq assigiinngiiaamik oqaluussinermut nalunaaruteqartalerpat nalunaarutigisariaqarpaa. Taava paarsisut pulaarnissaat isumaqatigiissutigineqarsinnaavoq. Utoqqaanertat ajornartorsiummut suna pissutaanersoq paasiniartariaqarpaat tassanngaanniillu ikiuillutik. — Takuuk Vagttårnet 15. septembarimoortoq 1993, qup. 20-23-lu.
4 Allat qanoq ikiuisinnaasut: Amerlanersatta unittoorsimasut ilaat nalunngilaat, immaqalu allaat siornagut qanittumik attaveqarfigisimallugit. Ikiorniarlugit qanoq iliortoqarsinnaava? Sivikitsunnguamik sooq pulaalaaruit? Oqarlutit maqaasinerarlugu. Qiimmassaasuugit isumalluartuullutillu. Isumaalunnerit ersersiguk anersaakkut napparsimanera erseqqissumik taanngikkaluarlugu. Misigisat ilaannik ineriartornartunik imaluunniit ajunngitsunik allanik ilagiinnut attuumassuteqartunik oqaluttuuguk. Ataatsimeersuarnissaq „Eqqissinermik Guutip piinik tusarliisut“ qiimasumik eqqartoruk, peqataanissaanillu kajumissaarlugu. Iluaqutigisinnaasaa annerpaaq tassaavoq ilagiit ilagisaleqqinnissaat. Ataatsimiigiaqatigisarnissaa neqeroorutigiuk. Aammattaaq qanoq qisuariarsimaneranik utoqqaanertat oqaluttuutikkit.
5 Unittoorsimasoq ataatsimiinnernut aggertaleruni nalunngisani naapikkaagamigit siooralaartarnissaa qularnanngilaq. Ima apereqinak: „Sumiikkavinuna taama sivisutigisumik?“ Naagga, akerlianik tikilluaqquneqarnera misigitiguk. Oqaloqatigiuk. Ilisarisimanngisai ilisaritikkit. Ataatsimiinnerup nalaani issiaqatigiuk, erinarsuuteqarnissaa atuaqqissaarnermilu atortussaanik pisariaqartunik peqarnissaa isumagiuk. Aggeqqinnissaanik kajumissaaruk, pisariaqartitai naapertorlugit ikiorumajuk.
6 Jehovap Jesusillu savat tammarsimasut tunniusimasumik asavai, anersaakkullu ittumik uummaqqikkaangata nuannaarutigisarpaat. (Mal. 3:7; Mat. 18:12-14) Ilaat Jehovamut kiffartuussileqqissikkutsigik taama ittumik nuannaaqataasinnaavugut. (kmD 6/96 Hjælp dem til . . .)