Avatangiisinit tatineqarneq oqaluussinerullu immikkut pisinnaatitaafia
1 Avatangiisinit tatineqarnerup ajunngitsumik ajortumillu sunnersinnaavaatigut. Uppeqatitta ajunngitsumik sunnertarpaatigut kristumiutut ajunngitsuliornissatsinnut aqqutissiuulluta. (Epr. 10:24) Ilaquttattali uppinngitsut, suleqatitta, atuaqatitta, sanilitta nalunngisattalu kristumiunut najoqqutassianut akerliusumik iliornissatsinnut tatisinnaavaatigut. Immaqa ’Kristusimi iluartumik saqinitsinnik assuarlerpaatigut’ (1 Pît. 3:16) Allanit isumalluarnanngitsumik tatineqaraangatta oqaluussiuarnissarput qanoq ililluta aalajangiussimaannassavarput?
2 Ilaquttat: Ilaatigut uiusup ataataasullu Jehovap Nalunaajaasuunngitsup nuliami meeqqamilu oqaluussisarnerat akerlerisarpaa. Mexicomi uiusoq nulia meeraalu arfineq-marluk sallusuissummik ilassinnimmata akerlilersuivoq. Aallaqqaataani ilaquttami oqaluussisarnerat atuagassianillu illumit illumut agguaassisarnerat iluarinngilaa. Qinngaqqunnartutut isigaa. Nuliatali meeraasalu Jehova kiffartuukkumallugu aalajangiussimaannarpaat oqaluusseqataasarlutillu. Piffissap ingerlanerani uiusup Guutip oqaluusseqqusinerata naammassineqarnissaata naleqassusia paasilerpaa, Jehovamullu tunniulluinnarluni. Sallusuissummik aalajangiussinissaminut ukiut 15-t atorpai, tamannali pisimassagaluarnerpa ilaqutaasa oqaluussiuarneq immikkut pisinnaatitaaffittut isigisimanngitsuugunikku? — Lúk. 1:74; 1 Kor. 7:16.
3 Suleqatit: Immaqa oqaluussigaangavit suleqativit ilaasa iluarineq ajorpaat. Qatanngut arnaq oqaluttuarpoq suliffimmini silarsuup naggatissaa oqallisigineqarsimasoq. Suleqatiminut Matîuse kapitali 24 atuaqqullugu siunnersuutigigamiuk illaruaatigiinnarpaat. Ullut arlaqanngitsut qaangiummata ilaat arnaq saaffiginnippoq oqarlunilu kapitali taanna atuarsimallugu assullu soqutiginartillugu. Atuagassaminik pivoq, uinilu Biibilimik atuaqqissaqatigineqalerput. Siullerpaamik atuaqqissaaramik unnuamut marluk tungaanut atuaqqissaaqatigiissimapput. Pingajussaanik atuaqqissaqatigereerlutik ataatsimiigiartalerput, sivitsunngitsorlu pujortartarunnaarput erngerlutillu oqaluusseqataasalerlutik. Tamanna pisimassagaluarpa qatanngut arnaq taanna oqaluussinissaminut tunuarsimaaraluaruni?
4 Atuaqatit: Jehovap Nalunaajaasuisa meerartaasa atuaqatiminnit tatineqartarnerat oqaluussisarnertillu pillugu inuusuttoqatiminnit illaruaatigineqarnerat qaqutigoortuunngilaq. Inuusuttuaraq oqarpoq: „Inuusuttuaraqatinnut oqaluussinissara qunugisarpara illaruaatigineqarnissara siooragigakku.“ Taamaattumik inuusuttuaraqatiminut atuarfimmi angalaartarfinnilu oqaluussinissaminut periarfissaraluani atunngitsoortarpai. Qanoq ililluni avatangiisinit tatineqarnerup akiornissaanut nakussatsittoqarsinnaava? Jehova tatiguuk tassanngalu iluaritinnissat anguniarlugu. (Uss. 29:25) Oqaluussigaangavit Guutip oqaasia atorsinnaagakku tulluusimaarutiguuk. (2 Tim. 2:15) Niviarsiaraq siuliani eqqaaneqartoq Jehovamut qinusalerpoq atuaqatiminut nalunaajaarusussutsimik ikioqqulluni. Atuarfimmi torrutiinnarlugu oqaluussisalerpoq, angusaqarluarlunilu nalunngisaminullu tamanut oqaluussisalerluni. Oqarpoq: „Inuusuttorpassuit siunissamut neriuuteqarnissartik kissaatigalugulu pisariaqartippaat, ikiornissaannullu Jehovap atorpaatigut.“
5 Sanilit: Immaqa sanileqarpugut nalunngisaqarpugulluunniit Jehovap Nalunaajaasuitut isiginnittaatsivut pissutigalugit uagutsinnut ilasseraanngitsunik. Qanoq isumaqarnersut annilaangatigigukku imminut apereriarit: ’Sallusuissut inuunermut naassaanngitsumut sammisoq nalunngilaat? Qanoq ilillunga uummataat angusinnaavakka?’ Nakkutilliisup angalasartup maluginiarsimavaa saniliminnut mianersorlutik oqaluussisartut angusaqarluartartut. Ilumoortunik ujarlertuaannarnissannut pisariaqartumik nakussatseqqullutit ilisimassutsimillu Jehova qinnuigisaruk. — Fil. 4:13.
6 Avatangiisitta tatisinerat naakkaannarfigisarutsigu immaqa assortuisut nuannaartiinnassavavut, tamannali taakkununnga uagutsinnullu iluaqutaassava? Jesus nunaqqatsiminit assortorneqarpoq. Allaat affarmik qatanngutai annernartunik oqaaseqarsimapput. Nalunngilaali taamaallaat Guutip aqqutigeqqusaasigut ingerlatilluni aalajaattuaannaruni ikiorsinnaallugit. Jesus ’ajortuliortut taama atsigisumik assortormanni ilalaaginnarpoq’. (Epr. 12:2, 3) Uaguttaaq taamaaliortariaqarpugut. Oqaluussisinnaatitaanerup sapinngisamik atorluarnissaa aalajangiusimajuk. Taamaaliorlutit ’annatsikkumaarputit tusartitillu annatsikkumaarlugit’. — 1 Tim. 4:16.