Allat qanoq qularunnaarsinneqartut
1 Apustili Paulusi qularunnaarsitsillaqqissuuvoq. (Aps. 19:26) Allaammi kunngip Agrippap oqarfigaa: „Kristumiunngortingajaveqaarma!“ (Aps. 26:28) Paulusip oqaluussigaangami qanoruna qularunnaarsitsisartoq? Allakkat atorlugit tunngavilersuisarpoq saqqummiussanilu tusarnaartimi nalunngisaannik tulluarsartarlugit. — Aps. 28:23.
2 Oqaluussigaangatta Paulusi issuarlugu qularunnaarsitsinartumik oqaaseqartariaqarpugut. Qanoq ililluta? Siuneqarluta oqalukkutta tusarnaarlutalu. (Uss. 16:23) Taamaaliorsinnaajumalluta pingasunik iliuuseqartariaqarpugut.
3 Tusarnaaqqissaarit: Oqaluffigineqaraangavit tusarnaartariaqarputit oqaloqatigiinneq qanoq ineriartortinneqartussaq tunngavissarsiorniarlugu. Akerliliippat paasiniaruk suna pillugu taama isumaqarnersoq. Taamaaliorlutit suna upperineraa, sooq taama isumaqartoq, suullu qularunnaarsissimagaa paasilluassavatit. (Uss. 18:13) Periaaserillutit oqaaseqartinniarsariuk.
4 Apersuigit: Ajoqersuut ataasiullunilu-pingasuussuseq upperippagu aperisinnaavat: „Guuti ataasiullunilu-pingasuusoq upperiuarsimaviuk?“ Apereqqissinnaavat: „Tamanna pillugu Biibilimi qanoq allassimasoq misissorsimaviuk?“ Aammalu aperisinnaavat: „Guuti ataasiullunilu-pingasuusumut ilaappat ilimagissannginnerparput ersarissumik Biibilimi allassimasoqassasoq?“ Tamatumunnga akissutai iluaqutigisinnaavatit Biibilimi qanoq allassimasoq tunngavilersuiniarnissannut.
5 Tunngavilersuilluarit: Oqaluussisartup arnaq Jiisusimik Guutiuneragaasoq aperaa: ’Inuk alla nassuiassagukku inuit marluk naligeeqqissaartut, taava ilaqutariinni sorliit assersuutigisinnaassavigit?’ Akivoq: „Qatanngutigiit marluk, immaqa.“ Qatanngut nangippoq: „Aap, immaqami allaat marlulissat assigeeqqissaartut. Jiisusilli ajoqersorpaatigut Guuti Ataataasoq namminerlu Ernerulluni, tamanna taava qanoq paasisariaqarpa?“ Oqaasii arnap paasilluarpai, taakku arlaat angajulliusimassasoq pissaaneqarnerullunilu. (Mat. 20:23; Joh. 14:28; 20:17) Arnap isumaa uumataalu anguneqarput qularunnaarsitsilluni oqaaseqallaqqinnikkut.
6 Soorunalimi kikkut tamarmik sallusuissutsimik paasinnilersissallugit ilimagisinnaanngilarput paasiuminartumik ilumoortumillu saqqummiukkaluarutsiguluunniit. Paulusitulli oqaluussiffigisartakkatsinni iluartunik ujaasiuarta Guutillu naalagaaffianik tusarliussamik ilassinninnissaannut pillaqqilluta qularunnaarsinnissaannut ikiorlugit. — Aps. 19:8.