Qularunnaarsitsisumik ilinniartitsineq
1. Sunniuteqarluartumik oqaluussiumalluta Biibili qanoq atorluarsinnaavarput?
1 Apustilitut Paulusitut oqaluussillaqqissut ‘oqaaseq sallusuissutaasoq eqqortumik atorumallugu’ Biibili issuaannarnagu atortarpaat. (2 Tim 2:15, NW) Guutip oqaasianik ilinniartitsigaangatta qanoq ‘qularunnaarsitsisarsinnaavugut’? – ApS 28:23.
2. Inuit Guutip oqaasianik ataqqinninneruleqqullugit qanoq ikiorsinnaavavut?
2 Biibili atuartaruk. Siullerpaamik, ilisimassusermik Guutimeersumik ataqqinnilersitsisumik Biibilimut innersuussisarit. Guutip oqaasianik upperinnilluta allassimaffimmik atuaasarnerput pulaakkatta tusarnaarusulissutigisinnaavaa. (Hebr 4:12) Ima oqarsinnaavugut: “Tamatumunnga tunngatillugu Guutip isumaata paasinera iluaqutigaara. Guutip oqaasiani qanoq allassimasoqartoq maluginiariaruk.” Ajornanngikkaangat Guutip oqaasianit atuaasarit.
3. Pulaagaq allassimaffimmik paasinnissimanersoq qulakkeerniarlugu susinnaavugut?
3 Aappassaanik, allassimaffik atuarneqartoq nassuiaruk. Allassimaffik atuarneqaqqaaraangat inuppassuit paasiuminaatsittarpaat. Allassimaffiup eqqartorneqartumut qanoq attuumassuteqarnera nassuiassallugu ilaatigut pisariaqartarpoq. (Luk 24:26, 27) Pingaarnerit erseqqissakkit. Amerlanertigut apeqquteqarnikkut pulaagaq sammineqartumik paasinnissimanersoq qulakkeersinnaavarput. – Uss 20:5; ApS 8:30.
4. Qularunnaarsitsisumik ilinniartitsiumalluta aamma susariaqarpugut?
4 Allassimaffimmik tunngavilersuigit. Pingajussaanik, inuit uummataasa killinnissaat anguniagariuk. Allassimaffik pulaakkap qanoq iluaqutigisinnaagaa takutiguk. Allassimaffinnik tunngavilersuinikkut inuup isumaa allanngortinneqarsinnaasarpoq. (ApS 17:2-4; 19:8) Assersuutigalugu Tussiaat 83:19 atuareerlugu inuup aqqanik ilisimanninnerup ikinngutigiinnermut pingaaruteqarluinnarnera pulaagarpullu eqqartorsinnaavarput. Taava ima aperisinnaavugut: “Isumaqarpit Guutip aqqanik ilisimanninneq qinnutinik pitsaanerulersitsisinnaasoq?” Allassimaffik pulaakkatta qanoq iluaqutigisinnaaneraa taamatut takutikkaangatsigu Biibilip atoriaannaanera ersersittarparput. Taamatut qularunnaarsitsisumik Guutip oqaasianit ilinniartitsineq inuit eqqortuliorusuttut Guutimik piviusumik, Jehovamik, pallorfiginninnissaminnut kajumississutigissavaat. – Jer 10:10.