Jehovap aqqa naammassisaalu nalunaarutigisigit
1 „[Jehova] qutsavigisiuk, aqqa torlorfigisiuk! Naammassisai inuiannut nalunaarutigisigit! . . . [Jehovamik] ujarlersut tipaatsussapput.“ (Tus. 105:1, 3) Tussiaasiortup oqaatsinik taakkuninnga allattup Jehova taassumalu „naammassisai“ pillugit allanut oqaluttuarnermigut nuannaarneq misigaa. Naammassisai suut? Qularnanngitsumik naammassisai kunngeqarfiata alutornassusianut ’annaassineranullu’ nutaarsiassamut nuannersumut tunngasut. — Tus. 96:2, 3; 145:11, 12.
2 Eqqaaniaalluni nalliuttorsiornissaq, Jehovap pilluta iliuuserisaanut tipaatsunnissatsinnut pissutissarpassuaqartitsisoq qanilliartorparput. Naalakkap unnukkorsiortitsinera kristumiunut ilumoortunut tamanut qularnanngitsumik ukiup ingerlanerani ullunit allanit pingaarnerpaartaavoq. Pisimasoq tamanna immikkut ittuuvoq siunertaa, isumaa qanorlu nalliuttorsiutigineqarnera eqqarsaatigalugit. Tassaavoq Jehovap Jiisusillu annannissatsinnut iliuusiinut tamanut eqqarsarfissarput. Tamatuma nassatarisaanik nalliuttorsiornerup siornagut kingornagullu ’annaassinissaq’ pillugu nutaarsiassap nuannersup allanut ilisaritinniarnissaanut qularnanngitsumik iliuuseqarnerusaagut.
3 Ikiorti-pioneeriusinnaavit? Siorna apriilimi ikiorti-pioneeritut nalunaarsimasut 2884-iupput, uppernaamilu suliniuteqarneq naallugu ikiorti-pioneeriusut katillugit 4288-iupput. Ukioq manna oqaluussinerulluta marsi, apriili maajilu qaamatinit immikkut ittuutissinaavarput? Marsimi arfininngornerit tallimaassapput, apriilimi tallimanik sapaateqarluni saniatigullu ullut pingasut sulinngiffiusussaallutik, maajimilu weekendit sisamat saniatigut marlunnik sulinngiffeqassaaq. Oqaluussisartorpassuit ulloq naallugu sulisartut paasisimavaat ikiorti-pioneeriusinnaallutik weekendimi ulloq naallugu kiffartorlutik pilersaarusiornermikkut. Ikiorti-pioneerip oqaluussilluni akunnerit 50-t angussagunigit agguaqatigiissillugu sapaatip-akunneranut akunnerit 12-t missaat oqaluussisariaqarpoq. Quppernermi 4-mi siunnersuutit assigiinngitsut najoqqutarineqarput. Eqqarsaatigeqqissaarlugu ilaat ilinnut atorsinnaanersoq. Arlaat atorsinnaanngikkukkit immaqa marsimi, apriliimi maajimilu ikiorti-pioneeriuniarlutit nammineq pilersaarusiorsinnaavutit.
4 Ilagiinni utoqqaanertat oqaluussinerunissamut pilersaarusiorlutik kajumissaarillutillu maanna aallartereersinnaapput. Siorna apriili ilagiinni utoqqaanertat ilagiinnilu kiffartortut tamarmik ikiorti-pioneeriuneranni oqaluussisartunit 121-nit 64-t pioneeritut kiffartoqataasimapput. Ilagiinni nuannaarutigineqarportaaq marsimi apriilimilu arfinillit kuisimanngitsutut oqaluussisartunngormata. Tamanna meeqqat nutaallu piumasaqaatinik naammassinnittut kuisimanngitsutut oqaluussisartunngornissaminnut utoqqaanertanik oqaloqateqarnissaannut piffissaalluarpoq.
5 Ilungersuummerneq nuannaarnermik kinguneqartarpoq: Ilagiit immikkut anguniagaqartartut ilungersuuteqartartullu pilluaqquneqangaartarput. Ilagiit ilaasa oqaluussiffissaq qaqutiguinnaq angalaarfigineqartartoq immaqa suliniuteqarfigisarpaat. Allat oqaluusseriaatsit assigiinngitsut ilaat aalajangersimasut samminerusarpaat; allallu angerlarsimanngitsoortitartik imaluunniit ungasissumi najugallit oqarasuaatikkut oqaluussiffiginissaat pingaartinnerusarpaat.
6 Peqqiilliorneq imaluunniit utoqqalineq oqaluusseqqissinnaannginnermik isumaqartariaqarpa? Tamatiguunngitsoq. Assersuutigalugu qatanngut arnaq 86-inik ukiulik siorna apriilimi ikiorti-pioneeriusimavoq, naak niummigut pullattooqqagaluarluni. Jehovalu unnersiutigalugu kiffartornerulerpoq oqarasuaatikkut oqaluussilluni. Tamanna imminut ilagiinnullu sunniuteqarluarpoq.
7 Eqqaaniaalluni nalliuttorsiornissamut piareersarit: Ukioq manna eqqaaniaalluni nalliuttorsiorneq apriilip 8-ani pissaaq. Ulloq taanna sapaataasussaammat amerlanerusut najuunnissaminnut periarfissaqarluarput. Tamatta immikkut taperseeqataasinnaavugut (1) nammineq najuukkutta aamma (2) allanik qaaqqusigutta. Kikkut qaaqqusinnaassavavut?
8 Oqaluussillutit allattukkatit misissukkit, soqutiginninnermillu ersersitsisut nanillugit. Aalajangersimasumik pulaakulanngikkaluarukkilluunniit eqqaaniaalluni nalliuttorsiorfik sapaatip-akunnerinik marlunnik pingasunnilluunnit sioqqullugu pulaarsinnaavatit qaaqqusissummillu tunillugit. Ajornanngippat peqataajumasut biiliunneqarnissaannut neqeroorfigisinnaavatit.
9 Qaaqqusissutit naqitat atukkit. Allatsip saqqummiuttariaqarpai oqaluussisartut piffissaalluartukkut agguaanniassammatigit. Qaaqqusissummi assannik maskinamilluunniit allassinnaavat sumi aamma qassinut eqqaaniaalluni nalliuttorsiortoqassasoq. Eqqaaniaalluni nalliuttorsiorneq Naalagaaffilersaarfimmiissappat naqitaaraq, ilagiit ataatsimiittarnerinik naalagaaffilersaarfiullu adressianik allassimasoq, ilanngullugu tunniunneqarsinnaavoq. Qaaqqusissulli amerlanertigut qaaqquneqartussamut toqqaannartumik tunniunneqartariaqarpoq.
10 Oqaluussisartut unittooqqasut eqqaamasigik: Nuannertaqaaq Jehovamut tunniulluinnarluni kuisittoqaraangat. Ajoraluartumilli ilaasa katisimaqatigiunnaartarpaatigut, Jehovallu aqqanik naammassisaanillu oqaluussiunnaarlutik. Taakku isumakuluutigissallugit patsisissaqarluarpugut. Unittooqqasut amerlanertigut sallusuissut qimanneq ajorpaat, oqaluussiunnaartarpulli nikallortoortaramik, ajornartorsiortaramik imaluunniit inuunermi isumakuluuteqartaramik. (Matt. 13:20-22) Anersaakkut sanngiitsut ilagiinnut uternissaannut ikiorneqartariaqarput Saatanip silarsuaanit iineqannginneranni. (1 Pet. 5:8) Eqqaaniaalluni nalliuttorsiornerup nalaani unittooqqasut piumasaqaatinut naammassinnittut nutaarsiassamik nuannersumik oqaluusseqataaqqilernissaannut ikiorniarlugit immikkut iliuuseqarumassaagut.
11 Ilagiinni allatsip atuakkamik atuaqqissaqatigiittarnermi aqutsisut gruppeqataannit kina unittooqasoq nalunaarutigissavaa. Ilagiinni kiffartornermut ataatsimiititaliap unittooqqasut tamarmik paarsisunit pulaarneqarnissaat isumagiumaarpaa. Naatsorsuutigineqarpat taakkua ilaat atuaqqissaaqatigineqarunik iluaqutaassasoq kiffartornermut nakkutilliisup ilagiinni kiffartornermut ataatsimiititaliat isumaqatigalugit aalajangissavaa kina atuaqqissaaqatiginnittussatut piukkunnarnerunersoq. Atuaqqissaaqatiginnittussap piffissaq atukkani, pulaaqqinini Biibilimillu atuaqqissaaqateqarnini nalunaarutigisinnaavai; qularnanngitsumik sivisuumik atuaqqissaaqatigiittariaqassanngillat.
12 Siorna apriilimi qatanngutip arnap matumiit matumut angalaartilluni angut inuusuttoq aqqusinermi naapitani atuagassiamik tunivaa. Oqaaseqarneragut paasisinnaavaa nulia Jehovamut Nalunaajaasuusimasoq, maannali unitttooqalluni. Angutip naalagaaffilersaarfiup adressia piumavaa, qatanngullu arnaq pulaaqqusaalluni. Tamanna aappariit ataatsimiinnermi tullermi peqataanerannut Biibilimillu atuaqqissaaqatigineqarumanerannut kinguneqarpoq.
13 Kiffartornerunissannut piareersimagit: Tussiaasiortoq, Jehovap aqqanik naammassisaanillu nalunaaruteqarnissatsinnut kajumissaarisoq, nangippoq: „Erinarsorfigisiuk, erinalimmik unnersiutigisiuk! Tupinnartuliai tamaasa erinarsuutigisigit! Aqqa illernartoq qiimasuutigisiuk.“ (Tus. 105:2, 3) Taamaattumik takutitsigu Jehovap aqqa angingaartoq aamma „tupinnartuliai tamaasa“ soqutigigipput ilungersuummerluta oqaluussilluta. Aalajangiussimatigullu eqqaaniaalluni nalliuttorsiorneq ukioq manna pingaarnerpaartaasoq asseqanngitsoq.
[Qupp. 4-mi ungalusaq]
Siunnersuutit ikiorti-pioneerip sapaatip-akunneranut oqaluussilluni akunnerit 12-t qanoq angusinnaagini
Day Hours
Ataasinngorneq 1 2 1 −
Marlunngorneq − − − −
Pingasunngorneq 2 2 1 5
Sisamanngorneq 1 − − −
Tallimanngorneq 1 2 − −
Arfininngorneq 5 4 5 5
Sapaat 2 2 5 2
Total: 12 12 12 12
Siunnersuutit arlaat atorsinnaaviuk? Imaluunniit nammineq pilersaarusiorsinnaavit?