Jehovap pissatsissavaatit
1 Apustili Paulusi qanoq isumaqarfigaajuk? Apustilit Suliaat atuarutsigik malugisinnaavarput Jehovamut kiffartornermini qanoq suliaqarluartigisoq. Qanoq ililluni Paulusip tamakku naammassisinnaavai? Ima nassuiaavoq: „Tamaasa pissatsitsisikkut atussallugit sapinngilakka.“ (Fil. 4:13) Uaguttaaq Jehovap pissatsitsinera iluaqutigisinnaavarput. Qanoq? Aaqqissukkat arfinillit anersaakkut pissatsinnarsinnaasut nakussatsinnarsinnaasullu iluaqutiginerisigut.
2 Guutip oqaasia: Soorlu timikkut nukissaqarumalluta nerisariaqartugut taamattaaq anersaakkut uumajuaannassagutta Guutip oqaasianik nukittorsartariaqarpugut. (Matt. 4:4) Biibilip pissaanerata napatissinnaavaatigut. Sallusuissut ilungersuutigiuassagutsigu nuannaarutigiuarlugulu siunertaqartumik atuaqqissaarnissarput ilinniarsimasarpullu eqqarsaatigalugit pisariaqarpoq — ajornanngippat ullut tamaasa. — Tus. 1:2, 3.
3 Qinuneq: Pingaaruteqarpoq Jehovamut qanittumik attaveqarnissaq, ingammik immikkut ittumik pisariaqartitsinermi. Anersaani illernartoq ikiortigalugu qinusut pissatsittarpai. (Luk. 11:13; Ef. 3:16) Biibilimi kajumissaarneqarpugut ’qinunitsinni qasusuinnissatsinnut’. (Rom 12:12) Illit taamaaliorpit?
4 Ilagiit: Aammattaaq ilagiit ataatsimiittarnerisigut qatanngutittalu angutit arnallu katisimaqatigisarnerisigut nakussatsinneqarlutalu kajumissaarneqartarpugut. (Hebr. 10:24, 25) Nikalloraangatta ’nikuiteqqissinnaavaatigut’ asannittumillu tapersersorluta. — Uss. 17:17; Oqal. 4:10.
5 Oqaluussineq: Akuttoqatigiimmik oqaluusseqataasarutta Guutip naalagaaffiata taassumalu pilluaqqussutaasa samminerunissaannut iluaqutigissavarput. Allat Jehovamut ilisarsinissaannut ikiorlugit qiimmannartarpoq. (Aps. 20:35) Kikkut tamarmik pisariaqartitsiffiusumut nuussinnaanngillat, imaluunniit piffissaq tamaat kiffartorsinnaanngillat, tamattali siunertaqartumik kiffartoqataasinnaavugut. — Hebr. 6:10-12.
6 Nakkutilliisut kristumiut: Ilagiinni utoqqaanertat kajumissaarinerat tapersersuinerallu iluaqutigeqaavut. Taakku Guutip savaataanik Jehovap paarsisunngortippai. (1 Pet. 5:2) Nakkutilliisut angalasartut ilagiit kiffartorfigisartik ineriartortittarpaat, soorlu Paulusi itsaq aamma taamaaliortartoq. — Rom. 1:11, 12.
7 Nalunaajaasut aalajaatsut maligassiaat: Ullutsinni itsarlu suleqatit aalajaatsut maligassiaat kajumissinartut eqqarsaatigalugit nakussatsinnaqaaq. (Hebr. 12:1) Ineriartornissat pisariaqartikkukku soormi atuanngiligit atuagassiani inuunermik oqaluttuat, ’Årbogi’-mi ineriartornartut imaluunniit ’Historiebogi’-mi allaaserisat pissanganartut, Jehovap Nalunaajaasuisa oqaluttuarisaaneranni nutaanerusuni allaaserisaqartunik?
8 Qatanngutip angutip, maanna 95-it missaannik ukioqartup, nukappiaraanerminiilli sallusuissut ilassisimavaa. Suli inuusuttuulluni uppernera sakkortuumik misilinneqarsimavoq. Siullermik takusimavai ilagiinni sulilluaraluartut amerlasuut Jehovap peqatigiissortaanik qimatsisut. Taava illumiit illumut oqaluussisalerput, tamannalu sapernartutut misigisimavaa. Taamaakkaluartorli Jehova tatigiuarsimavaa, erngerlugulu oqaluussinneq nuannarilluinnalerlugu. Ullumimi? Naak peqqiillioraluaqaluni suli Betelimi Brooklynimiittumi suleqataavoq Siulersuisoqatigiinnilu kiffartorluni. Jehovap peqatigiissortaaniittuarnini peqqissimissutiginngivippaa.
9 Qatanngut arnaq Tuluit-Nunaanni Betelimiittoq 13-inik ukioqarluni kuisippoq. Ukiup tullia qatanngutinilu angut pioneeritut kiffartulerput, ukiullu pingajuani ataataat parnaarussaavoq sorsunnersuup aappaani sorsoqataajumanngimmat. Jehovamit pissatsinneqarnissani nukissatsinneqarnissanilu tunaariuarsimavai, Guutilu ilumoortoq kiffartortuarlugu. Kingorna qatanngut aalajaatsoq katippaa, suleqatigiillutillu Jehovap piumasaanik iliuuseqartuarsimapput. Ukiut 35-it katereersimallutik uia tassanngaannaq toquvoq. Jehovamit pissatsinneqaqqippoq — kiffartortuarlugulu nunarsuarmi ilaqutariissortat akornanniilluni naassanngitsumut taamatut periarfissaqarnini nuannaarutigalugu.
10 Jehovap kiffartortini aalajaatsut ikiortarpai nakussatsittarlugillu. „Qasusoq nakussatsittarpaa, nukillaangasoq pissatsittarpaa.“ Nukissaqartitsiuartoq nungussinnaanngitsoq aallerfigiuarsinnaavarput aaqqissukkat iluaqutissat taakku qulaani pineqartut atorluarnerisigut. Puigoqinagu ’Jehovamik neriuffiginnittut nutaanik nukinissammata. . . . Arpassammata qasunatik ingerlassammata nukillaarnatik.’ (Es. 40:29-31) Paulusip Jehovap pissatsitsisarnera tatigiuarpaa, uaguttaaq taamaattariaqarpugut.