Oqaluussineq ’tamaviaarutigiuk’
1 Paulusi Korinthimiitilluni tupiliortartuusoq atuaraangatsigu isumaqarsinnaavugut tamatuma oqaluussinermut periarfissakinnerulersikkaa. Apustilit Suliaat 18:5-mili allassimavoq: „Paulusip oqaaseq tamaviaarutigaa juutinullu nalunaajaatigalugu Jiisusi tassaasoq Kristusi.“ Sooq Paulusip oqaluussineq tamaviaarutigaa? Naak Korinthimiorpassuit uppertunngoreeraluartut Naalakkap illoqarfimmi tassani suli ajoqersuganngorsinnaasoqarnerarpaa. (Aps. 18:8-11) Oqaluussinerup tamaviaarunnissaanut assingusumik pissutissaqarpugut? Aap. Suli inuppassuaqarpoq sallusuissutsimik ilisarsiumasunik, taakkulu nanisariaqarpavut.
2 Apriilimi kiffartornerugitsi: Qularnanngitsumik qaammatit tamaasa nutaarsiassaq nuannersoq pillugu oqaluusseqataalluarnissat anguniagarivat. Qaammatilli ilaanni kiffartornerup tamatuma ’tamaviaarutiginissaanut’ immikkut pissutissaqarluarpugut. Apriilimi, eqqaaniaalluni nalliuttorsiornerup ukiumut pisut pingaarnersaasa qaammataanni, taamaaliornissatsinnut pissutissaqarluarpugut. Pissutsit atukkavit ikiorti-pioneeriunissannut imaluunniit upernaaq manna kiffartornerunissannut periarfissippaatit? Oqaluusisartorpassuit iliuuseqarnerugamik pilluaqquneqangaarput. (2 Kor. 9:6) Sapinngisat tamaat ilioruit eqqaamassavat uummammik tamakkiisumik iliuutsitit Jehovap nuannaarutigimmagit. (Luk. 21:2-4) Pissutsit atukkavit periarfissippatit apriilimi oqaluussinerup ’tamaviaarunnissaanut’ taava anguniarsariuk. Qaammallu naappat oqaluussisimanermik nalunaaruteqarnissat puigorniaqinagu, angusatit Jehovap innuttaasa oqaluussinermi ataatsimut katinnerannut ilanngunneqarniassammata.
3 Soqutiginnittut eqqaaniaalluni nalliuttorsiornermi najuuttut pulaakkit: Siorna nunatsinni eqqaaniaalluni nalliuttorsiornermi najuuttut 289-iupput. Ukioq manna qassit najuutissanersut soorunami naluarput. Oqaluussisartulli qassiunerinut naleqqiukkaanni erseqqippoq inuppaaluit orniginartikkaatigut. (Matt. 9:37, 38) Taamaattumik eqqaaniaalluni nalliuttorsiornermi soqutiginnillutik najuuttut anersakkut ikiorumallugit piaarnerpaamik pulaapallattariaqarpavut. Pulaarnissaat kinguartikkaanni ’uummataannut siaruartikkat ajortup piiariaannaavai.’ (Matt. 13:19) Pulaapallakkukku takutissavat kiffartuutit ’tamaviaarullugu’.
4 Unittooqqasut ikiortuakkit: Februaarimiilli unittooqqasut ikiorniarlugit immikkut suliniuteqartoqarpoq. Savanik paarsisunik suli pulaarneqarsimanngitsoqarpat utoqqaanertat isumagisariaqarpaat apriili naatinnagu pulaarneqarnissaat. Suna ajornartorsiutaanerunersoq ingerlalluaqqilernissaannullu qanoq pitsaanerpaamik ikiorsinnaanerlugit utoqqaanertat paasiniassavaat. Taamatut asannittumik ikiuineq, utoqqaanertat ’Guutip savaataanik’ paarsisutut, akisussaaffimminnik ilumoorussinerannut takussutissaavoq. (1 Pet. 5:2; Aps. 20:28) Vagttårnet 15. septembari 1993-moortumi, qupperni 22-23-mi siunnersuuteqarpoq iluaqutaasunik utoqqaanertat atorsinnaasaannik ajornartorsiutaasartut tallimat nalinginnaasut arlaat sorleq unittooqqasup ajornartorsiutigineraa paasiniarlugu. Pitsaanerpaavoq apriilimi oqaluussinermi ingerlalluaqqittoqalerpat.
5 Kuisimanngitsutut oqaluussisartunngornissaannut amerlanerusut ikiukkit: Meeqqatit nutaarsiassamik nuannersumik oqaluussisartunngornissaannut piukkunnaateqarpat? Biibilimimmi atuaqqissaaqatigisartakkatit? Apriili qaammat pitsaassaaq utoqqaanertanit akuerisaallutik oqaluussisaleraluarunik. Atuaqqissaaqatigineqartoq siuariartorsimappat atuagassiaaqqamillu Guutip sumik piumaffigaatigut?-mik atuakkamillu ’Ilisarsineq’-mik atuaqqissaaqatigineqareersimappat atuagaq alla — erĸigsineĸ isumangnáissuserdlo piviusut qanoq pilersíneĸásápat? imaluunniit Ataasiussuseqarlutik Guutimik ilumoortutuamik pallorfiginnittut atuaqqissaaqatigiissutigineqarsinnaavoq. Anguniagassaq tassaavoq Biibilimik atuaqqissaaqativit sallusuissutsimik paasisimasaqalernerunissaa, kuisimanngitsutut oqaluussisartutut piukkunnaatiqalernissaa Jehovap nalunaajaasuatullu tunniulluinnarnissaa kuisinnissaalu. — Ef. 3:17-19; 1 Tim. 1:12; 1 Pet. 3:21.
6 Biibilimik atuaqqissaaqatinnik qasusuillutit ilumoorlutillu soqutiginninnerpit sallusuissutsimik aalajangiussinissaminut piffissap ingerlanerani iluaqutigissavaa. Oqaluussisartup utoqqaat aappariit naapitai Biibilimik atuaqqissaaqatigiinnissamut akuersinasuarput. Sapaatip-akunnerili tulleriit pingasut atuaqqissaarnissartik kinguniartittarsimavaat. Kiisamilu aallartissinnaanngorput. Piffissalli ilaani sapaatip-akunnera allortarlugu pisinnaannginnertik nalunaarutigisarpaat. Naggataatigulli nuliaasoq kuisissinnaanngorpoq. „Kuisereerami,“ qatanngut angut oqaluttuarpoq, „nuannaarnermik qullilivoq, nuliaralu aamma taama misivugut.“ Ilumut, nutaarsiassaq nuannersoq ’tamaviaarutigigaanni’ nuannaangaalersitsisarpoq!
7 Biibilimi siulittuutit silarsuarmilu pissutsit takutippaat naggatissap naalernerani inuusugut. Guutip innuttaasa tamavimmik maanna nutaarsiassap nuannersup allanut ilisaritinnissaa ’tamaviaaruttariaqarpaat’. Apustili Paulusip qularunnaarsippaatigut suliaq taamaattoq „Naalakkami asuliinnaassanngitsoq“. — 1 Kor. 15:58.