Saniliilluartutut nalunaajaagit
1 Jiisusi oqarpoq: „Tullit ilittut asassavat.“ (Mat. 22:39) Qularnanngitsumik uppeqatitit ’ajunngitsuliorfigisarpatit’, sanilitittaaq asanninninnut ilanngussinnaavigit? (Gal. 6:10) Qanoq isillugu?
2 Imminut ilisaritinnikkut: Sanilivit nalunngilaat Jehovamut nalunaajaasuusutit? Naluppassuk soormi oqaluussiffiginiarlugit pulaarukkit? Qularnanngitsumik tupaallaatigissavat. Aammattaaq torrutiinnarlugu oqaluussiffigisinnaavatit, taamaaliorumaneruguit. Eqqassinni naapikkukkit, immaqa silataanni aqqusinermiluunniit, taava qungujullutit ilassikkit. Upperisat, naalagaaffilersaarfik sumiinnersoq, susoqartarnersoq kikkullu tassunga takkuttarnersut oqaluuseriumallugu iliuuseqarit. Ataatsimiinnernut qaaqqukkit. Nalunngisatit tamaasa nutaarsiassamik nuannersumik nalunaajaalluarfiginiarlugit aalajangerit. — Aps. 10:42; 28:23.
3 Pissuserissaarnikkut: Inussiarnisaanerit kinaassutsinnik oqariartuuteqarpoq, tamatumalu nalunaajaanissannut aqqutissiuussinnaavaatit. Aammattaaq ’Guutip ajoqersuutaanut tamatigut pinnersaataasinnaavoq’. (Tit. 2:7, 10) Sanilinnut ilumoorlutit soqutiginnigit. Inussiarnersuugit paasinnissinnaallutillu. Inuunerat eqqissisimarusunnerallu ataqqikkit. Innimiginnittuugit arlaallu napparsimaleraluarpat ikiorumallugu neqeroorit. Eqqassinnut ilaqutariinnik nuuttoqaraluarpat alakkartikkit tamaangalu tikilluaqqullugit. Taamatut inussiarnisaarnerit ajunngitsumik iginnitsitsilersarput Jehovamillu iluarinarluni. — Heb. 13:16.
4 Angerlarsimaffippit eqqiluitsuutinneratigut ajukkunnanngitsuutinneratigullu: Saniliulluassagutta aamma angerlarsimaffipput ajukkunnanngitsuutittariaqarparput. Angerlarsimaffiup eqqaatalu eqqiluitsuutinnera takujuminartuutinneralu immini nalunaajaataavoq. Angerlarsimaffiulli ipertuup sumiginnagaasullu, eqqaani sukujuut igitassallu sumi tamaaniillutik, Guutip naalagaaffianik tusarliussaq pitsaanngitsumik isigineqalersissinnaavaa. Taamaattumik angerlarsimaffiup, eqqaatalu biilillu eqqiluitsinnissaat torersuutinnissaallu pingaaruteqarpoq.
5 Kristumiut ilagiit avataaniittunik isumassuinikkut tullermut asanninneq takutinneqarsinnaavoq. Qanoq kinguneqarsinnaagami? Immaqa ilaasa ’takusinnaalissavaat suliavut ajunngitsut, taakkunuunatigullu Guuti unnersiutigilerlugu’. — 1 Pet. 2:12.