Ataatsimeersuarneq — tipaatsuffiungaartoq
1 Jehovap Nalunaajaasuisa ataatsimeersuartarneri tipaatsuffiungaartarput. Ukiut hundredit sinnerlugit ataatsimeersuarnerit taamaattut peqatigiiffitsinni amerliartortitseqataapput. Aallarnikkanit suunngitsutut ittuniit misigisimavarput silarsuaq tamakkerlugu suliat Jehovap pilluaqqusimagai. 1893-imi Illinoisimi, Chicagomiittumi, ataatsimeersuarneq siulleq nalitsinni pivoq, najuuttunilu 360-iusuni 70-t Jehovamut tunniulluinnarsimanertik ersersinniarlugu kuisipput. Siorna ataatsimeersuarnermi „Guutip oqaasianik naammassinittut“-mik qulequtalimmi, silarsuaq tamakkerlugu najuuttut 9.454.055-iusimapput 129.367-illu kuisillutik. Tamatuma nuannaarutissinnginnerpaatigut?
2 Biibilip nalaaniilli Jehovap innuttaasa ataatsimeersuartarneri Jehovamit ajoqersorneqarnerit ingerlateqqissallugit pissutaalluarput. Ezrap Nehemiallu nalaanni inatsisinik atuaanerit „ullaannguamiit ullup qiteqqunneranut“ tusarnaarneqartarput. (Neh. 8:2, 3) ’Angisuumik nuannaarfissioriartorput’ katerisimaarnerni taakkunani Inatsisit paasilluaramikkit. (Neh. 8:8, 12) Uaguttaaq ataatsimeersuartarnerit ’nuannaarutigaavut’, Jehovap „kiffaq ilumoortoq silatoorlu“ aqqutigalugu ajoqersorluartarmatigut anersaakkullu ’nerisassanik piffissaq eqqorlugu’ tunisarmatigut. (Mat. 24:45) Ataatsimeersuartarnerit anersaakkut peqqissutsitsinnut pingaaruteqarput, soorlumi Jiisusi oqartoq ’oqaaseq sunaluunniit Guutip qarnanit anisoq’ inuussutigissagipput. — Mat. 4:4.
3 Ilungersuaneq akilersinnaavoq: Ataatsimeersuarnermi „Guutip oqaasianik ilinniartitsivugut“-mi sammisassat tamaasa peqataaffiginissaat tamatta anguniagarisariaqarparput. Ullut tamaasa aggiaarnissarput sammisassallu naanissaata, amen-eeqataaffiginissaata tungaanut, najuunnissarput pilersaarutigisariaqarparput. Tamanna iluatsissappat siumut pilersaarusiortariaqarpugut. Ataatsimeersuarneq najuuffiginiarlugu sulinngiffeqarniarnissaq ajornakusoorsinnaavoq. Aalajangersimasariaqarpugut, nalaatsornerinnakkut pisussatut sumiginnaanaveersaarluta. Inissaq biiliutitsinnissarluunniit piffissaalluartukkut isumaqatigiissutigereersimasariaqarput. Qanorluunniit ilungersuanartigigaluarpat, akilersinnaavoq.
4 Qatanngutinut sineriammiittunut Nuuliarnissaq immikkut aningaasartuutaallunilu unamminiarnartuussaaq, ataatsimeersuanerulli peqataaffiginera pisinnaatitaaffissuuvoq. Saqqummiussassat katerisimaaqatigiinnisarlu pissarsiaqarfigilluarsinnaajumallugit ataatsimeersuarfissarput aaqqissugaassimavoq. Aammattaaq ulluinnarni pisartunik akornusersornissaqarata ataatsimeersuarneq pissarsiaqarfigilluarsinaavarput.
5 Ilumoorluta anguniakkavut Jehovap pilluaqqussavai: Jehovap innuttami ilungersorneri takusarpai pilluaqqusarlugillu. (Heb. 6:10) Tamatumani 1950-mi ataatsimeersuarneq „Teokratiip ineriartornera“-nik qulequtalik assersuutaalluarpoq. Oqalugiaat immikkut ittoq „Pissutsit aaqqissuussaaneri nutaat“ tusarnaarneqarpoq. Tassani qatanngutip Frederick Franzip tusarnaartini eqiiallatsippai ima aperigami: „Nunani tamani peqataaffigineqartumi ataatsimeersuariat nuannaarutigissannginnerpaat paasillugu nunassami nutaami kunngiusussat unnummi matumani peqataammata?“ Ullumikkut, ukiut 50-t qaangiussimalersut, Tussiaat 45:17-imi paasisaq tamanna suli nuannaarutigaarput.
6 Siorna ataatsimeersuarneq peqataaffigereerlugu ilaqutariinni ataataasoq qujamasulluni allappoq: „Qatanngutit, misigissagaluarparsi ataatsimeersuarneq tamanna uagutsinnut ilaqutariittut qanoq pingaaruteqartigisoq. Suliffissarsiorluta illoqarfimmut nuuppugut, anersaakkulli peqqissuserput innarlerneqarpoq. . . . Kristumiutut pisussaaffivut sumiginnarpavut, allaat ataatsimiigiartarunnaallutalu angalaartarunnaarpugut. . . . Ataatsimeersuarneq manna uagutsinnut uummarissaataaqaaq anersaakkullu anguniagaqaqqilerpugut angujumallugillu pisariaqavissunik allannguilluta.“
7 Anersaakkut nerisassat pisariaqartitavut Jehovamit pisarpavut. Ataatsimeersuaraangatta naammattorsuarnik pillertarpoq. Qujamasuutigisaqaavut. Korneliusip, apustili Paulusimik pulaarneqarami oqarsimaneratut oqartittariaqarpaatigut: „Tamattami maaniippugut Guutip kiinaata saani [Jehovap] ilinnut peqqussutigisai tamaasa tusarumallugit.“ (Ap. S. 10:33) Taamaattumik tamatta, ukioq manna ataatsimeersuarnermi „Guutip oqaasianik ilinniartitsivugut“-mik qulequtalimmi, anguniagarisigu ’Guutip kiinaata saaniinniarluta’, sammisassat tamaasa peqataaffigalugit tipaatsuutigalugillu.