„Angalaarfigisartakkavut qassissaa angalaarfigissagatsigit?“
1 Ilaanneeriarlutit eqqarsartarpit angalaartarfiit angalaarfigikulagakku assersuutaasunik savanik allanik nassaassaqarnavianngitsoq? Immaqa eqqarsarputit: ’Nalunngilara qanoq qisuariassasut. Sooq soqutiginninngippata uterfigeqqittuassavakka?’ Ilumoorpoq angalaarfigisartagarpassuit angalaarfigineqakulasarmata. Tamannali ajorinagu isumalluaannartariaqarpugut. Sooq? Tunngaviusut uku sisamat eqqarsaatigeriakkit.
2 Qinnutivut tusarneqarsimapput: Jiisusi oqarpoq: „Katersugassat amerlaqaat sulisussalli ikittuinnaallutik. Taammaattumik katersuinermi naalagaasoq qinnuigisiuk katersuinermi sulissussanik aallartitseqqullugu.“ (Luk. 10:2) Ukiuni qulikkuutaani Jehova sulisussanik qinnuigisarparput. Amerlasuunik atorfissaqartitatsinnik sulisussarsisimavugut akulikinnerusumik angalaartarfiit oqaluussiffigisinnaaniassagatsigit. Qinnutivut Jehovap akisarmagit nuannaarutigiinnassannginnerparput?
3 Qasusuinneq kinguneqarluartarpoq: Angalaartarfinni allaat oqaluussiffigineqakulasuni ilaasa Guutip naalagaaffianik tusarliussaq qisuariarfigisarpaat sallusuissullu ilinnialerlugu. Taamaattumik uteqqittuartariaqarpugut neriulluta naapertuilluartunik allanik nassaassaqartoq. (Es. 6:8-11) Jiisusip ajoqersugai siulliit assigalugit angalaarfigisartakkatsinni Guutip naalagaaffianik soqutiginnilersitsiniaalluta misileeqqittuartariaqarpugut. — Mat. 10:6, 7.
4 Assersuutigalugu Portugalimi ilagiippassuit angalaarfigisartakkaminni sapaatip-akunneri tamaasa oqaluussisarput, sulilu savanik assersuutaasunik nassaartarlutik. Qatanngut arnaq oqaluttuarpoq: „Ulloqeqqata siornagut oqaluussiartunnginninni Jehova qinnuigisarpara Biibilimik atuaqqissaarusuttumik nanisinissannut ikioqqullunga.“ Ullut ilaanni nujaleriffimmi sulisut atuaqqissaaqatigisalerpai. Kingorna ataasiinnaq atuaqqissaaqatigiinissamut takkuttalerpoq. Oqarpoq: „Ilakka soqutiginninngillat, uangali soqutiginnippunga.“ Qaammat naarianngitsoq arnaq taanna nammineq marlunnik atuaqqissaaqateqartarlerpoq. Kingunitsianngua kuisippoq, kingornalu pioneerinngorluni.
5 Suliaq suliarineqarpoq: Jiisusip siulittuutigisaatut nutaarsiassaq nuannersoq oqaluussissutigineqarpoq. (Mat. 24:14) Allaat tusarliussamut ’naalasseriitsunut’ oqaluussineq siunertaqarpoq, tassa mianersoqqussutitut. Ilaasa killitassaannginnerat sallusuissutsimulluunniit akerliunissaat piareersimaffigaavut. Qanorluunniit Jehovap eqqartuussinissaanik mianersoqquneqartussaapput. — Ez. 2:4, 5; 3:7, 8, 19.
6 Suli naammassinngilagut: Uagut aalajangigassarinngilarput oqaluussineq qaqugu naammassisasoq. Jehovap kisimi nalunngilaa qaqugu naammassiumaartoq. Ilisimavaa angalaartarfitsinni nutaarsiassamik nuannersumik suli ilassinnikkumasoqartoq. Naak ullumikkut ilaat soqutiginninnginneraraluarlutik inuunerminni allanngorianerujussuit, soorlu suliffissaaleqineq, perulunnartumik napaateqarneq ilaquttaminnilluunniit toqusoornerit, kingusinnerusukkut tusarnaarumalersinnaapput. Paqumisunneq ulapinnerluunniit pissutigalugit inuppassuit tusagassamut oqaluussissutigisatsinnut iluamik tusarnaarumasarsimanngillat. Inussiarnisaarfigalugit pulaaqqittarutsigit tusarnaarusuleratarsinnaapput.
7 Aammattaaq peroriartortoqartuaannarpoq ilaqutariilersunik, pissutsinik eqqarsaatiginnittunik Guutillu oqaasiani taamaallaat akineqarsinnaasunik apeqqutilinnik. Arnaq inuusuttoq Jehovap Nalunaajaasuinik isertitsisimasoq oqarpoq: „Meeraallunga paasisinnaanngilara sooq anaanama Jehovap Nalunaajaasui itigartittarai oqartarlunilu soqutinninnani, naak Biibili pillugu oqaloqatiginiaannaraluaraanni. Taamani aalajangerpunga inersimasunngoruma, katillunga namminerlu angerlarsimaffeqalerlunga Jehovap Nalunaajaasuinik isertitsiniarlunga Biibilimillu oqaluttuuteqqullunga.“ Taamaaliorporlu oqaluussisartunut assut nuannaarutaasumik.
8 Pikkorinnerulersinnaavugut? Pulaakkatta immaqa tamatigut pisuussutigineq ajorpaat angalaartarfipput angalaarfigisaqattaarlugu nuannerunnaaraangat. Ilaatigut nammineq kukkussuteqartarpugut. Isumalluanngivilluta angalaartarpugut? Tamatuma sunnersinnaavaatigut, tamannalu uagutsinni takuneqarsinnaallunilu tusaaneqarsinnaassaaq. Taamaattumik isumalluartuugit, ingammillu inussiarnisaarit. Allaanerusumik saqqummiussigit. Aallarniutitit allanngorartikkit, imminullu nutarsarit. Aallarniutigalugu immaqa allamik apeqquteqarsinnaavutit imaluunnit oqaloqatigiinnermi allassimaffimmik allamik atuillutit. Qatanngutit angutit arnallu allat aperikkit oqaluussiffimminni suna sunniuteqarluartutut misilittagarineraat. Oqaluussisartunik pioneerinillu assigiinngitsunik angalaaqateqartarit, maluginiarlugulu oqaluussigaangata suna sunniuteqarluartarnersoq.
9 Oqaluussineq Jehovap pilluaqquaa, oqaluusseqataanikkullu Tassunga inoqatitsinnullu asanninnerput takutittarparput. (Mat. 22:37-39) Kiffartornerput naammassitigu angalaarfigisartakkatalu uteqattaarfiginissaa nikalluutiginagu.