Aliikkusersuutit eqqortumik inissaqartikkit
1 Ulluni makkunani ajornartuni tamatta ilaanneeriarluta qasuersernissaq pisariaqartittarparput. Nuannaarniutit inissaqartarput. Nuannaarniutinulli aliikkusersuutinut aliikkusersuuteqateqarniartarnermullu piffissaq atorpallaaraanni anersaakkut suliniutit piffisaaruffiginngitsoorneqarsinnaapput. Aliikkusersuutit eqqortumik inissaqartittariaqarpagut. (Mat. 5:3) Qanoq ililluta? Siunnersuutit Efesosimiut 5:15-17-miittut malinnerisigut.
2 Killiliigit: Paulusi allappoq kristumiut ’qanoq inuunerminnik sianigisariaqartut’ — ilisimassuseqartumik. Piffissaq aliikkusersuutinut atorneqartillugu imminut aqussinnaasariaqarpoq ingasaassinaveersaartuullunilu. Pitsaassaaq eqqarsatigeqqissaassallugu sunngiffipput qanoq atortarneripput. Aliikkusersuutit ajunngitsumik siunertaqartariaqarput piffissaajaataaginnarnatik qasusaataaginnarnatillu. Arlaatigut aliikkusersuinerup kingorna qamuuna imaqanngitsutut, naammaginninngitsutut imminulluunniit pisuutittutut misigiguit piffissamik atueriaatsimik allamik allannguisariaqarnermik takutitsisuuvoq.
3 Sianissuseqarit: Paulusi siunnersuivoq pingaaruteqarnerusunut ’piffissaqqissoq atoqqullugu’ ’sianiitsutut ilioqqunata’. Kristumiut kuisimasut inuunerat aliikkusersuutaasinnaanngilaq. Sunngiffimmi angalasaqattaarnerit sivisuut piffissaajaataallutillu akissaajaataasinnaapput. Amerlasuutigut oqaluussinissamut ataatsimiigiarnissamullu akornutaasinnaapput. Ilumoorpoq qasuersernerup timikkut nukissaqalersittaraatigut, anersaakkulli nakussatsinniarutta Guutip nukinga pisariaqartipparput. (Es. 40:29-31) Teokratiimut tunngasut anersaava aqqutigalugu pisarparput — atuaqqissaanermi, ataatsimiinnernut najuunnermi oqaluussinermilu — aliikkusersuutitiguunngitsoq.
4 Pingaarnersiuilluarit: Paulusi oqarpoq: „Guutilli naalagaaffia ujaqqaarsigik.“ Jiisusip ajoqersorpaatigut Guutip naalagaaffia inuunitsinni salliutittariaqaripput. (Matt. 6:33) Jehovamut tunniusimanerput naapertorlugu inuussagutta allamik iliuuseqartinnata akisussaaffigisavut naammasseqqaartariaqarpavut. Kingornalu aliikkusersorniarutta eqqortumik inissaqartissavavut. Taamaalillutik ajunngitsumik sunniuteqassapput nuannaarutiginerulersinnaassavagullu. — Oqa. 5:12.