Silarsuup anersaavanit toqunartulerneqaqqajaavit?

SEPTEMBARIP ulluisa 12-ianni 1990-imi Kazakstanimi fabrikkimi qaartoorneqarpoq. Aalanngortut radioaktiviusut tamaanimiut 120.000-it peqqissusiannut navianartut silaannarmut siammarput, inuppassuillu toqunartumik aniasoornermut akerliussutsiminnik takutitsiniarlutik aqqusinerni katersuupput.

Erniinnarli inuit paasilerpaat ukiuni qulilinni arlalinni toqunartunik avatangiiseqarsimallutik. Ukiut ingerlaneranni igitassat radioaktiviusut 100.000 tonsit nakkutigineqaratik silami toqqortarineqarsimapput. Naak qanittumi navianartoqaraluartoq kialuunniit soqutigisimanngilaa. Sooq?

Ullut tamaasa timersortarfissuarmi qinngornerit radioaktiviusut annertussusiat takutinneqartarpoq. Taamaattumik inuit navianartorsiunngitsutut misigipput. Kisitsisit eqqoraluarput, kisianni qinngornerit gamma-mik taaneqartut kisimik nalunaarutigineqartarput. Qinngornerit alfa-mik taaneqartut aamma taama toqunartigisut misissorneqarsimanngillat. Anaanaasut amerlasuut paasilerpaat sooq meeqqatik taama napparsimakulatigisut.

Anersaakkut ittumittaaq takussaanngitsumit toqunartulerneqarsinnaavugut. Kazakstanimi inuit nalullugu ajortumeerfigitittut assigalugit inuit amerlanersaasa naluaat inuunertik navianartorsiortoq. Biibilimi mingutsitsineq tamanna tassaanerarneqarpoq ’anersaaq silamiusoq’ Satan Diaavulumit pisoq. (1 Korintumiut 2:12) Guutip akerartortersuata ajoqaluni anersaaq — imaluunniit isuma atugaanerpaaq — tamanna silamiusoq atortarpaa Guutimut tunniusimanerput aserorniarlugu.

Anersaap silamiusup qanoq ililluni anersaakkut nukeerutsissinnaavaatigut? Isinut pilerinartunik kajungerisaqalersissinnaavaatigut namminissarsiornerpullu inunnguusaasoq atorsinnaallugu. (Evfisumiut 2:1-3; 1 Juánase 2:16) Maanna sammisassat pingasut misissussavavut, tamakkunatigut anersaakkut ittunik pingaartitsinerput silamiutut eqqarsariaatsimit mingutsinneqarsinnaammat.

Guutip naalagaaffia piniaqqaaruk

Jesusip kristumiut kajumissaarsimavai ’Guutip naalagaaffia iluarnerlu taassuma pia piniaqqaaqqullugu’. (Matiuse 6:33) Tamatumunnga akerliusumik anersaap silamiusup sunniineratigut nammineq soqutigisavut iluarisavullu pingaartippallaalersinnaavavut. Aallaqqaammut immaqa anersaakkut ittut sumiginnarluinnanngikkaluarpavut, kisianni pingaannginnerusutut isigilersinnaavavut. Kazakstanimiutut eqqaaneqareersutut navianaat sumiginnarsinnaavarput kukkulluta isumannaatsutut misigigutta. Ukiut arlallit aalajaalluta kiffartorsimagutta anersaakkullu qatanngutivut pingaartikkutsigik immaqa isumaqalersinnaavugut sallusuissut qimanngisaannassallugu. Qularnanngitsumik Efesusitoqqami ilagiinni amerlasuut taama misigisimapput.

Ukiup 96-ip missaani u.n.k. Jesus taakkununnga ima oqarpoq: ’Kisianni assuaraakkit asannissutsit siulleq soraarukkakku.’ (sarĸúmersitat 2:4) Kristumiut taakku sivisuumik kiffartorsimasut ajornartorsiuterpassuit atorsimavaat. (sarĸúmersitat 2:2, 3) Utoqqaanertanit aalajaatsunit, ilaatigut Paulusimit, ajoqersorneqarsimapput. (apustilit suliait 20:17-21, 27) Ukiulli ingerlaneranni Jehovamut asanninnerat nillertunngorsimavoq, anersaakkullu nukeerussimapput. — sarĸúmersitat 2:5.

Qularnanngitsumik Efesusimiut ilaat illoqarfimmi tassani niuernermit pigissaarnermillu sunnerneqarsimapput. Ajoraluartumik ullumikkut kristumiut ilaat innuttaaqatigiinni nunap piinik pingaartitsivallaarnermit sunnertissimapput. Inuulluarnartumik inooriaaseqarusunneq pinngitsoorani anersaakkut anguniagaqarunnaarnermik kinguneqartarpoq. — Naleqqiuguk Matîuse 6:24.

Tamanna pillugu Jesus mianersoqqusilluni oqarpoq: ’Isi timip qaammaqqutigaa. Taamaattumik isit peqqusersuippat, timit tamarmi qaamasormiussaaq; isilli ajorpat, timit tamarmi taarmiussaaq. (Matiuse 6:22, 23) Isi ’peqqusersuitsoq’ tassaavoq isi anersaakkut ittunik sammisaqartuartoq, Guutip naalagaaffianik pingaarnerutitsisoq. Akerlianilli, isi ’ajortoq’ tassaavoq isi maannakkut ittunut sammiuaannartoq, uinngup pilerigisaanik taamaallaat isigisaqarsinnaasoq. Anersaakkut ittut siunissamilu pilluaqqussutissat takusinnaanngilai.

Versimi siulianiittumi Jesus oqarpoq: ’Uummatissimi pequutisi najortarpaat.’ (Matiuse 6:21) Qanoq ililluta nalunngissinnaavarput uummaterput anersaakkut ittunik nunalluunniit piinik pingaarnerutitsinersoq? Immaqa oqaluuserisartakkavut tamatumunnga ersiutaalluarput, tassami ’uummatip ulikkaarutaanit qaneq oqaluttarmat’. (Lúkarse 6:45) Tamatigut nunap pii silarsuarmiluunniit anguniagassat oqaluuseriuaannarutsigik ersarissaaq uummaterput avissimasoq anersaakkullu ittunik isiginnissinnaassuserput amigaateqartoq.

Carmenip, qatanngutip arnap Spaniamiup, tamanna ajornartorsiutigisimavaa.a „Sallusuissummi perorsarneqarsimavunga,“ Carmen nassuiaavoq, „18-inilli ukioqarlunga namminersorlunga meeqqerivimmik pilersitsivunga. Ukiut pingasut kingorna sisamanik sulisoqarpunga, suliffiutiga ingerlalluartorujussuuvoq aningaasarsiorluarpungalu. Tulluusimaarpunga aningaasatigut namminersorsinnaagama iluatsitsigamalu. Ilumoorlunga oqassaguma uummatima suliffiga najorpaa — tamanna pingaarnerutippara.

Isumaqarsimavunga Jehovamut nalunaajaasuulluarsinnaallunga piffissama annersaa suliffinnut atuutigalugu. Saniatigulli misigivunga Jehovamut kiffartornermi iliuuseqarnerusinnaagaluarlunga. Kiisami ikinngutima marluk pioneeriusut maligassiaata Guutip naalagaaffianik pingaarnerutitsinissannut kajumissisippaanga. Aappaa, Juliana, ilagiinni ilaaffigisanniippoq. Pioneerinngornissannut kimigiiserfiginngilaanga, oqaasiisali kiffartornerminillu nuannaarutiginninnerata ikiorpaannga anersaakkut anguniagassanik eqqarsaatiginninnissannut.

Kingusinnerusukkut USA-mi feriarlunga Gloriami pioneerimi najugaqarpunga. Ungasinngitsukkut uillarsimavoq, paneqarlunilu tallimanik ukiulimmik, anaananilu kræfteqartoq paarisarlugu. Taamaattorli pioneeriuvoq. Taassuma maligassiaanit kiffartornermillu pingaartitsineranit assut killinneqarpunga. Ullut sisamat najoreerlugu aalajangerpunga Jehova pingaarninngortissallugu. Siullermik nalinginnaasumik pioneerinngorpunga, ukiualuillu tamatuma kingorna uigalu Betelimi kiffartornissatsinnut qaaqquneqarpugut. Suliffiga — anersaakkut siumukarnissannut akornutaasoq — taamaatippara, maannalu misigivunga inuunera Jehovap isaani iluarinarnerulersoq, tamannalu pingaarnerpaavoq.“ — Lúkarse 14:33.

Carmenitut ’sorliit pingaaruteqarnerunersut misilittarnissaat’ ilikkarutsigu suliffeqarneq, ilinniagaqarneq, illoqarneq inooriaaserlu pillugit pitsaasumik aalajangiisinnaassaagut. (Filípimiut 1:10, NV) Aammali aliikkusersuutit eqqarsaatigalugit misiliisinnaavugut sorliit pingaaruteqarnerunersut? Tamatumanittaaq anersaaq silamiusoq sunniuteqartorujussuuvoq.

Sunngiffimmi sammisassat eqqortumik inissaqartikkit

Anersaap silamiusup inuit pissusissamisoortumik qasuersaarnissamik pisariaqartitaat iluatsitaarniartarpaa. Inuit amerlanersaat siunissamut neriuutissaqannginnamik tupinnanngitsumik inuunertik aliikkusersuutinik sukisaarsarnermillu ulikkaartarpaat. (Naleqqiukkit Jesaja 22:13; 1 Korintumiut 15:32.) Sukisaarsaatit pingaarnerutippavut? Taamaappat anersaaq silamiusoq eqqarsariaatsitsinnut sunniuteqalersimassaaq.

Biibilimi ima mianersoqqussuteqarpoq: „Nuannaarniarumatooq ajorsalersittussaavoq.“ (Ussatit 21:17) Nuannaarniarneq ajunngissinnaagaluarpoq, kisianni pingaarnerutippallaarutsigu anersaakkut amigaateqalernermik kinguneqassaaq. Anersaakkut ittunik nererusussuseerukkiartussaagut, nutaarsiassamillu nuannersumik oqaluussinermut piffissaarukkiartussalluta.

Taamaattumik Guutip oqaasiani kajumissaarneqarpugut ’isumatsigut qiterusersimalluta putumatsaalissasugut’. (1 Pîtruse 1:13) Imminut naalakkersinnaaneq pisariaqartipparput sukisaarsaatit ingasaatissanngikkutsigik. ’Qiterusersimaneq’ ima paasisariaqarpoq anersaakkut sulinissamut, tassa atuaqqissaarnissamut, ataatsimiigiarnissamut oqaluussinissamulluunniit, piareersassasugut.

Qasuersaartariaqaruttami? Qasuersaarniaraangatta ilerasuuteqassaagut? Naamerluinnaq. Qasuersaarneq pisariaqarpoq, ingammik ullumikkut silarsuarmi ulapaarfiusumi inuugatta. Taamaattorli kristumiutut tunniulluinnarsimagatta sukisaarsarneq inuunitsinni pingaarnerpaajusinnaanngilaq. Sukisaarsaatit amerlavallaarpata siunertaqarluartumik iliuuseqannginnerujartussaagut. Piffissap nukinginnassusia misigisimajunnaassavarput allaallu imminut nukatsippallaalersinnaalluta. Qanoq ililluta qasuersaarneq eqqortumik isigisinnaavarput?

Biibilimi paasitinneqarpugut qasuersaalaarneq suleruloorpallaarnermit pitsaanerusoq — ingammik nunap piinut tunngasunik sulineq pisariaqanngikkaangat. (Nalunaajaasup oqaasii 4:6, NV) Timerput qasuersaartariaqarpoq nukissaqaleqqeqqullugu, anersaakkulli ittumik nukissaqalernissaq Guutip pissaaneranit sulissutiginnittumit pisarpoq. (Jesaja 40:29-31) Anersaaq illernartoq tamanna kristumiutut suliniuteqarnitsinnut atatillugu pisarparput. Atuaqqissaarnikkut uummaterput inuussuteqartinneqartarpoq eqqortumillu kissaateqalertarluta. Ataatsimiinnerit najuuffigigaangatsigik Pinngortitsisitsinnut pingaartitsinerput ineriartortinneqartarpoq. Kristumiutut kiffartornermi peqataagaangatta allanut misiginneqataanerput alliartortarpoq. (1 Korintumiut 9:22, 23) Paulusip piviusorsiortumik eqqartorpaa ’naak inuuserput qalleq aseroraluartoq, taamaattoq ilorleq ullut tamaasa nutaanngoriartortoq’. — 2 Korintumiut 4:16.

Ileana, anaanaq arfinilinnik meeralik uppinngitsumillu uilik, ulapittuaannarpoq. Inoqutiminut eqqarliminullu allanut akisussaaffeqarpoq, taamaattumik suliuaannartariaqarluni. Taamaattoq oqaluussinermi ataatsimiinnernullu piareersarnermi maligassaalluarpoq. Qanoq ililluni tamanna sapinngilaa?

„Ataatsimiinnerit oqaluussinerullu ikiortarpaannga akisussaaffinnik allanik naammassinninnissannut,“ Ileana nassuiaavoq. „Assersuutigalugu, oqaluussereeraangama illumi suliaqartillunga eqqarsaatigisassaqartaqaanga. Sulitillunga erinarsortarpunga. Akerlianillu, ataatsimiinnerit ilaannut ornigutinngitsoorsimagaangama oqaluussinermiluunniit peqataavallaanngikkaangama illumi suliassat artornarnerusarput.“

Ila, sukisaarsarnerup pingaartinneqarpallaarneranut akerliulluinnarmat!

Anersaakkut pinnissuseq Jehovap nuannaraa

Silarsuarmi inuit qallikkut isikkoq pingaartinnerujartuinnarpaat. Aningaasarpassuit atorneqartarput kusanarnerusumik inuusuppalunnerusumilluunniit isikkoqalernissaq anguniarlugu. Ilaatigut eqqaaneqarsinnaapput nujalersinneq, nutsanik qalipaaneq, arnat iviangiinik allisitsineq kiinnakkullu tasitsinneq. Inuit millionilikkuutaat sanigorsartarput timigissartarlutillu. Isumaqalersinniarneqartarpugut pilluarnissamut aqqut tassaasoq timikkut isikkorput, allanullu malugitinnissarput pingaarnerpaasoq.

USA-mi misissuinermi atuagassiami Newsweek-imi issuarneqartumi eqqaaneqarpoq Amerikamiut inuusuttut qaqortumik amillit 90 procentiisa „isikkortik naammaginngikkaat“. Pitsaalluinnartumik isikkoqarnissaq anguniaraanni anersaakkut ittunik pingaartitsineq sunnerneqarpoq. Dorap, Jehovap nalunaajaasuisa ilaata inuusuttup, pualanini kanngusuutigisarsimavaa. „Pisiniaraangama atisat naammagisakka naniuminaattaqaat,“ taama nassuiaavoq. „Atisat mutit inuusuttunut amitsunut taamaallaat sananeqartarput. Ajornerusumillu, inuit pualanera pillugu nikanarsaataasumik oqaaseqartarput, tamannalu assut kamaatigisaqaara, ingammik anersaakkut qatanngutikka taamaalioraangata.

Tamatuma kingunerisaanik isikkora sammiuaannarpara, anersaakkullu nalillit inuuninni tunulliutillugit. Soorlulusooq qitima silissusia pilluarninnut aalajangiisuusoq. Maanna ukiut arlallit qaangiupput, maannalu arnatut kristumiutullu inersimasunngornerugama allatut isiginneriaaseqalerpunga. Naak isikkora soqutigigaluarlugu paasisimavara anersaakkut pinnissuseq pingaarnerusoq, tamannalu annerpaamik nalerisimaartitsisartoq. Tamanna paasilerakku Guutip naalagaaffiata soqutigisai eqqortumik inissisimaffeqartissinnaalerpakka.“

Sara arnaq aalajaatsoq itsaq inuusimasoq tamatumunnga assingusumik oqimaaqatigiissumik isumaqarsimavoq. Naak Biibilimi eqqaaneqaraluarluni 60-t sinnerlugit ukioqarluni pinneqisoq, pingaartumik inuttut pissusii — inuk isertugaq uummatip pia — erseqqissarneqarput. (1 Moses 12:12; 1 Pîtruse 3:4-6) Ileqqorissuuvoq saamallunilu, uiminullu naalatsigitilluni. Sarap allat imminut isumaqarnerat soqutigivallaanngilaa. Naak pigissaartutut tunuliaqutaqaraluarluni ukiut 60-t sinnerlugit kajumilluni tupermi inuuvoq. Maniguulluni namminissarsiornanilu uini tapersersorpaa; arnaavoq upperluartoq. Pissuserisani tamakku pissutigalugit arnatut pinneqaaq. — Ussatit 31:30; Eprîarit 11:11.

Kristumiutut anersaakkut pinnissuserput pitsaanerulersinniarparput. Pinnissuseq tamanna ineriartortikkutsigu alliartuinnassaaq atajuassallunilu. (Kulorsamiut 1:9, 10) Anersaakkut pissuserisavut marlutsigut ineriartortissinnaavavut.

Jehovap isaani pinnernerulersarpugut kiffartornerput inuunartoq peqataaffigigaangatsigu. (Jesaja 52:7; 2 Korintumiut 3:18–4:2) Aamma kristumiutut pissutsit ineriartortikkaangatsigik pinnernerulersarpugut. Anersaakkut pinnernerulernissatsinnut periarfissaqaqaagut: ’Qatanngutigiissutut asaqatigiigitsi ungagiillusi. Ataqqeqatigiigitsi ingiaqattaallusi. . . . Anersaakkut ilungersuagitsi. . . . Illusisitsisarniaritsi. . . . Tipaatsuttut tipaatsoqatigisigik, qiasullu qiaqatigisigik. . . . Ajortumik iliortoq ajortumik akileqinasiuk. . . . Inuit tamaasa eqqissiveqatiginiarsigik.’ (Rûmamiut 12:10-18) Pissutsit taamaattut ineriartortikkutsigik Guutimut inoqatitsinnullu iluarisaassaagut, ajortulioqqajaasarnittalu kingornussaasup pinniitsup malunnaatai millisinneqassapput. — Galâsiamiut 5:22, 23; 2 Pîtruse 1:5-8.

Anersaaq silamiusoq akiorsinnaavarput!

Silarsuup matuma anersaavata toqunartup assigiinngitsutigut assuarnaassuserput aserorsinnaavaa. Pigisatsinnik naammaginnikkunnaarsissinnaavaatigut, pisariaqartitatsinnik soqutigisatsinnillu Guutip soqutigisaanit pingaarnerutitsilersilluta. Imaluunniit Guutip eqqarsaataanut taarsiullugu inuit eqqarsaataannik eqqarsartissinnaavaatigut, taamaalilluni sukisaarsarnermik timikkullu pinnissutsimik pingaartitsivallaalersilluta. — Naleqqiuguk Matîuse 16:21-23.

Satanip anersaap piinik pingaartitsinerput aserorniarpaa, taamaaliornerminilu pingaartumik anersaaq silamiusoq atortarlugu. Eqqaamajuk Diaavulup liivertut uiannisaartutut saassusseriaatsini allanngorartissinnaavai pulateriaarsuttut mianersortutut periaaseqarluni. (1 Moses 3:1; 1 Pîtruse 5:8) Ilaannikkut silarsuup kristumiu ajugaaffigisinnaasarpaa sualuttumik malersorlugu, amerlanerusutigulli arriitsumik toqunartulersorlugu taamaaliortarpoq. Paulusip navianaat kingulleq tamanna isumakuluutigineruaa: ’Ernumavungali, soorlu pulateriaarsuup peqqusersuulluni Eva salloqittaraa, taamattaaq ilissi eqqarsaatisi aserussasoralugit Kristusimut peqqusersuikkunnaarsillusi.’ — 2 Korintumiut 11:3.

Pulateriaarsuup peqqusersusaarneranit illersorneqassagutta sunniiniarneq ’silarsuarmit pisoq’ ilisimasariaqarparput akiortariaqarlugulu. (1 Juánase 2:16) Immitsinnut salloqittassanngilagut isumaqarluta silamiutut eqqarsariaaseq naviananngitsoq. Satanip aaqqissuussaanerani anersaaq toqunartoq ullumikkut aatsaat taama navianartigilersimavoq. — Evfisumiut 2:2.

Silamiutut eqqarsariaaseq paasigutsigu assortorsinnaavarput isumarput uummaterpullu Jehovap minguitsumik ajoqersuutaanik immertarutsigik. Kunngi Daviditut oqartariaqarpugut: „Ingerlavigeqqusannik ilinniartinnga, Jehova, aqqutigeqqusannik ajoqersuunnga! Sallusuissutsikkut ilitsersunnga ajoqersunngalu, illit tassaagavit Guutiga annatsitsisigalu.“ — Tussiaat 25:4, 5. (wE 1/10 97)

[Quppernerup ataani ilanngussaq]

[Qupp. 22-mi assiliartaq]

Inuulluarnartumik inooriaaseqarusunneq anersaakkut ittunik anguniagaqarunnaarnermik kinguneqartarpoq