Oqaluussineq nuannaarutigineruleruk
1 Tusagassamik nuannersumik oqaluussineq nuannaarutigisarpiuk? Mianersunngikkutta silarsuup ajortup inuuffigisatta ersilersissinnaavaatigut oqaluussinermik nuannarinnikkunnaarsilluta. Oqaluussiffigisartakkatsinni soqutiginninnginnerup aamma nikallulersissinnaavaatigut. Oqaluussineq nuannarinerulerumallugu qanoq iliuuseqarsinnaavugut?
2 Isumalluartuugit: Isumalluartuuneq iluaqutaavoq. Ilaatigut tamaaliorsinnaavugut ’Guutip suleqataatut’ pisinnaatitaaffissuup eqqarsaatigeqqissaarneratigut. (1 Kor 3:9) Aamma Jiisusip suliamik tamatuminnga suleqatigaatigut. (Matt 28:20) Inngilerpassuaminillu tapersersorpaatigut. (Matt 13:41, 49) Taamaattumik qularutigissanngilarput suliatsigut Guutip siulersoraatigut. (Saqq 14:6, 7) Qanorluunniillu inuit oqaluussinerput qisuariarfigigaluarpassuk qilammi nuannaarnersuaqarpoq.
3 Piareersarluarit: Piareersarluarsimaneruttaaq nuannaanerulerulersissinnaavaatigut. Piareersarneq pisariissorssuusariaqanngilaq. Minutsialuinnaat atorlugit atuagassiani nutaani qaammammiluunniit neqeroorutissami suna saqqummiutissanerlugu eqqarsaatigisinnaavarput. Naalagaaffimmi Kiffartorneq-meersumit ungalusami „Atuagassiat qanoq neqeroorutigineqarsinnaasut“-mit saqqummeeriaatsimik toqqaagit. Naalagaaffimmi Kiffartorneq-mi januaari 2002-moortumi quppernerni qiterlerni siunnersuutit oqaluussinermi atugassat qimerluualaakkit, imaluunniit ’Ræsonnerebogimi’ aallarneeriaatsimik sunniuteqarluartumik qinaasigit. Uteqattaalaarlugu sungiusaruk angalaaqatissalluunniit sungiusaqatigiuk, taava sapiutissanngilatit atoriaannanngorlugulu. Akerliliineq aalajangersimasoq akiuminaatsitat arlaleriarlugu naammattoorsimagukku pulaakkannut soqutiginnilersitsisumik qulequttamik allamik eqqartuilersinnaanngorlutit piareersarit. Tamatumani ’Ræsonnerebogi’ iluaqutaalluinnassaaq. Atortorissaarutit taakkua atortarutsigit, toqqissisimaneq nuannaarluta oqaluussinissatsinnut pisariaqartoq misigissavarput.
4 Qamannga pisumik qinuneq: Qinuneq nuannaartuarnissatsinnut pingaaruteqarluinnarpoq. Jehovap suliaa suliarigatsigu, taasuma anersaava qinnutigisariaqarparput, nuannaarnerlu anersaat inerititaannut ilaavoq. (Gal 5:22) Oqaluussiuarnissatsinnut Jehovap nakussatsissavaatigut. (Fil 4:13) Kiffartornitsinni Jehovap siulersuinera qinnutigisarutsigu, nuanniitsunik misigisaqaraangatta pissutsit eqqortumik isiginissaannut iluaqutigissavarput. (ApS 13:52; 1 Pet 4:13, 14) Siooragutta nalorniguttaluunniit nakimaalluta nuannaarlutalu aalajaattuarnissatsinnut qinunerup ikiussavaatigut. — ApS 4:31.
5 Periarfissarsiorit: Oqaluussitilluta inuit angerlarsimaffianni naapikkaagatsigit soorunami kiffartornerput nuannaarutiginerpaasarparput. Piffissani assigiinngitsuni illumiit illumut angalaarsinnaanissat siunertaralugu kiffartornissat aaqqissuuguk. Immaqa ualikkut unnulaalerneraniluunniit angalaaruit angusaqarnerussaatit. Aqqusinikkoortilluni, pisiniartilluni, bussertilluni pisuttuarluniluunniit inuit naapitassaasarput. Soormi aallarneeriaatsimik naatsunnguamik piareersagaqaruit inunnullu inussiarnerpasissunut saaffiginnittarlutit? Qularnanngitsumillu amerlanersatta ulluinnarni inuit allat suliffimmi atuarfimmiluunniit attaveqarfigisarpaat. Immaqa qulequttamik soqutiginnilersitsisumik Biibilimeersumik oqaaseqalaaginnarnikkut oqaluussilersinnaavutit. Naalagaaffimmi Kiffartorneq-mi 2002-mi januaarimooortumi qupperneq 3-mi atoriaannaasatsinnik siunnersuuteqarpoq. Siunnersuutit tamakkua atortarutsigit, ilimanarluinnarpoq oqaluussineq nuannaarutiginerulissagipput.
6 Nuannaarnerup aalajaattuaannartissinnaammatigut nuannaartuarnissarput pingaaruteqarpoq. Oqaluussinersuaq kingorna nangeqqinngisaannartussaq naammassippat akissarsisinneqangaassaagut. Tamanna eqqarsaatigalugu oqaluussinermi nuannaarnerulersinnaavugut. — Matt 25:21.