Napasuliaq Alapersaarsuiffik Iteritsi!-lu iluaqutigiuakkit
Naluneqanngitsutut Napasuliaq Alapernaarsuiffik Iteritsi!-lu pisartagarineqarsinnaanngillat, taamaattumillu tamatta immikkut qulakkeerniartariaqarparput oqaluussiffigisartakkatta namminerlu pissatsinnik atuagassiat normui tamakkerlugit piniartarnissaat.
Nammineq pissat: Illit ilaquttatillu atuagassiat pissasi atuagassianut pisartakkassinnut ilanngullugit inniminnernissaat isumagikkit. Angajoqqaat isumagisariaqarpaat ilaqutariinniittut tamarmik nammineq pissaminnik peqarnissaat. Nammineq pigisat atsiorneqarpata oqaluussinermi allanut tunniuttoorneqassanngilat. Ilagiit atuagassiat tiguppatigit, qatanngutip atuagassianik paarsisup ingerlaannaq tiguneqarnissaat isumagissavaa.
Atuagassianik pajuttakkat: Atuagassianik pajuttagaqaraanni, atuagassiat normui tamaasa soqutiginnittunut tunniunneqarnissaat isumagineqartariaqarput. Nammineerluni tunniussiartornikkut soqutiginninnerulersitsinissamut Biibilimillu atuaqqissaaqateqalernissamut periarfissaqarluarnerussaaq. — Naalagaaffimmik Kiffartorneq oktobari 1998-moortoq, qup. 8 takuuk.
Pisariaqartitsinerusut: Ilumoorluni soqutiginnittumik naapitaqaruit avinngarussimasumili najugaqartumik, immaqa taava isumaqatiginiarsinnaavat allakkatigut nassittarsinnaallugu. Taamaalillutit atuagassianik saqqummersunik tamanik pinissaa qulakkeersinnaavat allaffigilaarnissaanut, naqitaaqqanik allanilluunniit tusarliussamut soqutiginninnerulersitsisunik ilanngussinissannut periarfissaqalissaatit. Periarfissarsiullaqqissuugit eqqumaniarlutillu piumasut tamarmik atuagassiat normuinik tamanik pisinnaaqqullugit.
Atuagassiat immikkut sammisallit: Ilaatigut atuagassiat allaaserisanik aalajangersimasunik angalaarfigisartakkatsinni, soorlu niviarsianut, politiinut il. il. immikkut soqutiginarsinnaasunik sammisaqartarput. Soormi eqqarsaatigeqqissaarnianngiliuk taakkorpiaat atorlugit angalaarfigissartakkanni soqutiginnilersitsisinnaanerlutit? Kiffartornermut nakkutilliisup tamanna eqqumaffigilluinnassavaa pitsaasumilli isumassarsiaateqaruit tamanna pillugu oqaloqatigiuk. Taamaalilluni immikkut suliniuteqarneq pilersaarusiorneqassaaq oqaluussisartullu pineqartunut atuagassianik assigiinnik tunniussisuunnginnissaat pinngitsoortinniarlugu torersumik ingerlanneqassalluni.
Napasuliaq Alapernaarsuiffik-mik Iteritsi!-millu sapinngisatsinnik soqutiginnilersitsiniaagutta qularutigissanngilarput atortorissaarutit pingaaruteqangaartut taakkua atorlugit Naalagaaffik pillugu oqaluussilluta ilungersornitsinnik Jehovap pilluaqqujuassagaatigut.