Biibilimik atuaqqissaaqateqarnissamut piareersimajuarit
1. Jiisusip peqqussutaanik naammassinninneq Matthæusi 28:19, 20-mi qanoq isumaqarpa?
1 Jiisusip ima peqquaatigut: “Ajoqersuganngortissigit . . . , ajoqersorlugillu.” (Matt 28:19, 20) Taamaattumik, sapaatip akunnerani immikkut Biibilimik atuaqqissaaqateqarnissamik neqeroorfimmiinnaanngitsoq, Biibilimik atuaqqissaaqateqalernissamut tamatigut piareersimarusuppugut. Siunnersuutit tulliuttut ikiorsinnaavaatigut.
2. Kikkut Biibilimik atuaqqissaanissamik neqeroorfigisinnaavavut?
2 Neqeroorit: Biibilimik atuaqqissaaqateqarnissamik neqeroortarutta atuaqqissaaqateqalernissarput ilimanarnerussaaq. (Oqal 11:6) Torrutiinnarlugu neqeroorlutit misilinnikuuiuk? USA-mi ilagiinniittut tamanna qaammammi ataatsimi anguniagarisimavaat. Atuaqqissaaqatitaarineqartut 42-t nutaat aallartinneqarmata qiimmattaatigeqaat! Ilimagissanngilat Biibilimik atuaqqissaaqateqarniarnerit soqutiginnittut ilisimassagaat. Soormi tulliani pulaaqqikkukkit Biibilimik atuaqqissaaqatiginissaannik neqeroorfigigukkit? Itigartippatsit akornutaanavianngilaq, soqutiginninneralli ineriartorteqqiinnarsinnaavat. Sanilitit, ilaquttatit, suleqatitit atuaqatitilluunniit Biibilimik atuaqqissaaqateqarusunnersut aperinikuuigit? Aamma atuaqqissaaqatigisartakkatit aperisinnaavatit Biibilimik atuaqqissaarusuttunik ikinnguteqarnersut imaluunniit ilaqutaqarnersut.
3. Biibilimik atuaqqissaaqateqarnialerutta iluaqutissaq pitsaasoq suna pigaarput, qaqugulu atorsinnaassavarput?
3 Iluaqutissaq: Biibilimik atuaqqissaaqateqalerniarnermi naqitaaraq Sallusuissut paaserusuppiuk? iluaqutaalluarsinnaavoq. Atuagassianik allanik tigusinngikkaluarpataluunniit pulaakkannut tunniussinnaavat. Niuertarfeqarfinni, aqqusinermi oqaluussinermi allakkanillu nassitsinermi pulaaqqiinermilu atorneqarsinnaavoq. Angerlarsimanngitsunut aamma nakkartiinnarneqarsinnaavoq. Soormi busserlutit, pisiniarfiliarlutit suliartorlutilluunniit nassarukku? Tunuani Biibilimik akeqanngitsumik kursusertitsinissamik neqeroorut naatsumik nassuiarneqarpoq atuagarlu Biibilimi sorpiaat ajoqersuutigineqarpat? innersuussutigineqarluni.
4. Naqitaaraq Sallusuissut paaserusuppiuk? atorlugu qanoq Biibilimik atuaqqissaaqateqarneq aallartissinnaavarput?
4 Oqaloqatigisannut naqitaaraq tunniukkukku apeqqutit saqqaaniittut tikkuarsinnaavatit aperalutillu: “Apeqqutit ukua arlaata akineqarnissaa soqutigineruiuk?” Naqitaaqqami akissutaa sammisiuk. Biibilimik akeqanngitsumik kursusertitsinissamik neqeroorut tunuani allassimasoq atuaruk imaluunniit nassuiaruk. Taava qulequtaq pillugu paasissutissat amerlanerusut atuakkami Biibilimi sorpiaat ajoqersuutigineqarpat?-mi sorlermi nassaarisinnaanerai takutissinnaavat. Atuagaq neqeroorutigiuk oqaloqatigiinnissilu nangeqqinnissaanut tulliani aggeqqinnissannut isumaqatigiissuteqarfigalugu.
5. Sooq Biibilimik atuaqqissaaqateqarnissamut piareersimajuartariaqarpugut?
5 Angalaarfigisartakkatsinni suli inoqarpoq paasinnikkusuttunik Biibilimi sorpiaat ajoqersuutigineqarnersut. Biibilimik atuaqqissaaqateqarnissamut piareersimajuarutta, allanik inuunerup aqqutaanut ikiuinissamut nuannaarutigininnissamut periarfissaqarnerussaagut. — Matt 7:13, 14.