Ajoqersuganngortitsinissamik pingaartitsiuarneq
1. Inuit annaanneqassappata susariaqarpugut?
1 2014-imi ukiumoortumik nalunaarusiamit erserpoq Guutip innuttaasa nutaarsiassaq nuannersoq aallussilluarlutik aalajangersimalluinnarlutillu oqaluussissutigisaraat. (Matt 24:14) Illumiit illumut oqaluussinikkut, naqitaaqqanik qaaqqusissutinillu immikkut suliniarluni agguaanikkut tamanullu oqaluussinikkut inuit aatsaat taama amerlatigisut tusarliussamik Biibilimeersumik tusarlertarpavut. Inuilli annaanneqassappata Biibilimik atuaqqissaaqatigisalernerisigut Jiisusimut ajoqersuganngornissaannut ikiortariaqarpavut. – 1 Tim 2:4.
2. Apeqqutit suut Biibilimik atuaqqissaaqateqalernissamut piareersimanissatsinnut iluaqutigissavavut?
2 Biibilimik atuaqqissaaqateqalernissannut piareersimajuarit. Soqutiginninnermik ersersitsisup qanoq attavigineqarsinnaanera paasiniartarpiuk Biibilimillu atuaqqissaarnermik aallartitsinissaq siunertaralugu ingerlaannaq alakkartarlugu? Qanga kingullermik pulaaqqaarninni qanoq atuaqqissaartoqartartoq takutippiuk? Qanga kingullermik pulaaqqittakkatit atuaqqissaarnissamik neqeroorfigaagit? Isiginnaagassiat Sooq Biibilimik atuaqqissaartariaqarpit? aamma Qanoq Biibilimik atuaqqissaartoqartarpa? suleqatinnut, atuaqatinnut, sanilinnut, ilaquttannut nalunngisannullu takutinnikuuigit? Atuagaasivik angallattagaq atoraangakku Biibililersaarummik atuaqqissaarnermi atorneqartartumik tigusisut akeqanngitsumik atuaqqissaaqatigineqarsinnaanerannik paasitittarpigit?
3. Iluatsilluartumik sallusuissut ilinniartitsissutigissagutsigu suut pisariaqartippavut?
3 Jehovamit Jiisusimillu ikiorneqarneq. Jiisusip ‘ajoqersuganngortitsinissamik’ peqqussutini oqaatsimik ‘aallarlusimik’ aallarneramiuk siulliulluta iliuuseqartariaqarnerput ersersippaa. Imminiiginnarnatali najorniarluta neriorsorpaatigut. (Matt 28:19, 20) Tamatuma saniatigut inuit sallusuissummik ilinniartinnissaannut pisariaqartitatsinnik Jehovap anersaaminik illernartumik Biibililersaarutinillu tunisarlutalu ilinniartittarpaatigut. (Zak 4:6; 2 Kor 4:7) Suliami tamatumani pingaarutilimmi peqataanissamut ‘piumassuseqarnissaq naammassisaqarnissarlu’ qinnutigisinnaavavut. – Fil 2:13.
4. Sooq ajoqersuganngortitsinissamik pingaartitsiuartariaqarpugut?
4 Oqaluussineq nuannaalissutigisarparput. Allalli sallusuissut malillugu inuulernissaannik ‘inuussummullu aqqutikkut’ ingerlanissaannik ilinniartikkaangatsigit nuannaarnerulertarpugut. (Matt 7:14; 1 Th 2:19, 20) Pingaarnertut, ajoqersuganngortitsinissamik pingaartitsiuarutta Jehovamit, ‘inuit tamarmik allamik isumataarnissaannik periarfisseerusuttumit kimilluunniillu tammaqqusinngitsumit’, iluarisaassaagut. – 2 Petr 3:9.