Pingaartitsinerput ersersitsigu
Eqqaaniaalluni nalliuttorsiorneq apriilip 17-ianni pissaaq
1. Misigissuseq tussiaasiortup ersersitaa suna eqqaaniaalluni nalliuttorsiornerup nalaani naleqquttuua?
1 Jehovap nallittuinermik aniguisitaanermillu ersersitsinerpassuanut kajumissisinneqarluni tussiaasiortoq ima aperivoq: “Qanoq ilillunga akilissavara [Jehova] uannut ajunngitsuliornerpassui pillugit?” (Tuss 116:12) Ullumikkut Jehovap kiffai qujamasuutiginninnissaminnut pissutissaqarnerupput. Oqaatsit taakkua allanneqarnerannit ukiut hundredilillit kingorna Jehovap inuiaat angingaartumik tunissuteqarfigai — utertitsissummik. Apriilip 17-ianni Kristusip toquneranik eqqaaniaanissamut piareersarnitsinni qujamasunnermik takutitsinissatsinnut pissutissaqarluarpugut. — Kol 3:15.
2. Utertitsissummik pingaartitsinissatsinnut sunik pissutissaqarpugut?
2 Utertitsissutip pilluaqqussutissartai: Utertitsissut pissutigalugu “ajortit isumakkiigaanerisigut” isumakkeerfigineqarsinnaavugut. (Kol 1:13, 14) Tamatuma pisinnaatilerpaatigut ilerasuuteqarata Jehova pallorfigisinnaallugu. (Hebr 9:13, 14) Nakimaalluta Jehovamut qinunikkut saaffiginnissinnaalernerput nuannaarutigisinnaavarput. (Hebr 4:14-16) Utertitsissummik upperinnittut naassaanngitsumik inuunissaq qilanaartuutigisinnaavaat. — Joh 3:16.
3. Utertitsissummik pingaartitsinerput Jehovamut qanoq ersersissinnaavarput?
3 Pingaartitsinermik ersersitsisa: Pingaartitsinerput ilaatigut ersersissinnaavarput eqqaaniaalluni nalliuttorsiornermut Biibilimi atuagassat ullut tamaasa atuartarnerisigut eqqarsaatiginneqqissaarinikkullu. Taamaaliortarnissatsinnut iluaqutissatsitut Vagttårnet 1. februaari 2011-meersumi allaaserisaq qulequtaqartoq ”Er du forberedt til årets vigtigste dag?” suliarineqarsimavoq. Aamma qamannga pisumik qinunikkut Jehova oqaluttuussinnaavarput utertitsissut qanoq pingaartitsigalutigu. (1 Th 5:17, 18) Jiisusip peqqussutaanut naalalluta eqqaaniaalluni nalliuttorsiornermut najuunnitsigut qujamasunnerput ersersissavarput. (1 Kor 11:24, 25) Taamatuttaaq Jehova asanningaarneratigut ilaarsinnaavarput sapinngisamik amerlasuut peqatigaluta eqqaaniaalluni nalliuttorsiornissamut qaaqqullugit. — Es 55:1-3.
4. Qanoq aalajangersimasariaqarpugut?
4 Eqqaaniaalluni nalliuttorsiorneq Jehovap kiffaasa qujamasuttut ataatsimiinnertut nalinginnaasutut isiginavianngilaat. Ukiup ingerlanerani ataatsimiinnernit tamanit pingaarnerpaajuvoq! Eqqaaniaalluni nalliuttorsiornissaq qanilliartortillugu tussiaasiortutut ima allattutut aalajangersimasariaqarpugut: “Tarniga, nersoruk [Jehova], ajunngitsuliaalu tamaasa puiornaveerlugit!” — Tuss 103:2.