Pulaagaq eqqortumik eqqarsalersinniarlugu ikioruk
1. Oqaluussinermi periuseq suna pitsaanerussava?
1 Oqaluussinermi arlaat sunniuteqarluarnerussava — ingasattajaartuuneq imaluunniit pulaakkamut eqqortumik eqqarsalersitsiniaaneq tunngavilersuisitsiniarnerlu? Apustilip Paulusip juutit Thessalonikamiittut oqaluukkamigit periuseq kingulleq atorpaa, tamatumalu kinguneranik “juutit ilaat qularunnaarsitaapput”. (ApS 17:2-4) Eqqarsalersitsiniaaneq qanoq paasisariaqarpa?
2. Nutaarsiassamik nuannersumik oqaluussigaangatta Paulusi qanoq ilaarsinnaavarput?
2 Inuit misigissusii tunuliaqutaallu eqqarsaatigikkit: Eqqortumik eqqarsalersitsiniaasut angalaarfigisartakkaminniittut misigissusii aamma eqqarsaatigisarpaat. Areopagosimi Paulusip grækerinik allanik upperisalinnik oqaloqateqarnermini ilisimasaat akuerisaallu aallarniutigai. (ApS 17:22-31) Taamaattumik, saqqummiinissamut piareersaraangavit oqaluussiffigisartakkanni upperisat nakerisarsiornerillu nalinginnaasut eqqarsaatigisakkit. (1 Kor 9:19-22) Pulaagaq akerliliippat oqaloqatigiissutigisinnaasassinnik nassaarniarit.
3. Apeqqutinik atuillaqqinnikkut qanoq allat eqqortumik eqqarsalersinnerusinnaavavut?
3 Apeqqutinik atuillaqqissuugit: Angalasoq apuuffissaanut ikiorsinnaanngilarput sumiinnersoq ilisimanngikkutsigu. Taamatuttaaq, pulaagaq eqqortumik tunngavilersuilernissaanik ikiorsinnaanngilarput qanoq isumaqarnera nalugutsigu. Jiisusip tusarnaartini eqqarsalersinniaraangamigit qanoq eqqarsarnersut paasiniarlugu apeqquteqaqqaakkajuttarpoq. Assersuutigalugu, angutip Jiisusi apeqquteqarfigimmani, “qanoq iliussaanga inuuneq naassaanngitsoq kingornussariumallugu?”, akinnginnermini angut qanoq isumaqarnersoq paasiniaqqaarpaa. (Luk 10:25-28) Ilaanni Petrusi kukkulluni akimmat eqqarsaatersuutai iluarsiniarlugit Jiisusip apeqqutit atorluarpai. (Matt 17:24-26) Taamatuttaaq, pulaagaq aperippat imaluunniit kukkusumik isumaqarpat apeqqutit atorlugit eqqarsalersinniarlugu ikiorsinnaavarput.
4. Sooq pulaagaq eqqortumik eqqarsalersinniarlugu ikiorniarsarissavarput?
4 Pulaagaq eqqortumik eqqarsalersinniarlugu ikioraangatsigu, Ajoqersuisorsuaq, Jiisusi allallu ukiuni hundredilinni siullerni oqaluussisartut pikkorissut ilaartarpavut. Pulaagaq ataqqinninnermik ersersitsivigisarparput. (1 Petr 3:15) Tamatuma kingunerisaanik immaqa pulaaqqinneqarusussaaq.