Oqaluussinermi pikkorinnerulerit — Akerliliinernut akissuteqartarnikkut

Sooq pingaaruteqartoq. Pinngortitami ajunaarnersuaqarnissamik ilisimasaqarlutit takorlooruk. Inuit isumannaatsumut qimaanngikkunik toqussapput. Sanilit mianersoqqujartorpat, taassumali suli oqalunniartutit nipangersillutit akornuserpaatit oqarluni ulapikkami piffissaqarnani. Soorunami taanna annaanniarlugu ingerlaannaq tunniutiinnarnavianngilatit! Oqaluussiffigisartakkatsinni tusarliussatta inuunermik annatsitsissutaasinnaanera inuppassuit nalugamikku tusarnaarusunneq ajorpaatigut. Immaqa pulaakkap ulapinnerata nalaani kasuttorpugut. (Matt 24:37-39) Immaqaluunniit Jehovap Nalunaajaasui pillugit tusatsiakkanik eqqunngitsunik paasitinneqarsimapput taamaattumillu isummerfigereersimalluta. (Matt 11:18, 19) Imaassinnaavorluunniit upperisarsiortunut allanut tusaamanerlugaasunut assersuukkaatigut. (2 Petr 2:1, 2) Pulaakkavut soqutiginninnatik oqarpata soqutiginninngivitsutut nalilipallassanngilavut.