Apeqquteqarfik

◼ Kia atuagassiani nittartakkamilu immersugassaq immersussavaa?

Atuagassiaatitsinni ilaatigooriarluni immersugassaqartarpoq biibililersaarutinik nassitseqqulluni imaluunniit Jehovap Nalunaajaasuinit pulaarneqarumalluni immersorneqarsinnaasunik immikkoortortaqarfimmullu nassiunneqartartunik. Tamatumalu saniatigut nittartagarput www.watchtower.org atorlugu Biibilimik atuaqqissaaqatigineqarnissamik qinnuteqartoqarsinnaavoq. Amerlasuut aaqqissuussat taakku sallusuissummik ilisimasaqalernerminnut iluaqutigisimavaat. Taamaattorli, atortorissaarutit taakku atorlugit oqaluussisartut biibililersaarutinik pulaartussamilluunniit ilaquttaminnut allanulluunniit pissarsiussisarnerat ajornartorsiortitsilersimavoq.

Immikkoortortaqarfimmiit biibililersaarutinik piumasarinngisaminnik nassinneqarsimasut naammagittaalliortarsimapput misigalutik peqatigiiffitsinnit ikkatigineqarlutik isumaqarlutillu najugarissaannut allattorsimaffiuteqartugut. Oqaluussisartut immersukkamik, pulaarneqarnissaminnik piumasaqarsimanngitsunut, tigusisimasut pulaaraluaraangamik pulaakkamit nammineerluni pulaaneqaqqulluni piumasaqasimanngitsumit kamattumik saaffigineqaraangamik kiinaannguusaartarsimapput. Taamaattumik, nittartakkatigut allatigulluunniit allat sinnerlugit oqaluussisartup immersugassaq immersornagu soqutiginnittut namminneq immersortassavaat. Allat sinnerlugit immersugassaq immersoriarlugu nassiunneqarsimasoq paasineqaraangat nalinginnaasumik suliarineqarneq ajorpoq.

Qanormi iliorluta ilaqutaq ilisarisimasarluunniit anersaakkut ikiorsinnaavarput? Biibililersaarutinik tunerusukkukku, soormi nammineerlutit tunissutitut nassiussiffigigukku? Soqutiginninnini ersersippagu Nalunaajaasunillu pulaarneqarnissani kissaatigippagu, najugarisaanilu ilagiinni utoqaanertanut qanoq saaffiginnissallutit nalugukku, taava immersugassaq Besøg venligst (S-43) immersoriarlugu illit ilagiinni allatsimut tunniutissavat, misissoreeruniullu taassuma immikkoortortaqarfimmut ingerlateqqissavaa. Kisiannili, soqutiginnittoq pineqaatissinneqarsimalluni isertitsivimmiippat, atornerluisunut katsorsaavimmiippat imaluunniit napparsimmavimmi uninngappat, taanna sinnerlugu immikkoortortaqarfimmut saaffiginnissanngilatit. Pitsaanerussaaq, qatanngummut tamakkununnga pulaartartumut attaveqarfigeqqugukku imaluunniit nammineq immikkoortortaqarfimmut allagaqaqqullugu kajumissaarukku.