“Kikkut tamaasa” oqaluussiffigikkit
1. Oqaluussisartoq pikkorissoq sanasorlu pikkorissoq qanoq assigiissuteqarpat?
1 Sanasoq pikkorissoq assigiinngitsunik sannateqarpoq, tamaasalu immikkut sumut atussanerlugit nalunngilaa. Uaguttaaq nutaarsiassamik nuannersumik oqaluussitilluta assigiinngitsunik ‘sannatissaqarpugut’. Assersuutigalugu atuagassiaaqqanik assigiinngitsorpassuarnik sammisalinnik ‘kikkunnut tamanut’ nutaarsiassamik nuannersumik oqaluussitilluta iluaqutigisinnaasatsinnik saqqummersitsisoqarnikuuvoq. (1 Kor 9:22) Guutip naalagaaffianut kiffartorneq-mi matumani tapiliussami atuagassiaaqqanut assigiinngitsunut innersuunneqarpoq, nassuiarneqarporlu kikkunnut tunnganersut, aamma qanoq neqeroorutigineqarsinnaaneranik siunnersuuteqarpoq.
2. Atuagassiaaqqat qaqugukkut neqeroorutigisinnaavavut?
2 Atuagassiaaqqat qaqugukkut neqeroorutigineqarsinnaasut: Sanasup sannatini pisariaqartitarpiani atortarpaa. Taamatuttaaq uagut atuagassiaaraq qaqugukkulluunniit neqeroorutigisinnaavarput iluaqutaalluarsinnaasorigaangatsigu, aammalu qaammammi Biibililersaarutit allat neqeroorutigineqaraluarpata. Assersuutigalugu kristumiunngitsumut Biibilimik soqutigisaqarpallaanngitsumut oqaluussigutta atuagaq Biibilimi ajoqersuutigineqartut neqeroorutigineqartussaatillugu pitsaanerussagunarpoq atuagassiaaraq tulluartoq neqeroortigeqqaarutsigu, kingornatigullu pulaagaq soqutiginnilerpat Biibilimik ajoqersuutigineqartut neqeroorutigineqarsinnaavoq.
3. Sooq sannatinik pigisatsinnik atuinissatsinnut pikkorinnerulertariaqarpugut?
3 Biibilimi suliaminnut pikkorissut nersualaarneqarput. (Uss 22:29) Ullumikkut nutaarsiassamut nuannersumut tunngatillugu suliaq illernartoq pingaaruteqarnerpaajuvoq. (Rom 15:16) “Kanngusuutissaqanngitsutut” sulisuussagutta ‘sannatinik’, pigisatsinnik tamanik, atuinissatsinnut pikkorinnerulerniarluta ilungersorusuppugut. — 2 Tim 2:15.