Toqqoruk
Atuagassiaaqqat uku atortarpigit?
Biibilimi — Suna tusarliunneqarpa?
Biibilimik ilisimasaqalaartut, ingammik kristumiuunngitsut eqqarsaatigalugit suliaavoq
Qanoq neqeroorutigisinnaagipput: “Biibilimi (imaluunniit uani atuakkami illernartumi) allassimasoq pillugu isummat paaserusupparput. [Tussiaat 37:11 immikkoortumi 11-mi innersuussutigineqartoq atuaruk]. Siulittuut una piviusunngorpat nunarsuaq qanoq issasoraajuk? [Akissutaa tusarnaaruk]. Atuakkatsinni uani erserpoq Biibilip inuppassuit kulturinit tamaneersut assigiinngitsorpassuarnillu tunuliaqutallit tuppallersarlugillu neriuutississinnaagai.” Siulequt qupp. 3-p qulaaniittoq atuaruk atuagassiaararlu neqeroorutigalugu.
Una misiliguk: Kristumiuunngitsumik atuakkamik Biibilimi ajoqersuutigineqartut-mik atuaqqissaaqateqartaruit, Biibilimik ilisimasaqalaalersinniarlugu, atuaqqissaarnissaq sioqqullugu atuaqqissaareernerulluunniit kingornatigut minutsialunnguit atorlugit immikkoortut atuagassiaaqqamiittut ilaannik sammisaqartarsinnaavutit.
Inunnut tamanut atuagaq
Ilinniarluarsimasut Biibilimilli ilisimasaqarpallaanngitsut eqqarsaatigalugit suliaavoq
Qanoq neqeroorutigisinnaagipput: 2 Timotheusi 3:16, 17 atuakkit. Taava ima oqarit: “Biibilip Guutimit anersaarfigineqarsimaneranik uani allassimasoq isumaqatigaajuk? Imaluunniit atuakkatut pissanganartutuinnaq isigaajuk? [Akissutaa tusarnaaruk]. Apeqqut taanna amerlanerpaat oqaaseqarfigisarpaat, inuppassuilli nammineerlutik Biibili misissorsimanngilaat. [Misigisaq qupp. 3-mi qulequttap ataaniittoq atuaruk]. Atuagassiaaraq soqutiginartoq una iluaqutigalugu inuit kulturinit tamaneersut assigiinngitsorpassuarnillu upperisallit Biibilip imaanik misissuinissamut pissutissaqarlualertarput.”
Una misiliguk: Pulaakkap atuagassiaaraq tiguppagu oqarsinnaavutit: “Inuppassuit Biibilimik atuartariaqannginnerartarnerannut pissutaasut ilagaat Biibili tassanilu ajoqersuutigineqartut kukkusumik upperisarsiortunit saqqummiunneqartarnerat. Aggeqqikkuma tamatumunnga tunngasumik takutitaqarusuppunga.” Pulaaqqiinermi qupp. 4, 5-imi paasissutissat ilaat sammisigit.
Guutimut ikinngutaalersinnaavutit!
Ilinniagaqarluarsimanngitsut imaluunniit atuffarluttut eqqarsaatigalugit suliaavoq
Qanoq neqeroorutigisinnaagipput: “Isumaqarpit Guutimut ikinngutaalersinnaasugut? [Akissutaa tusarnaaruk, taava Jaaku 2:23 atuaruk]. Aaperaatut Guutimut ikinngutaalersinnaaqqulluta atuagassiaaraq una suliaavoq.”
Una misiliguk: Pulaarnermi siullermi imaluunniit pulaaqqiinermi ilinniagassap siulliup ilaannaataluunniit sammineratigut Biibilimik atuaqqissaaqateqartarneq qanoq ingerlasarnersoq takutissinnaavat.
Nalerisimaarluni qanoq inuusoqalersinnaasoq
Upperisamik soqutigisaqanngitsut eqqarsaatigalugit suliaavoq
Qanoq neqeroorutigisinnaagipput: “Pulaarpatsigit inuppassuit ajunnginnerusumik inuuneqalernissartik kissaatigimmassuk. Tamatta nuannaarunnaarutigisatsinnik ajornartorsiuteqartarpugut. Tamaattoqaraangat, immaqa ikinngutigilluakkatsinnut ilaquttatsinnulluunniit siunnersortissarsiortarpugut, immaqaluunniit atuakkanik atorniartarfik internettiluunniit atortarpavut. Illit siunnersuutinik pitsaasunik sumi nassaassaqarsoraajuk? [Akissutaa tusarnaaruk]. Ilaasa tupaallaatigisarpaat Biibilimi atoriaannaasunik siunnersuuteqarnera. Aajuna siunnersuut. [Ilinniagassaq 2 pulaakkannut takutiguk allassimaffiillu innersuussutigineqartut ilaat atuarlugu]. Atuagassiaaqqami uani nassuiarneqarpoq qanoq nalerisimaarnarnerusumik inuuneqalersinnaasugut.”
Una misiliguk: Pulaakkap atuagassiaaraq tiguppagu ima oqarsinnaavutit: “Inuppassuit paasitinneqartarput Biibili eqqoqqissaanngitsunik ulikkaartoq. Aggeqqikkuma Biibilip ilisimatuussutsikkut eqqortuuneranut tunngasunik takutitaqarusuppunga.” Pulaaqqiinermi qupp. 12-mi immikkoortoq 4 sammineqarsinnaavoq.
Fem gode spørgsmål om livets oprindelse
Inuusuttut kristumiut atuarfimmi pinngoriartuaarsimaneraanermik ilinniartinneqartut eqqarsaatigalugit suliaavoq, aamma pinngoriartuaarsimaneraasut, agnostikerit guuteqannginneraasullu eqqarsalersinniarlugit atorneqarsinnaavoq (Atugassiaaqqap illumiit illumut neqeroorutigineqarnissaa siunertaanngilaq).
Guuteqannginneraasumik imaluunniit pinngoriartuaarsimaneraasumik oqaloqateqarnermi qanoq neqeroorutigineqarsinnaasoq: Ullumikkut pinngortitamik ilisimatusarneq pillugu atuakkani tamarluinnangajanni pinngoriartuaarsimaneraaneq ilumoortutut ilinniartitsissutigineqartarpoq. Illit isumaqarpit pinngoriartuaarsimaneraaneq isumaliutersuutaannaasoq, imaluunniit uppernarsarneqarsimasoq? [Akissutaa tusarnaaruk]. Qularinngilara isumaqatigigimma eqqarsaatigilluakkamik aalajangersinnaaqqulluta apeqqutit taakku tamaasa immikkut misissorneqarnissaat pisariaqartuusoq. Atuagassiaaqqami uani eqqaaneqarput inuppassuit pinngortitsisoqarsimaneranik upperinnilersimanerannut uppernarsaatit ilaat.”
Una misiliguk: Atuartuuguit atuaqativit ilaannik alapernaattoqalissanersoq takuniarlugu atuagassiaaraq nerrivippit qaavaniitissinnaavat.
Why Should We Worship God in Love and Truth?
Hindut eqqarsaatigalugit suliaavoq
Qanoq neqeroorutigisinnaagipput: “Indiamiut qinnutaat ilisimaneqarluartoq sallusuissummik qaamanermillu nassaarnissamik imaqarpoq. Guutip asanninnikkut ilumoornikkullu pallorfigineqarnissaa pingaaruteqarsoraajuk? [Akissutaa tusarnaaruk]. Tamanna pillugu Jiisusi qanoq oqarnersoq maluginiaruk.” Johannesi 4:24 atuaruk, qupp. 3-mi immikkoortoq 4 atuarlugu, taavalu atuagassiaaraq neqeroorutigalugu.
Una misiliguk: Pulaakkap atuagassiaaraq tiguppagu ima oqarsinnaavutit: “Hindut ilisimatuut ilaat oqartarput sallusuissut uummatitsinniittoq. Allat oqartarput sallusuissut allakkani illernartuni nassaassaasoq. Aggeqqikkuma, apeqqut qupp. 4-mi immikkoortoq 3-p naanerani apeqqutigineqartoq ‘Sallusuissut Guutimeersoq nassariumallugu sumi ujassarvarput?’ sammisinnaavarput.”
The Pathway to Peace and Happiness
Buddhistit eqqarsaatigalugit suliaavoq
Qanoq buddhistimut utoqqarmut neqeroorutigisinnaagipput: “Immaqa uattut isummat ajoqutaasut ullut tamaasa tusartakkavut meeqqatsinnullu sunniuteqartartut eqqissiunnaarutigaatit. Inuusuttut amerliartuinnartut inuunerlukkaluttuinnarnerannut suna pissutaasoraajuk? [Akissutaa tusarnaaruk]. Nalunngiliuk kristumiussuseq hindusiorneq islammilu tunngavilerneqanngikkallarmatali atuakkami allanneqarsimasumi tamakku tamarmik siulittuutigineqarnikuusut? [2 Timotheusi 3:1-3 atuakkit.] Maluginiaruk, naak ilisimasaqarneq annertusiartuinnaraluartoq, pissutsit ajorsigaluttuinnartussaasut. [Versi 7 atuaruk]. Inuit amerlanerpaat ilikkanngisaannagaannik sallusuissummik paasinissamut atuagassiaaraq una iluaqutigaara. Atuarusussagaluarpiuk?”
Una misiliguk: Pulaaqqiileruit pulaagaq Biibilimik soqutiginnilersereerukku, apeqqutit atuagassiaaqqap tunuaniittut takutissinnaavatit atuagarlu Biibilimi sorpiaat ajoqersuutigineqarpat? piniaraanni immersugassaq takutillugu. Oqarfigiuk atuagaq takorusuppagu ataatsimik nassataqarlutit. Imarisai takutikkit, kapitalimilu toqqagaani immikkoortoq ataaseq marlulluunniit sammisigit.
Hvem vil hjælpe os med at læse vore problemer?
Hindut eqqarsaatigalugit suliaavoq
Qanoq neqeroorutigisinnaagipput: “Oqaloqatigisatta amerlasuut silarsuarmi ajortorpassuit eqqissiunnaarutigaat. Isumaqarpit ullut ilaanni silarsuarmi ajornartorsiutit tamaasa Guutip peerumaarai? [Akissutaa tusarnaaruk]. Una siulittuutigineqarmat neriuuteqalerpugut. [Tussiaat 37:11 atuaruk.] Una atuagara Biibilimeersuuvoq, atuagaq paatsoorneqakulasarlunilu atornerlunneqakulasartoq. Immaqa tupaallaatigissavat paasigukku kitaamiut Biibili atuagaatiginngikkaat; tassani nunasiaateqarneq imaluunniit inuiannik allanik inuiannit allanit pitsaanerusorinninneq tapersersorneqanngilaq. Biibilimili Guutip erniinnaq ajornartorsiutitsinnik piiaanissaanik neriuuteqalersinneqarpugut. Aamma najoqqutassiat ajornartorsiutit ullumikkut nalaattakkatta naammagalugit atornissaannut iluaqutigisinnaasavut imarai. Tamatumunnga tunngatillugu atuagassiaaqqami amerlanerusunik paasissutissaqarpoq.”
Una misiliguk: Pulaaqqiiguit pulaagaq Biibilimik soqutiginnilersereerukku atuakkami Biibilimi sorpiaat ajoqersuutigineqarpat?-mi assit qupp. 4-5-imiittut takutissinnaavatit. Allassimaffinnit issuarneqarsimasunit minnerpaamik ataaseq atuaruk atuagarlu neqeroorutigalugu.
Vil der nogen sinde komme en verden uden krig?
Juutit eqqarsaatigalugit suliaavoq
Qanoq neqeroorutigisinnaagipput: “Oqaluttuarisaanerup ingerlanerani sorsuttoqarnera pissutigalugu inuit naalliuuterpassuaqartarsimapput. Soormitaavaana eqqissineq inuit kissaatigineraraluaraat suli sorsuttoqartuaannartoq? [Akissutaa tusarnaaruk]. Esajap siulittuutaa neriuuteqalersitsivoq. [Esaja 2:4 atuaruk]. Tamanna apeqqutinik arlalinnik pilersitsivoq: Qaqugu qanorlu Esajap siulittuutaa eqquutissava? Sooq qularinngilluinnarsinnaavarput Biibilimi neriorsuutigineqartoq tutsuiginartuusoq? Atuagassiaaqqami matumani apeqqutit taakku akineqarput.”
Una misiliguk: Pulaakkap atuagassiaaraq tiguppagu qupp. 16-17-ini innersuussutigisinnaavatit ima oqarlutit: “Juutinik toqoraanersuit amiilaarnartut inuppassuit eqqarsaatigisarpaat imalu aperalutik: ‘Guuteqaruni sooq naalliunnartut akuerai?’ Aggeqqikkuma immaqa tamanna eqqartorumaarparput.”
Vejledning fra Gud — Vejen til Paradiset
Musliimit Biibilimik atuaqqissaanissaminnut kiffaanngissuseqarfiusumi najugallit eqqarsaatigalugit suliaavoq
Qanoq neqeroorutigisinnaagipput: “Paasisinnaavara musliimit Guuti ataasiusoq taassumalu pruffiitii tamaasa upperigaat. Tamanna ilumoorpa? [Akissutaa tusarnaaruk]. Siulittuutitoqaq, nunap paratiisinngornissaanik siulittuut, pillugu oqaloqatigerusuppakkit. Pruffiiti qanoq allassimanersoq takutilaarsinnaavara? [Esaja 11:6-9 atuakkit]. Inuppassuit eqqarsaatigisimavaat Guutip nunarsuarmik allanngortitsinissaa qanoq pisinnaassanersoq? Pruffiitit tamanna pillugu qanoq oqarnersut uani atuarneqarsinnaavoq.”
Una misiliguk: Pulaakkap atuagassiaaraq tiguppagu ima oqarsinnaavutit: “Atuakkami Guutimeersumi inuit aallaqqaammut paratiisimi najugaqarsimanerat nassuiarneqarpoq. Oqaloqatigeeqqikkutta apeqqut una akiumaarpara: ‘Inuit Guutip maleruagasiai qanoq ilillutik malikkunnaarsimaneraat aamma qanoq ilillutik paratiisi annaasimaneraat?’” Pulaaqqiinermi immikkoortup qupp. 6-imi aallartittup aallaqaataa sammineqarsinnaavoq.
Ægte tro — Nøglen til et lykkeligt liv
Musliimit Biibilimik atuaqqissaarnissaminnut kiffaanngissuseqarfiusumi najugallit eqqarsaatigalugit suliaavoq
Qanoq neqeroorutigisinnaagipput: Assit qupp. 16-17-imiittut takutikkit oqarlutillu: “Pissutsit uku pissutsinit silarsuarmi ullumikkut takusakkatsinnit allaanerungaarput. Silarsuaq taamatut ilissasoraajuk? [Akissutaa tusarnaaruk]. Maluginiariaruk atuagaq Guutimeersoq qanoq neriorsuisoq. [Allassimaffiit issuarneqarsimasut ilaat Biibilinniit atuaruk]. Neriorsuutit taakkua eqquukkumaarnerannik uppernerup piviusup ineriartortinnissaanut atuagassiaaraq una iluaqutigaarput.”
Una misiliguk: Aninnginninni pulaagaq apeqqutinik tunuaniittunik toqqaaqqusinnaavat. Isumaqatigiissuteqarfigiuk aggeqqikkuit atuagassiaaraq atorlugu akissutaa sammiumaarlugu.
Lasting Peace and Happiness—How to Find Them
Kiinamiut eqqarsaatigalugit suliaavoq
Qanoq neqeroorutigisinnaagipput: “Ullumikkut ajornartorsiuterpassuaqarpoq uagutsinnik nuannaarunnaarsitsisinnaasunik. Naak ajornartorsiuteqaraluartoq suna nuannaalissutigisinnaaviuk? [Akissutaa tusarnaaruk]. Inuppassuit Biibilimi siunnersuutit malinnerisigut pillualersimapput. [Tussiaat 119:1, 2 atuakkit]. Inuit ilaat oqartarput Biibili kitaamiunuinnaq allagaasoq. Uanili allassimasoq maluginiaruk. [Qupp. 17-imi immikkoortoq 16 atuaruk]. Atuagassiaaqqami uani nassuiarneqarpoq eqqissineq pilluarnerlu ataavartut qanoq nanineqarsinnaasut.”
Una misiliguk: Pulaakkap atuagassiaaraq tiguppagu, qupp. 17-imi immikkoortumi 18-mi oqaaseqatigiit pingasut siulliit atuarsinnaavatit imalu oqarlutit: “Aggeqqikkuma siunissami pisussat pillugit Biibilimi qanoq allassimasoqarnersoq takutikkusuppara.” Aggeqqikkuit qupp. 30-mi immikkoortoq 6-imi sammisassat ilaat oqaloqatigiissutigisinnaavasi.