Inuit Guutimut tusarnaarnissaannik ikiukkit
1. Atuagassiaaraq suna ataatsimeersuarnermi “Guutip naalagaaffia tikiulli!”-mi saqqummersinneqarpa, aamma sooq atoriaannaava?
1 Ataatsimeersuarnermi “Guutip naalagaaffia tikiulli!”-mi atuagassiaaraq Guuti tusarnaaruk naassaanngitsumik inuusinnaaqqullutit saqqummersinneqarpoq. Allassimasoqarpianngimmat ajornanngitsumik nutsipallariaannaavoq. Guuti tusarnaaruk naassaanngitsumik inuusinnaaqqullutit tuluttut saqqummersinneqanngitsiartoq oqaatsinut 431-nut nutserneqarnissaanut akuersissutigineqarsimavoq.
2. Kikkut atuagassiaaraq iluaqutigisinnaavaat?
2 Kikkut atuagassiaaraq pingaartumik iluaqutigisinnaavaat? Silarsuarmi pisartut tulliuttut takorlooriakkit:
• Oqaluussisartup pulaartakkani imaluunniit siullerpaamik pulaakkani oqaloqatigalugu paasivaa pulaagaq atuarpiarsinnaanngitsoq imaluunniit atuarsinnaanngitsoq.
• Oqaatsini atorneqartuni Biibililersaarutinik nutsikkanik ikittuinnarnik pigisaqartuni imaluunniit pigisaqanngivissuni oqaluussisartoq oqaluussisoq.
• Oqaluussisartoq oqaluussiffigisartakkamini tusilartumut ussersorluni oqaluussisoq.
• Angajoqqaaq meeqqamut mikisumut suli atuarsinnaanngitsumut sallusuissummik ilinniartitserusuttoq.
3. Guuti tusarnaaruk naassaanngitsumik inuusinnaaqqullutit qanoq aaqqissuunneqarsimava?
3 Qanoq aaqqissuunneqarsimasoq: Guuti tusarnaaruk naassaanngitsumik inuusinnaaqqullutit killilimmik atuarnermut piginnaasaqartunut imaluunniit atuarnermik ilinniartunut sanaajuvoq. Qupperneq allorlugu saamerlermi ilinniagassami akineqartunik apeqquteqartarpoq. Assilissat oqaasertaqarput allassimaffiillu innersuussutigineqarlutik. Quppernerit amerlasuut teqeqquini ungalusami oqaasertaqartarpoq allassimaffiillu innersuussutigineqarlutik atuaqqissaaqatigisap piginnaasai naapertorlugit oqaloqatigiissutigineqarsinnaasunik.
4. Qaqugukkut aamma qanoq atuagassiaaraq neqeroorutigineqarsinnaava?
4 Qanoq atorneqarsinnaasoq: Atuagassiaaraq qaammammi neqeroorutaanngikkaluarpalluunniit tulluarpat illumiit illumut angalaarnermi atorsinnaavat. (Ungalusaq takuuk “Qanoq neqeroorutigineqarsinnaasoq”). Pulaartakkannut takutillugu oqarsinnaavutit soqutiginartumik takutitaqalaarusullutit atuagassiaararlu tunniullugu.
5. Atuagassiaaraq Biibilimik atuaqqissaaqatitsinnut qanoq atorneqarsinnaava?
5 Kulturini tamani oqaluttuat tusarnaassallugit nuannarineqartarput. Oqaluttuat isumassarsiarititaasut Biibilimi allassimasut oqaluttuarigaangakkit assilissat atortakkit. Assilissami susoqartoq nassuiaruk. Angorniorlutit oqaluttuarit. Atuaqqissaaqatigineqartoq aperiuk suna maluginiarneraa. Oqaloqatigiinnermut peqataatinniarlugu paasisimaneraalu qulakkeerniarlugu apeqquteqartarit. Assilissat eqqartoraangassigit oqaasertaat allassimaffiillu atuaqatigiissutigisarsigit oqaloqatigiissutigalugillu.
6. Biibilimik atuaqqissaaqatigineqartoq siuariartornissaanut qanoq ikiorsinnaavarput?
6 Atuaqqissaaqatigineqartoq siuariartornissaanut ikioruk: Qularnanngitsumik oqaloqatigiittarnissinni atuaqqissaaqatigisartakkat nammineerluni Jehovamik ilisarisimannilernissani anguniarlugu atuarnermik ilinnialernissaanik killissinnaassavat. (Matt 5:3; Joh 17:3) Atuagassiaaraq naammassiguniuk kuisinnissamut piareersimanavianngilaq. Biibilimik itinerusumik paasisaqarnerussappat atuagaq Biibilimi ajoqersuutigineqartut imaluunniit Biibililersaarut alla tulluartoq atuaqqissaaqatigiissutigineqaqqaassaaq.
7. Oqaluussinermut atugassarput nutaaq sooq qujamasuutigaajuk?
7 Inuit naassaanngitsumik inoorusukkunik qilammi nunamilu Kisimi Oqartussaasumut tusarnaartariaqarput. (Es 55:3) Guutip kissaatigaa “inuit tamarmik”, aamma atuarsinnaanngitsut, tusarnaarnissaat ilikkassagaat. (1 Tim 2:3, 4) Qanoq inuit Guutimut tusarnaarnissaannik ilinniartissinnaanissaannut atortorissaaruterput nutaaq qujamasuutigeqaarput!
[Qupp. 3-mi ungalusaq]
Qanoq neqeroorutigineqarsinnaasoq
Qupperneq 2, 3-lu takutikkit oqarlutillu: “Silarsuarmi ima isikkulimmi inoorusussagaluarpit? [Pulaagaq akili]. Biibilimi neriorsuutigineqarpoq Guutip erniinnaq silarsuaq nuannersoq, eqqissineqarfiusoq, piitsoqarfiunngitsoq imaluunniit nappaateqarfiunngitsoq pilersissagaa. Maluginiariaruk tassani inuusinnaajumalluta qanoq iliortariaqartugut. [Esaja 55:3 quppernerup 3-p qulaani issuarneqarsimasoq atuaruk]. Allassimavoq Guuti ‘ornissagitsinni tusarnaarlugulu’. Qanorli ililluta Guuti tusarnaarsinnaavarput?” Qupperneq 4, 5-ilu qupperuk akissutaalu eqqartorlugu. Piffissaqanngippat atuagassiaaraq tunniuguk akissutaatalu oqaloqatigiissutiginissaanut uteqqinnissannik isumaqatigiissuteqarfigalugu.