‘Peqqissaartumik nalunaajaagit’
1. Paulusi oqaluussinermi qanoq maligassaalluarpa?
1 “Kiffartuutigisat peqqissaartumik suliariuk.” (2 Tim 4:5, Byington) Paulusi Timotheusimut pisuusaarnerunngitsumik taama oqarsinnaasimavoq. Kr.in.king. ukioq 47-p aamma ukioq 56-ip akornanni Paulusip ajoqersuiartorluni angalanerit pingasut naammassisimavai. Paulusip ‘peqqissaartumik nalunaajaanera’ (NW) Biibilimi Apustilit Suliaanni arlaleriarluni eqqaaneqartarpoq. (ApS 23:11; 28:23) Ullumikkut qanoq taamaaliorsinnaavugut?
2. Illumiit illumut peqqissaartumik qanoq nalunaajaasinnaavugut?
2 Illumiit illumut: Nutaarsiassamik nuannersumik tusarsimanngisaannartoq naapinniarlugu ullup ingerlanerani piffissani assigiinngitsuni angalaartariaqartassaagut. Illumi ittuusoq immaqa unnukkut sapaatilluunniit akunnerata naanerani angerlarsimasarpoq. Angerlarsimaffimmi inuk ataaseq oqaloqatiginiarlugu ilungersortariaqarpugut angerlarsimanngitsut uterfigeqqittarlugit. Tamannami iluatsinngippat? Immaqa allaffigineratigut sianerfigineratigulluunniit iluatsissinnaavoq.
3. Tamanut torrutiinnarlugulu nalunaajaanissamut ilinnut suut periarfissaappat?
3 Tamanut torrutiinnarlugulu: Jehovap kiffaasa ullumikkut “ilisimassuseq” tusarusuttunut tamanut tusartittarpaat. Ilaatigut “aqqusinermi” imaluunniit “niueriartortarfinni” taamaaliortarput. (Uss 1:20, 21) Ulluinnarni iliuuserisartakkatsinnut ilaatillugu nalunaajaanissarput eqqumaffigisarparput? Oqartoqarsinnaava ‘oqaaseq tamaviaarullutigu’? (ApS 18:5) Taamaappat, taava peqqissaartumik nalunaajaanermik pisussaaffitsinnik eqqortitsivugut. — ApS 10:42; 17:17; 20:20, 21, 24.
4. Qinnutit eqqarsaatiginneqqissaarnerlu peqqissaartumik nalunaajaanissatsinnut qanoq iluaqutigisinnaavavut?
4 Ilaatigut inuttut sanngiissuseq imaluunniit ittoortuuneq pissutigalugu oqaluussinissarput tunuarsimaarfigisinnaavarput. Qularutiginngilluinnarsinnaavarput Jehovap sanngiiffivut nalunngikkai. (Tuss 103:14) Taamaattoqartillugu oqalunnissatsinnut sapiissusermik Jehova qinnuigisinnaavarput. (ApS 4:29, 31) Nammineq atuaqqissaarnikkut Guutip oqaasianillu eqqarsaatiginneqqissaarnikkut nutaarsiassap nuannersup pingaaruteqassusianik pingaartitsinerulernissarput sulissutigisinnaavarput. (Fil 3:8) Taamaaliornikkut oqaluussinermi sapiissuseqalersinnaavugut.
5. Qanoq ililluta Joelimi siulittuummut eqquutitseqataasinnaavugut?
5 Joelimi siulittuutigineqarpoq Jehovap ullussarsua siooranangaaqisoq takkutsinnagu Guutip innuttai “unitsitassaanatik” akornuteqaratillu oqaluussiumaartut. (Joel 2:2, 7-9) Suliamut suliareqqinneqanngisaannartussamut tamaviaarluta suleqataasa!