Apeqquteqarfik

◼ Ataatsimiinnernut najuunnermi oqaluusseqataanermilu mobilinik atuisarnermut tunngatillugu najoqqutassiat Biibilimiittut suut maleruarsinnaavavut?

“Suut tamarmik aalajangersimasumik piffissaligaapput.” (Oqal 3:1): Inuit piffissami qanoq ilisukkulluunniit mobilikkut oqaloqatigiissinnaallutillu allaqatigiissinnaapput. Taamaakkaluartorli kristumiut pisuni aalajangersimasuni mobiliminnit akornuserneqarusunneq ajorput. Assersuutigalugu ataatsimiikkaangatta Jehovamik pallorfiginnittarlutalu anersaakkut ilinniartinneqartarlutalu kajumissaaqatigiittarpugut. (5 Mos 31:12; Tuss 22:23; Rom 1:11, 12) Naalagaaffilersaarfimmut isernitsinniit aninissatta tungaanut mobilivut qaminngatittarsinnaavavut? Ajornartoortoqassagaluarpat attaveqarfigineqarnissarput pissutigalugu mobilerput ikumatittariaqarutsigu tamatuma allanut ajoqutaannginnissaa qulakkeersinnaavarput.

‘Nutaarsiassaq nuannersoq pillugu tamaasa suliarikkit.’ (1 Kor 9:23, NW): Ilaannikkut oqaluussinermi mobilit iluaqutigineqarsinnaasarput. Assersuutigalugu qatanngutip oqaluussinermik siulersuisup angalaarfigisami oqaluussisartunik nakkutiginninniarluni mobilini atorsinnaavaa. Ilaannikkut oqaluussisartut soqutiginnittumut imaluunniit Biibilimik atuaqqissaaqatigineqartartumut pulaannginnerminni, ingammik pineqartoq ungasissumi najugaqarpat, mobilertik atorlugu sianerfigisarpaat. Pulaakkatta oqaloqatiginerani mobilitsinnit akornuserneqannginnissarput qulakkeertariaqarparput. (2 Kor 6:3) Oqaluussisartoqatitta utaqqineranni ikinngutitsinnut sianernata allannataluunniit oqaluussinitsinnik oqaluusseqatigisatsinnillu salliutitsigutta ajunnginnerussaaq.

Ataqqinnittuugit. (1 Kor 10:24; Fil 2:4): Katersuuttunut piffissaq eqqorlugu aggertarnissarput pingaartittuassavarput eqqarsalinngisaannarlutalu kingusinaarutta oqaluussisartoqatigiit sumiinnersut paasiniarlugu oqaluussisartoqatigiinnut ilaasunut sianiinnarsinnaallutaluunniit allaannarsinnaalluta. Kingusinaaraangatta oqaluusseqatigiittussat amerlanertigut allanngortiterneqartariaqartarput. Soorunami pissutsit qanoq iliuuseqarfigisinnaanngisavut pissutigalugit ilaannikkut kingusinaarsinnaasarpugut. Inortuisannginnermik ileqquliussinitsigut Jehovap aaqqissuussaanik, qatanngummik oqaluussinermi siulersuisumik oqaluussisartoqatitsinnillu ataqqinninnitsinnik ersersitsissaagut.