Pruffiitit maligassariniarsigit — Hosea
1. Imminut qanoq aperisoqartarpa?
1 ‘Jehovamut qanoq pilliuteqarusuppunga?’ Jehovap ajunngissusianik nallittuineranillu eqqarsaatiginneqqissaaraangavit immaqa imminut taamatut aperisarputit. (Tuss 103:2-4; 116:12) Inuttut pilliuteqartariaqaraluarluni Hosea Jehovap peqqusineranik kajumilluni iliorpoq. Hosea qanoq ilaarsinnaavarput?
2. Hoseap nikallujuilluni oqaluussinikkut maligassaalluarnera qanoq ilaarsinnaavarput?
2 Iluarisaanngitsukkut oqaluussineq. Pallorfiginninnerup ilumoortup suujunnaarsinneqangajavinnerani Hoseap tusarliussani, pingaartumik Israelikkut naggueqatigiissortaanut quliusunut, tusarliuppaa. Nersuteeraasaliamik pallorfiginninneq Kunngip Jeroboamip siulliup aallarnigaa Jeroboamip aappaata ingerlateqqippaa Jehovallu isaani ajortumik iliorluni. (2 Kng 14:23, 24) Kunngit tulleriiaat kunngiutillugit naggueqatigiissortat quliusut naalagaaffiat, ukiumi 740-mi Kr.in.si. aserorneqarnissaa tikillugu, anersaakkut nakkariartuinnarput. Naak eqqunngitsumik pallorfiginninneq nalinginnaagaluartoq Hosea minnerpaamik ukiuni 59-ini aalajaalluni pruffiititut kiffartorpoq. Uaguttaaq, naak soqutiginnittoqarpianngikkaluartoq akerlilersuisoqaraluartorlu, uninnata oqaluussiuaannarpugut? — 2 Tim 4:2.
3. Hoseap inuunerani Jehovap nallittuinera qanoq ersersitsiva?
3 Jehovap nallittuinera pingaartiguk. Jehovap Hosea ‘arnamut allasiortumut’ kateqquaa. (Hos 1:2) Nuliata, Gomerip, Hosea ernertaakkaluaraa kingusinnerusukkut uersaalluni marlunnik qitornartaaqqippoq. Hoseap nuliaminik isumakkeerfiginnikkusussusia Jehovap Israelikkunnik namminissarsiortunik nallittuingaarneranut assersuutaavoq. (Hos 3:1; Rom 9:22-26) Uagut, Jehovap nallittuinera inunnut tamanut ilisimaneqalersikkumallugu, kissaatigisavut pilliutigiumavavut? — 1 Kor 9:19-23.
4. Jehova pillugu qanoq pilliuteqarumassaagut?
4 Jehovap kiffaasa ilaasa suliffitsik akissarsiarissaarnartoq qimassimavaat kiffartornermut piffissaqarnerujumallutik. Jehovamut kiffartornerminni salliutitsiniarlutik ilaasa kisimiittuuginnarnissartik imaluunniit qitorniunnginnissartik aalajangiussimavaat. Hoseap inuunera eqqarsaatigigutsigu immaqa eqqarsassaagut: “Hoseatut iliorsinnaanavianngilanga.” Taamaattorli Jehovap ajunngisaarneranik pisassarinngisaraluatsinnik pingaartitsinerujartortilluta anersaavanillu illernartumik nakussatsinneqarluta, Hoseatut, takorloorsinnaanngisatsitut Jehova kiffartorfigisinnaassavarput. — Matt 19:26; Fil 2:13.