Pruffiitit maligassariniarsigit — Mika
1. Apeqqut suna Mikap eqqarsaatigisimassavaa, oqaluussinerali sooq asuliinnaanngila?
1 ‘Qaquguuna pissutsit aaqqissuussaanerat ajortoq suujunnaarsinneqassasoq?’ Pruffiitip Mikap naalagaaffinnut Israelimut Judamullu Jehovap eqqartuussutai oqaluussissutigigamigit imminut taama aperisimassaaq. Oqaluussinera asuliinnaanngilaq. Ukiumi 740-mi Kr.in.si. Mikap inuunerata nalaani Jehovap Samaria pillugu oqaasii eqquupput. (Mika 1:6, 7) Kingusinnerusukkut ukiumi 607-imi Kr.in.si. Jerusalemi piuneerutitaavoq. (Mika 3:12) Ullumikkut Jehovap eqqartuussutaasa naammassinissaat utaqqitillugit Mika qanoq ilaarsinnaavarput?
2. Jehovap ullussaa utaqqitillugu sooq aamma qanoq erinitsajuitsuusariaqarpugut?
2 Erinitsajuitsuugit. Mika allappoq: “Uanga Naalagaq alaatsinaassavara, Guuti annatsitsisiga neriuffigissavara, Guutima qinnutiga tusarumaarpaa!” (Mika 7:7) Soorunami Mikap naggatissap nalliunnissaa utaqqitillugu assani sarliaannanngilai. Jehovamut pruffiititut suliaqartuaannarpoq. Uaguttaaq Jehovap ullussaa utaqqitillugu ‘illernartuullutalu Guutimillu mianerinnilluta inuusariaqarpugut’. (2 Petr 3:11, 12) Jehovap erinitsajuitsuunera pissutigalugu inuit allamik isumataarnissaannik periarfissinneqarput. (2 Petr 3:9) Taamaattumik Biibilimi peqqussut malillugu pruffiitit erinitsajuitsuunerat ilaarniartarparput. — Jaak 5:10.
3. Sooq ikioqqulluta Jehova anersaamik illernartumik qinnuigisariaqarparput?
3 Jehovap pissaanera tatigiuk. Naak Mika unamminiarnartumik suliassaqaraluarluni naammassisinnaallugu Jehova tatigaa. (Mika 3:8) Tupinnanngilaq tatigeqqulluni Jehovap oqaatsimini kajumissaarmatigut. Teokratiimik akisussaaffitik naammassisinnaaqqullugit taassuma qasusut naammattumik nakussatsittarpai. (Tuss 84:6, 8; Es 40:28-31) Nammineerlutit tamanna kiffartorninni misiginikuuiuk? Ikioqqullutit Jehova anersaamik illernartumik akuttoqatigiimmik qinnuigisarpiuk? — Luk 11:13.
4. Sooq Mikap inuunera uagutsinnut maligassaalluarpa?
4 Inuunini tamaat Mikap Guutip piumasaa pingaarnerutippaa. Ileqqussatigut ajortunngorsimanermi inuugaluarluni aalajaattuarnissani aalajangiusimavaa. Uaguttaaq assuarnaassutsitsigut ullut tamaasa assingusumik misilinneqartarpugut. Taamaattumik aalajaangiusimatigu Jehovap “Guutitta aqqani naassaanngilluinnartumik” saqiniarluta. — Mika 4:5.