Nipaaginnarnak oqaluusseqatit ikioruk
1. Allamik oqaluusseqateqaraangatta Paulusip pissusia qanoq ilaarsinnaavarput?
1 Apustilip Paulusip uppeqatiminik najorteqarnerminik piffissaq kajumissaaqatigiinnissamut periarfissatut isigisarpaa. (Rom 1:12) Illit aamma allamik oqaluusseqateqaraangavit oqaluusseqativit ikiornissaanut sapiissuseqalernissaanullu piffissaq periarfissatut isigisarpiuk? Nipaaginnarnak sunniuteqarluartumik oqaluussisartunngorninnut qanoq iliuuseqartarsimanitit oqaluttuarisinnaavatit.
2. Oqaluusseqaterput qanoq imminut tatiginerulersissinnaavarput, aamma tamanna sooq pingaaruteqarpa?
2 Imminut tatigilersitsigit. Oqaluussisartut ilaat imminut tatigivallaartanngillat tamannalu kiinaasigut oqalunnerisigullu malugineqarsinnaavoq. Ilumoorluta nersualaarnerisigut imminut tatiginerulersissinnaavavut. Allatut qanoq imminut tatigilersitsisinnaavugut? Nakkutilliisup angalasartup annilaangasarsimanini qanorlu qaangernissaanut ikioqqulluni qinusarsimanini pillugit oqaluusseqatini ammasumik oqaluttuuppaa. Qatanngut angut imminut tatigilerniarluni suna iluaqutigisimanerlugu ima oqaluttuarpoq: “Qungujunnermik aallarniisarpunga. Ilaannikkulli qungujussinnaajumallunga qinoqqaartariaqartarpunga.” Illit oqaluussinermi imminut tatigilerniarlutit suna iluaqutiginikuuiuk? Tamanna pillugu oqaluusseqatit oqaluttuuguk.
3. Oqaluusseqaterput oqaluussinermi sunniuteqarluarnissaanut ikiorniarlugu qanoq oqaluttuussinnaavarput?
3 Periutsit oqaluttuarikkit. Oqaluussinermi sunniuteqarluartumik, immaqa najukkami pisimasunik, aallarniuteqartarpit imaluunniit apeqquteqartarpit? Aallarniummik iluatsilluartumik allannguillutit misilinnikuuiuk? Oqaluusseqatinnut oqaluttuariuk. (Uss 27:17) Pulaaqqiiniarlusi ingerlaarnissinni suna oqaloqatigiissutiginiarnerlugu qanorlu anguniagaqarnerlutit oqaluttuussinnaavat. Atuaqqissaaqateqareerussi sooq qulequtaq taanna allassimaffillu taannarpiaq toqqarsimanerlugit imaluunniit sooq atuaqqissaaqatigisap tamanna pisariaqartissimaneraa oqaluusseqatit oqaluttuuguk.
4. Sooq oqaluusseqativut ikiorusuppavut?
4 Ukiuni hundredelinni siullerni iivangkiiliumik oqaluussissutiginnittut uppeqatiginngisatik kisiisa ikiorniarsarinngilaat. Aammattaaq iluminni nakussatseqatigiinnissartik kajumissaaqatigiinnissartillu pingaartippaat. (ApS 11:23; 15:32) Apustilip Paulusip Timotheusi inuusuttoq ilinniartitaraa kingornalu kajumissaarlugu ilikkakkani allanut ingerlateqqeqqullugit. (2 Tim 2:2) Oqaluussinermi ikiuisarnissarput puigunngikkutsigu uppeqatitta nuannaarnerulernissaannut sunniuteqarluarnerulernissaannullu allisaaqataanitsigut Ataatarput qilammiusoq nuannaartissavarput. — Hebr 13:15, 16.