Tatiginninneq pilerseqqinneqarsinnaavoq
ULLUMIKKUT tatigisassaqannginnermik ajornartorsiut ’ullussanut kingullernut’ nalunaaqutaagaluarluni aamma ukiut tuusintilikkuutaat matuma siornagut ajornartorsiutaasimavoq. (2 Timûtiuse 3:1) Sumiiffimmi tatiginninnginneqarnissaanik ilimanannginnerpaami atuuteqqaarsimavoq — tassa Paratiisimi. Sumiiffik tamanna Biibilimi ima allaaserineqarpoq: „Guuti [Jehova] Edenimi naatsiiviliorpoq kangiani, inulianilu tassunga pisippaa. Guutip [Jehovap] nunamit naalersippai orpiit tamalaat takorannersut neriffigiuminartut, aamma orpik inuussutaasoq naatsiiviup qeqqaniittoq, orpillu ajunngitsumik ajortumillu nalujunnaarutaasoq.“ — 1 Moses 2:8, 9.
Versini kingulianiittuni erserpoq tamanna qanoq ililluni ullumikkut tatigisassaaleqinarneranut attuumassuteqartoq. Allassimavoq: „Guutillu [Jehovap] inuk mianersoqquaa oqarluni: ’Naatsiiviup orpii tamaasa neriffigisinnaavatit, kisianni orpik ajunngitsumillu ajortumillu nalujunnaarutaasoq neriffigissanngilat, neriffigigaluarukkumi toqussaatit.’“ (1 Moses 2:16, 17) Jehovap oqaasiinik qularinninnissaminut Adam pissutissaqarpa?
Nangilluni ima allassimavoq: „Pulateriaarsuk nersutinit nujuartanit Guutip [Jehovap] pinngortitaanit tamanit peqqusersuuneruvoq; arnarlu oqarfigaa: ’Ilumununa Guutip naatsiiviup orpiisa arlaannaalluunniit neriffigeqqunngikkaa?’ Arnap akivaa: ’Naatsiiviup orpiisa paarnaannik nerisinnaatitaavugut, taamaallaat orpiup naatsiiviup qeqqaniittup paarnai pillugit Guuti oqarpoq: ’Taakku nerissanngilasi attornagilluunniit, toqoqqunasi.’ Taava pulateriaarsuup arnaq oqarfigaa: ’Naamik, toqussanngivippusi. Guutiuna taama oqartoq nalunnginnamiuk neriffigigaluarussiuk isisi uisitaajumaartut Guutisullu ilerumaartusi ajunngitsoq ajortorlu nalujunnaassallugit.’ Arnallu orpik qiviarlugu paasigamiuk neriffigiuminarlunilu isigiuminarlunilu sianisuunnguutissaqqissoq paarnaasa ilaannik tigusivoq nerillunilu, aammattaarlu uini saniminiittoq tunillugu; taannalu aamma nerivoq.“ — 1 Moses 3:1-6.
Guutip mianersoqqussutaata paatsuugassaanngitsup sumiginnarneratigut Adamip Evallu takutippaat Jehova tatiginagu. Guutip akeravissua, Satan, pulateriaarsuk aqqutigalugu Evamut oqalussimasoq malillugu iliorput. Jehovap aqutseriaasianut Satan tatiginninngilaq. Tamanna aammalu makitasuumik ataqqinaateqarumatuumillu uummateqarnini pissutigalugu Guutimut pikitsitsivoq inuillu siulliit marluk immisut iliornissaannik tammartillugit. Isumaqalersippai Guuti tatigineqarsinnaanngitsoq.
Attavigiinneq aserorneqarpoq
Allanik tatiginninngitsut ataavartumik ikinnguteqarnissartik ajornakusoortittarpaat. Publilius Syrus, Romamiu atuakkiortoq ukiunik naatsorsuisalerfitta siornagut ukiuni hundredelinni siullerni inuusimasoq, ima allassimavoq: „Tatiginninneq ikinngutigiinnermut nimituaavoq.“ Adamip Evallu pikitsitsinermikkut ersersippaat Guutimut tatiginninnatik. Taamaattumik Guuti taakkuninnga tatiginninnissaminut tunngavissaqanngilaq. Tatigeqatigiikkunnaarneq tamanna inuit siulliit marluk Guutimut ikinngutaajunnaarnerannik kinguneqarpoq. Inuit pikitsitsinerat pillugu toqumut pillareeramigit kingorna Jehovap taakkununnga oqalussimaneranut takussutissaqanngilaq.
Aammattaaq Adamip Evallu akornanni pissutsit ajorsipput. Jehovap Eva ima mianersoqquaa: „Naartuninni amerlaqisunik ippigusuuteqartittarumaarpagit. Anniarlutit ernisarumaarputit; uiit pilerissuseqarfigissavat, taannali ilinnut naalagaassaaq.“ — (1 Moses 3:16) Versip naggataata tungaa The Jerusalem Bible-mi ima nutserneqarsimavoq: „Naalagarsiortitarissavaatit.“ Guutip siunertaatut nuliaminut asannittumik niaquunissaminut taarsiullugu maanna Adam taassumunnga ’naalagaalissaaq’, imaluunniit ’naalagarsiortitsisuulissaaq’.
Ajortulioreeramik Adamip nuliani pisuutilerpaa. Isumaqarpoq taassuma iliuusii pisuullutik naatsiivimmit pitsaalluinnartumit nunamut naatitsivigineqarsimanngitsumut anisitaallutik, issunngoqqinnginnerminni pitsaasunik atugaqanngilluaasarlutik ilungersortussanngorlutik. (1 Moses 3:17-19) Takorloorneqarsinnaalluarpoq tamanna taakkua akornanni isumaqatigiinnginnermik pilersitsisimassasoq. Qularnanngitsumik Adam qisuariapiloorpoq oqarluni Eva kingorna tusaaniaqqinngisaannassallugu. Immaqa misigisimavoq nuliaminut ima oqarsinnaalluarluni: ’Maanna uanga oqartussaalerpunga!’ Akerlianilli immaqa Eva misigaaq Adamip ilaqutariinnut ittuusutut akisussaaffini eqqortissimanngikkaa, taassumunnga tatiginnikkunnaassutigisaminik. Qanorluunniilli pisoqarsimagaluarpat, inuit Guutimut tatiginninnginnerat taassumunnga ikinngutaajunnaarnerannik kinguneqarpoq, attavigiinnerallu aserorluni.
Kina tatigisinnaavarput?
Soorlu Adamimik Evamillu pisimasup takutikkaa kikkut tamakkeratik tatigineqarsinnaapput. Qanoq ililluta paasisinnaavarput kikkut tatigisinnaallugit kikkullu tatigisinnaanagit?
Tussiaat 146:3-mi ima siunnersorneqarpugut: „Tunaareqinasigit naalagaanertat, inuit annaassisinnaanngitsut.“ Aamma Jeremia 17:5-7-imi ima allassimavoq: „Perloqqunarsili inuk inoqatiminik tatiginnittoq inuillu toqujasut ikiorsiisinnaanerannik tunaarinnittoq uummataalu uannit [Jehovamit] nigortoq.“ Nangillunili allassimavoq: „Pilluaqqunarsili inuk [Jehovamik] tunaarinnittoq.“
Imaanngilarli inunnik tatiginninneq tamatigut kukkunerusoq. Allassimaffinni erseqqissarneqaannarpoq Guuti tatigiuaannarsinnaagaluaripput taamaattoq inunnik naammalluinnanngitsunik tatiginninneq ilaannikkut ajorluinnartumik kinguneqarsinnaasartoq. Assersuutigalugu, Guutip kisimi naammassisinnaasaanik, tassa annaassinissamik eqqissinermillu isumannaassutsimillu atuutilersitsinissamik, inunnik isumalluarfiginnittut pakatsinngitsoornavianngillat. — Tussiaat 46:10; 1 Tásalûníkamiut 5:3.
Inuit suliniarfeqarfiillu inunnit pilersinneqarsimasut tatigineqarsinnaapput aatsaat Guutip siunertaa kristumiunullu najoqqutassiat naapertorlugit iliuuseqarunik. Taamaattumik allanit tatigineqassagutta ilumoortumik oqaluttariaqarpugut unneqqarissuullutalu tatigisassaasariaqarluta. (Ussatit 12:19; Evfisumiut 4:25; Eprîarit 13:18) Aatsaat Biibilip najoqqutassiai naapertorlugit pissusilersortarutta allat uagutsinnut tatiginninnerat pissutissaqarluassaaq illua’tungeriinnullu tamanut nakussatsitsillunilu qiimmassaataassalluni.
Tatiginninneq atuutileqqittoq
Jehovap nalunaajaasui Guutimut tatiginninnissaminnut aalajaatsumik tunngavissaqarput inunnullu tamatuminnga kajumissaarisarlutik. ’Guuti sallusinnaanngimmat’ oqaatsini malillugit iliornissaa tamatigut tatigineqarsinnaavoq. Asanninnerup Guutianut tatiginninneq pakatsissutaanngisaannassaaq. — Eprîarit 6:18; Tussiaat 94:14; Jesaja 46:9-11; 1 Juánase 4:8.
Jehovamut tatiginninnermi ataasiussuseqartut taassumalu najoqqutassiai malillugit inuusut tatigeqatigiinnissaminnut assut piumassuseqarput. Silarsuarmi tatigisassaqarpianngitsumi inunnik tatigisassaasunik nassaassaqarnera nuanneqaaq! Takorlooriaruk silarsuaq qanoq allaanerutigissagaluartoq inuit allat oqaasii iliuusiilu tamaasa tatigilluinnarsinnaasuugutsigik. Silarsuassami nutaami Guutip neriorsuutigisaani taamaassaaq! Tatigisassaqannginnermik ajornartorsiuteqartoqaqqinngisaannassaaq!
Taamanikkussamut inoorusussinnaavit? Taamaappat Jehovap nalunaajaasuisa kajumissaarumavaatsit Guutimut taassumalu neriorsuutaanut tatiginninninnik nukittorsaaqqullutit. Qanoq ilillutit? Inuunermik angusinissamut piumasaqaatinik ilinniarnerunikkut. Biibilimik atuaqqissaarnikkut paasissavat Guuteqartoq, taassuma inuiannut ajunngitsussaq soqutigisarigaa naalagaaffinilu ikiortigalugu nunarsuarmi ajornartorsiutit qanittukkut aaqqikkumaarai. Inuit millionilikkuutaat Guutimik taassumalu oqaasianik, Biibilimik, tatiginninnissartik ilikkarsimavaat. Qanoq iliorluni Biibili atuaqqissaarneqarsinnaasoq Jehovap nalunaajaasuisa akeqanngitsumik ilitsersuussutigerusuppaat. Paasissutissanik amerlanerusunik pissarsiniarlutit atuagassiamik matuminnga naqiterisut allaffigisinnaavatit. (wE 15/8 98)
[Qupp. 5-mi issuagaq]
Guutimut tatiginninnginneq inuit akornanni pissutsinik ajorsisitsisarpoq
[Qupp. 6-mi issuagaq]
Kristumiunut najoqqutassianik maleruaanerput naapertorlugu allanit tatigineqarsinnaavugut