Oqaluussinermi pikkorinnerulerit — Soqutiginnittunik allattuisarnikkut
“Imminut nakkutiginiarit, aamma ajoqersuisutut suliat nakkutiginiaruk.” (1 Tim 4:16) Apustilip Paulusip Timotheusimut siunnersuutaani isumassarsiarititaasumi erserpoq oqaluussisartunngorlaajugutta misilittagartuujuguttaluunniit pikkorinnerulerumalluta ilungersortariaqartugut. Tamanna anguniarlugu iluaqutissatut allaaserisat tulleriiaat nutaat ima qulequtallit “Oqaluussinermi pikkorinnerulerit” Guutip naalagaaffianut kiffartorneq-mi saqqummersinneqartalissapput. Piginnaasaq pingaarutilik allaaserisani sammineqartassaaq qanorlu ineriartortinneqarsinnaaneranik siunnersuuteqartassalluni. Qaammammi tamatumani tamatta kajumissaarneqartassaagut piginnaasaq pineqartoq pingaarnerutillugu ineriartortittassagipput. Qaammat naagaangat oqaluussinermut tunngasumik ataatsimiinnermi piginnaasap sulissutiginera qanoq iluaqutigisimanerlugu oqaaseqartarnissatsinnut periarfissinneqartassaagut. Qaammammi matumani soqutiginnittunik allattuisarnerup sulissutiginissaanut kajumissaarneqarpugut.
Sooq pingaaruteqartoq. Oqaluusseqquneqarnerput naammassisinnaajumallugu oqaluussinitta saniatigut iliuuseqartariaqarpugut. Sallusuissutsip inerittussaa ikkussimasarput imerteriartortariaqarparput soqutiginnittut uterfigalugit ajoqersorlugillu. (Matt 28:19, 20; 1 Kor 3:6-9) Inuk taannarpiaq naapeqqinniartariaqarparput uummammiuinik eqqartueqatigalugu oqaloqatigiissutigisimasavullu nangeqqillugit. Taamaattumik soqutiginnittunik naammattuuigaangatta allattueqqissaartarnissarput pingaarutilerujussuuvoq.
Qaammammi matumani una misiliguk:
Allattuigaangavit suna allannerlugu angalaaqatigisat oqaluttuuttaruk.